無品神探: 第一節

唐樓嘅一個細單位。

單位入面一個著住底衫既男人食住煙，睇緊報紙。

度門慢慢咁開左，一個中學生垂頭喪氣咁走左入黎，粒聲唔出。

男人頭抬都唔抬，問：「考成點？」

學生唔出聲。





男人望向個學生，放低報紙，一手搶左張成績單。

一睇，個男人面都青曬，一手拎個衫架，一下鋤落個學生度。
 
佢一路打，一路鬧：「養你養咁耐，養到你咁q廢。真係養舊叉燒好過！」
 
學生一邊嘗試用手擋，一邊默默咁流馬尿。
 
男人一路打，繼續講：「正廢柴！識埋d阿豬阿狗。睇死你同嗰個阿華阿明都係考零分啦！」 





學生繼續想用手擋，慢慢震緊、細細聲講：「佢…佢地考…考到四分。」
 
聽到呢句，個男人停左手腳，話：「估唔到阿明個樣戇下戇下都執到四分。」
 
個學生搖搖頭，細細聲：「唔係啊，佢…佢都只係兩分…」
 
「兩分？又話四分？」男人皺眉。
 
「阿…阿華都兩分…」
 




男人一聽，手架齊用招呼個學生：「你班友廢到！！！會考三條友五分都冇！等我打死你個衰仔！」
  *****************************************************************************************************************************************************************************************************
十五年後。
 
深水埗。
 
年年香港人都鍾意排全港最窮社區，而無論點排，深水埗總會係其中一員。
 
但往往呢d地方被人形容為「龍蛇混雜」，有「蛇」就自然有「龍」。
 
一棟唐樓前，林立種種招牌。招牌大部分唔係咁好既，仲有d黃。
 
一女二男，望左眼熙來攘往的人群，又望望d招牌。
 
男人都西裝筆挺，頭髮gel到行一行，一望就知係保鑣。女人一身西裝裙，踢住高踭鞋。男女既打扮，都同呢個地方格格不入。




 
其中一個叫阿tim既高大威猛既後生仔托托眼鏡，話：「小姐，呢d地方唔係好啱你黎。」
 
另一個叫阿john，有d肥肥地既男人點頭同意：「係囉，小姐。呢d野，派我地黎就得啦，根本唔係你親自出黎。」
 
女人揮揮手，表示唔同意，話：「呢件事，第個黎我唔會放心，我要親自黎。」
 
佢吸吸氣，打個手勢話：「阿tim阿john,跟我上去。」
 
兩個男人拎住手杖，跟左入去。
 
三個人行上樓梯。先係見到「XX按摩」，然後見到「青春玉女」。女人見到呢d招牌，皺皺眉，再緊緊既拎住個手袋，繼續腳步。男保鑣一前一後，護住女主。
 
三樓。
 




昏黃既燈光下，見到個殘破既招牌，寫住「偵探所」三個字。招牌指住右邊一度殘殘舊舊既木門。
 
阿tim一手拎手杖，一手敲道門：「哈囉？係咪偵探所？」
 
冇人應。
 
除左呢棟樓各種令人難堪同唔令人難堪既聲音之外，呢道應該係偵探所既門入面，並冇傳出任何聲音。
 
「哈囉？」阿tim用多左力敲道門。
 
又係冇人應。
 
女人睇住佢部iphone，話：「照計應該就係呢度。我睇網上d人話，就係呢度。」
 
「睇個？」原本跟住後面既阿john走左上前。




 
阿john敲左一敲道門，佢原本就手瓜大到似人地腳瓜，佢一敲，道門即刻爆幾條紋出黎。
 
兩個保鑣即刻睇到眼都大埋。
 
女人聽到爆裂聲，即刻望上黎，問：「咩事啊？」
 
阿john老老尷尷指左指道門，又R左R頭，話：「eh…小姐，頭先呢道門爆左。」
 
女人望左望道門，有d呆滯。
 
「我見到。」
 
「eh…」
 




「eh…」
 
「小姐頭先阿john只係敲左敲，道門就裂左。」阿tim幫阿john補充。
 
「…」女人唔出聲。
 
「小姐不如我地…睇下入面究竟有冇人？」阿john一路R頭，一路建議。
 
「咁快d啦，企係度做咩？」女人有d唔耐煩。
 
「係！」
 
當阿john隻手掂到道門，並嘗試道門係咪真係鎖住個時，只聽到「卡啦」一聲。
 
然之後，係一陣既「卡啦卡啦」聲。
 
成道門隨著碎裂聲，冧咗。
 
望住d木片木碎，三個人打左個突，呆咗。