有一晚一個來電外傳: 第一章 - 約滿
迎頭一望，星巴克咖啡既招牌就係眼前，
我心入面暗唸：呼！終於比我搵到呢間野啦！
我連忙衝過去，時而望望手錶已經遲左差唔多１５分鐘。
死啦！又比阿欣話啦一定！
入到裡頭，我眼碌碌咁望望四周，睇下見唔見阿欣既身影，
不消幾秒，已經睇到一隻纖手向住我揮一揮，示意佢坐既位置。
果時我知道自己遲到，於是就臉帶慚愧咁行過去準備捱鬧。
當我想開口講對唔住之際，
阿欣已經開聲：阿樂，做咩頭ｄｕｐｄｕｐ咁呀？
我都冇諗住嬲你遲到，快ｄ坐低先啦。
阿欣語氣平穩，一顧地溫柔向我講呢句說話，就好似冇當我遲到係一回事咁。
我：對唔住呀！呢度太大，我搵左好一陣先搵到，
由細個到而家我方向感都麻麻地．．．
阿欣微微笑望住我：樂，你應該係第一次黎吧？
我點頭答道：係呀！我屋企咁窮，點有機會接觸呢ｄ地方呢，
所以我自己都唔係好識就時間過黎，所以先．．．．
阿欣搖搖頭，
眼睛一直注視我雙眼對我講：大個左一定有機會既，
係呢，飲咩呀？我去買。
我即刻起身，雙手向前搭住阿欣膊頭，輕輕使力按一按低，
同佢講：你坐低啦，等我去買，我知你口味嘛！
阿欣鍾意飲熱既咖啡，
若然去得星巴克既話，選擇就鐵定係焦糖咖啡。
買咖啡既同時，我見到有藍莓芝士蛋糕，
就順手點下了。
買完返黎坐低之後，阿欣注意到我有買埋蛋糕，
即刻話：你又知我想食既？
我：點會唔知呢，你每次見親到想食架啦。
阿欣：仲好講，都係比你傳染姐！我食肥左既話你絕對要負全責。
阿欣邊說邊對我會心微笑，燈光渲染下佢臉頗有點微微泛紅，
我第一次感覺到，原來女仔既笑容係可以咁醉人。
阿欣呢一種笑容，我諗我永遠都會記得，
嚴格應該係話，忘不掉，也忘不了。
對我黎講，佢既笑顏係我記憶腦海之中，
可能只係滄海一粟，但以笑容黎排序既話，
阿欣絕對係滄海遺珠，
難以有一個女仔既笑顏可以同樣貌咁搭配，
有相映成襯之效。
果時，我屏住呼吸聚神凝望，
彷彿佢迎眸一笑已經可以燃亮我臉頰所有微絲血管，
令到我都面紅耳熱起黎。
阿欣：做咩眼定定望住我呀？我食得好樣衰咩？
我：唔係，望住你食野都係一種福氣黎既。
阿欣冇好氣話：你想整肥我咩！張口開！！
然後，阿欣輕輕細切一口蛋糕，餵左我食一啖。
我：係呢，你屋企人呢？
阿欣：係另一邊啊，我同佢地講話約左男朋友食ｄ野呀麻。
聽到阿欣咁答，我微微笑住搖頭。
阿欣就係一個非常爽直既女仔，
拍拖會直接同家人表明，唔會收收埋埋，
況且佢屋企人亦非常開通，唔太反對佢談情說愛。
我同阿欣佢關係，佢媽媽應該知得一清二楚吧，
但求阿欣唔好將我同佢既每一個細節都話比阿媽聽掛，
唔係十條命都唔夠死。
我又諗左一諗，
既然我而家仍能保住全身而退，咁即係話佢媽咪唔知道細節啦！
我不禁暗歎自己聰明既推理能力，一邊放心落黎。
我返魂過來，回答：咁我咪阻住你地共聚天倫囉！
怕唔怕架？
阿欣知我特登玩野，就用手指，掂一掂我個頭，
話：係啊！！你而家好阻我呀！快ｄ走添呀！！
我見佢開始有火爆既先兆，就拿拿聲話：
哈哈，對唔住呀，係我衰係我衰，
我餵你食返一啖補數補數。
阿欣唔滿意咁講：咩一啖呀？要餵晒！
我：唔怕肥咩？
阿欣：多事！
我：係既女皇陞下。
眼見一個完整既芝士蛋糕，
係若干分鐘後，形狀已變得殘缺，
就好似受風化後既石頭一樣，成為頹垣，
默默咁見證住時間既洗禮。
我下意識望望手錶，
心頭猛然一震：嗯，時間無多了．．．．．
眼見時間無幾，
我係刻意將切蛋糕既速度稍稍快慢，
哪怕只有多僅僅一分，甚至一秒，
我都要將時間擠乾得一乾二淨，
我實在唔想有任何空洞既時間縫隙係我地身邊掠過。
阿欣雙手環抱住星巴克圖案既白瓷杯，
不時放係嘴邊，輕吹一口，輕嚐一口，
飲完之後，就舔舔唇，猶有餘悸。
然後話：仲有幾日就放完暑假啦喎，
你讀理科要好好加油至係，
特別係附加數呀，比我知道你唔合格既，
我一定大巴大巴咁星你！
我對阿欣既力度絕對唔會置疑，
只係我實在對自己數學能力缺乏信心，
但以而家黎講，我實在唔想講學業問題住。
我：知啦知啦，成個阿婆咁，囉囉嗦嗦！
你唔好叫阿欣啦，你叫阿婆啦！
阿欣即刻用力猛踩我隻腳，令到我痛不欲生。
都唔知佢食咩大，下下都出盡奶力打我，
成日話咩打者愛也，痴撚線！
之後，阿欣若有相思咁話：樂．．．
我：嗯？
阿欣：同你一齊既時候，真係過得好快．．．
估唔到，我地咁快就約滿，
呢段期間我真係好開心。
雖然佢係笑住對我講呢返說話，
但語調中我絕對可以感受到佢隱約既婉惜之意，微小，但強烈。
我亦好清楚知道，
阿欣佢．．．正係度抑制緊自己既情緒。
我稍稍捉一捉緊阿欣隻手，十指緊扣，
用心咁仔細咁受住果一剎那人體間微妙既體溫傳遞，
並且紀錄住佢肌膚既熱溫。
果一剎那，我真係好希望自己手上既每一條血管，
都可以變成真空狀態，等我可以牢牢咁將阿欣既溫度
鎖上，保留至永久。
果時，我攤開左阿欣既手心，
慢慢用手指寫上幾個字：我．都．好．開．心
阿欣望望時間，
我主動話：差唔多了嗎？
佢微微點頭。
我：我幫你拎啦！
我拖著行李箱步出星巴克，
沉甸甸既行李，正好嚮應住我現時既心情，
心入面唔知點解而家先難受起黎，
胸口就好似比數公斤既無形重物猛壓一樣。
有時有ｄ野，真係唔可以咁豁然接受，
我以為我自己已經睇得好開，點知原來唔係果回事。
感情問題，我一向都太過入局．．．．
步行期間，我倆都沉默不語，
可能大家都認為咁樣比較好。
因此，途中就只有行李箱所發出既滾輪聲打破我地之間既沉默。
突然，阿欣停低左腳步，就在人群係我地兩旁穿插之際，
阿欣問左我一句說話．．．．
阿欣：樂，其實你．．．鍾唔鍾意我？
阿欣所問既問題，我倒不覺得驚訝，
但我係第一次見到佢講野咁冇信心既樣，
好似呢一個問題一直係佢既心結咁。
我果時亦好堅定咁答簡單而有力既兩個字：鍾意。
然後就唔再講其他花言巧語，
以免文過飾非。
只要係真心既，回答既長短並唔係一個問題吧。
阿欣聽到之後，由衷咁笑起黎，樣子好滿足。
然後我地再次提起腳步，邊走邊講。
阿欣：頭先呢一個問題，一直以黎我都冇好確實問過你，
係因為我怕聽到既答案並唔係我心入面想要既。
直至今日，我先能夠鼓起勇氣．．．．
我未等阿欣講完，已經打岔。
我微微笑：咁呢個答案應該係你預期所想架啦！
都黎到呢個時候，唔好亂諗野啦知嘛？
我繼續拉動行李箱．並主動拖住阿欣隻手，
兩人踏著細碎既腳步，徐徐咁步入離境大堂．．．．．
故事係倒叙，
短期租約呢個名，係故事入面係有意思，
大家睇落去就明。
新機場內既設計點樣巧妙，配套點樣完善，
周遭店舖係何等林立對當時既我黎講，
已經唔重要，我亦冇點理會呢個引以為傲既
香港國際機場有幾咁風光。
我特意行慢少少，好讓我可以再睇清楚一Ｄ阿欣既側面同背影。
無錯，比起側面，佢正面當然係更加富有可塑性同可觀性。
白晢肌膚，深輪廓，特別係佢深邃而澄澈既雙眸，
每一次同佢雙眼對望，漆黑既瞳孔有如萬籟俱寂既夜幕，
加上係機場明亮光線既反射下，眼珠更泛起點點星芒，
無不將我成個人都怔住，實在太美妙！
不過，唔知從幾時開始，
我就發覺阿欣既側明更加耐人尋味，
我就更喜歡啦！
當時我凝望住阿欣既側面，
但腦袋卻一團混亂，
實在好不知所措．．．．．
我唔想嘴邊盡係一Ｄ傷感既說話，
亦唔想以”一路順風”，”好好保重”，
”請保持聯絡”等俗套既說話草草了結。
唉，心中不禁納悶起黎。
阿欣回一回頭，嫵媚咁笑起上黎：
又眼定定咁望住我側面啦？
所以咪話你呢個人
愰頭愰腦囉！都就黎走啦，仲唔好好記住我正面，
只係掛住我側面側面，正一側面狂黎！
我比佢識穿之後：你又知我冇好好記住你既正面？
一早已經烙印係我心入面啦！
阿欣：有幾深？
我：深到入骨。
阿欣：不過放係心入面冇用架，
要時刻拎出黎，如果唔係會封塵生秀。
經阿欣咁講一講，心口入面巖然發生一場餘震一樣，
係我胸口上蕩漾著．．．
我暗自思忖：的確係，一直以黎我都將阿紫鎖下心入面，
分手半年至今我成日抑制自己唔好每每都諗
住佢既面孔，免得再令自己再陷泥沼，痛苦難當。
以前分手無耐，我思憶阿紫樣貌既速度只需一秒就浮現
係腦海。但隨坐時間一瀉而走，而加我卻要用好幾秒先將
阿紫昔日既面孔記起，但卻已經今非昔比啦！阿紫既模樣
就好似永遠都團積住一層厚厚既塵紗一樣，點化都化唔開，
只有永遠模糊下去．．．但，阿紫終究係我曾經愛過既人呀！
我卻可以將佢慢慢淡忘．．．！？
我返過神，話：估唔到你講既野都有Ｄ道理。
阿欣擺出一副說教既樣：駛咩講，話晒我人生閱歷都比你豐富兩年，
我既說話你要聽！
我冇好氣話：當然當然，阿婆既說話一定要聽既！
說畢，佢就拎手上既機票拍我個頭。
都唔明點解佢咁敏感！反而應敏感既地方就唔太敏感。
阿欣止住了腳步，對我講：就係呢度等啦！一陣媽媽會過黎呢度搵我。
我見冇咩時間剩，就話：岩啦，我有Ｄ野想送比你。
我從袋中拎出一本野，封面寫住四個字，
就好似一本書既標題咁。
阿欣愕住咁望望封面四個字，面上微帶悅色。
大家都好清楚呢四個字既意義 － 短期租約。
當時既我並非能言善道，更何況係第一次同女仔道別既情景呢。
所以客套說話就免了，用講咩就講咩吧！隨心出發永遠係最好！
我：嗯．．
望見呢四個字，起初呢個提議真係覺得幾匪夷所思，
同某程度上係幾諷刺，但係相處內左之後，
我個心亦慢慢解放左好多，有一種如釋重負既感覺。
起初我因為呢一個”租約”係我幫助緊你，
估唔到到最後，原來大家都各有相益！
而家我覺得已經唔係再屬於租約咁冰冷簡單，或者咁利益啦！
我係打從心底確實自己係鍾意左你，並唔係任何一個人既影子。
雖然，日子係過得好快，但我相信我倆之間只係有開心甜蜜既過去，
並無互相傷害大家既傷痕，呢一點我覺得非常之難得。
無論如何，去到果邊要好好生活，有緣既話，我地一定可以相遇。
阿欣一邊聽住我呢番說話，一邊眼濕濕，
我唔想佢係而家呢個關頭又哭成淚人，
我就用手輕輕將佢眼眶既熱淚拭一拭乾，
然後輕輕抱住佢：唔好喊啦，一陣你媽咪見到以為發生咩大件事我就弊啦！
阿欣調整一下情緒，同我講：可以睇嗎？
我：去到果邊先睇比較好。
阿欣：點解？
我：我怕你睇完之後會更加唔捨得。
其實本書並唔係Ｄ咩，只係一Ｄ我地一齊過既相片，
同埋一Ｄ我既感想，我怕佢太過懷念過去而唔捨得離開，
所以先提出叫佢到步後先睇。
阿欣點頭同意，我見阿欣媽咪都拖住行李向住我呢邊黎緊，
我就同阿欣講：喂，你媽咪你係背後黎緊啦，開心Ｄ啦。
阿欣細聲係我耳邊同我講左一句說話，
令我大為震驚．．．．
阿欣用狡猾既神情：樂，我已經將前日我地既事講左比我媽咪知啦。
我：下！唔係掛！！！！
我比阿欣咁講一講，即刻面有難色，
前日我同阿欣所發生既事情，
實在非常私隱呀，阿欣點可以同佢媽咪講架！！
真係比佢激死，加埋我已經嚇到得返半條人命，
而且佢媽咪仲黎緊添，我點樣面對佢先得架．．．
冇幾耐，阿欣媽咪已經係我地面前停低。
我非常尷尬：伯．．伯母．．
阿欣媽咪：阿樂，你真係黎送阿欣機喎，
真係唔話得。阿欣，做咩你對眼咁
紅既？
阿欣：下？冇呀，邊有！
阿欣媽咪：一睇就知你喊過黎啦！
阿樂，係咪你整喊佢架？
我：下．．唔係呀．．
唔好誤會呀．．
阿欣：係阿樂佢整喊我架！
阿欣你好野，咁樣擺我一道！
屎忽欣！
阿欣之後解話：因為佢既說話太令我開心啦，
一時太感動咪喊囉！
阿欣媽咪：真係冇你兩個收，
差唔多上機架啦。
阿欣見我呆若木雞咁，
就係我側面輕聲話：講笑咋傻佬，咁私人既事情點會同媽咪講呀！
我即刻放下心頭大石，真係比佢嚇到半死．．．
阿欣：阿樂，多謝你呢份禮物，
去到果邊，我會定時寄EMAIL比你。
如果可以既話，盡量有假期既我都想黎探你。
我：唔好太過免強呀，Ｄ錢對你黎講好緊要，應該好好讀書先係。
阿欣：但你對我黎講都好緊要呀．．．
我哄哄佢話：如果你有做PART TIME，用自己Ｄ錢黎既話我當然唔會反對，
但唔好用家人Ｄ錢為左我返黎見我一面啦，咁樣唔係幾好。
阿欣：嗯，我會盡力架啦．．
我：好好保重。
阿欣：你都係，要掛住我呀，知嘛？
我：嗯，一定。
就係咁，我就眼白白目送住阿欣同佢媽咪慢慢咁消失係我視線範圍。
我仲記得，阿欣一路背住我走時，一路都時不時回頭望望我，
而我，卻係一直都目不轉睛咁望住阿欣，一直，一直。
阿欣離開左我之後，
我一個人依然呆呆咁企係原地，
我意識到自己冇咩氣力再走。
我亦感受到四周圍既空氣開始變冷起黎，
惟獨身體有一處地方，依然有明確既餘溫，
那就是曾經拖過阿欣既手心，
就係果時，我先識得流起眼淚．．．．
我唔想係眾目睽睽之下咁樣，
就強忍住淚水，走出機場範圍，
坐機場巴士離開。
當我靜靜咁坐係空洞洞既車廂中，
回憶，就好似洪水般來襲，
衝破左我腦海防堤坡既關口，
猛然地將我強拉去我同阿欣最初發展既時候。
那時一個半月之前的一次見面。