轉性人的荒淫校園: 28.《再約小遙》
暑假又到啦，考試之前我約左小遙去街。咁就梗係Whatsapp 問下佢幾時得閒啦。
我：小遙，你考完試未呀？
小遙：考完啦，你係咪想約我去街？
我：係呀，你星期二得唔得閒，之前應承左同你去赤柱。
小遙：原來你重記得㗎，下個禮拜二啦。
我：是但啦。
***
到左星期二，我同天使Gabriel 講我要做男仔，求其著左件圓領T恤，短褲。大約十一點就去到中環等小遙。我出左閘，發覺自己已經又遲左三個字。死啦，小遙實扭甩我隻耳，我又遲到。正當我出閘發現⋯⋯疑，小遙呢？大鑊啦，背定係我遲得滯，小遙把鬼火走左啦。係呢個時候，我電話響。小遙搵我，佢實係好燥底啦。
******************
1 message from 小遙
小遙：喂，關公，你到左未呀？
我：啱啱到左啦⋯⋯對唔住呀我遲到
小遙：唔緊要，知你架啦，我而家先到銅鑼灣，你企多陣啦。
我：等我重以為你等得耐走左添。
小遙：如果我黎見唔到你就閘都唔出直接走架啦。
我：係⋯⋯係⋯⋯係，你慢慢。
******************
我好似碌柒咁企左係閘口等左三個字。小遙終於到啦，今日佢衣著好青春，白色底色，印住碎花嘅背心，佩牛仔布熱褲，涼鞋，散發住青春嘅味道。小遙表情傲慢，慢條斯理咁行埋。「哎⋯⋯喲！唔好⋯⋯意思喎！我遲⋯⋯到添。」
小遙擺明係串緊我平日成日遲到。「唔緊要⋯⋯我都等左你三個字啦，唔通打鑊你咩？」
「乜原來你都知遲到要人等好乞人憎嘅咩？」
我發現又唔夠小遙講，於是決定轉話題。「小遙，你食左晏晝未？」
「你約我十一點唔係就係諗住陪埋我食晏咩？」
「係嘅，咁我地去食板長，好唔好？」D港女就好似D魚生咁，生歐歐，戇尻尻，去板長食魚生，實冇錯嘅。
小遙除左中意串人之外，其實係幾易話為，冇特別異議，就去左中環站果間板長。
***
食食晏晝，小遙問我
「係喎，關公，你識唔識去赤柱㗎？」
「識嘅。」
「咁我跟實你架啦。」
「得啦，唔通跟你咩，路痴。果次你搭電車去灣仔補習，唔知點解盪左去堅尼地城⋯⋯」忽然，我腳板傳黎刺痛。小遙又用腳踭踩我，痛到我眼水都標埋「哇！痴線⋯⋯好痛。」
「唔好再講呀！都話果次我係電車瞓著左囉。」
「係呀⋯⋯係呀⋯⋯叮成粒鐘叮左去堅尼地城呀⋯⋯重有果次約你去西貢，你去左西環，然後你話『吓、西環同西貢唔係係附近嘅咩？』」
「唔準再講呀⋯⋯再嘈我搵豉油淋你呀。」小遙拎起樽豉油扮淋。
「哇哇哇⋯⋯你定D黎⋯⋯得⋯⋯得⋯⋯我帶路⋯⋯如咪跟住你我地去左赤板都似。」
「收皮啦。」小遙忍唔住我嘅䎵笑「赤板係東京㗎。」
「你又知嘅⋯⋯」
***
食完晏晝，我同小遙走左去交易廣場樓下搭巴士，坐左八九個字就終於去到赤柱啦。我同小遙係赤柱市集落左車。就開始係赤柱四圍行啦。
我同小遙先行左赤柱市集。其實真係冇咩特別，特別在好多鬼佬。赤柱市集其實有啲似女人街，周圍都係一D以香港為主題嘅手信。果D「I love HK」T恤，鎖匙扣，香港街景油畫，同埋D懶係有中國特色嘅精品。當然唔小得果D將個鬼佬英文名譯做中文，之後刻落個鎖匙扣果類物品。班鬼佬興致㪍㪍，俾人劏到一頸血。而我同小遙係香港人，對果堆垃圾冇興趣。
我同小遙一路係市集入面行，我隻手就擺下擺下，撞到小遙隻手幾次。小遙似乎冇咩反應，畢竟我都拖過佢隻手。於是，係市集入面一個比較窄嘅位置，我乘機捉住小遙隻手。我望一望小遙，原來小遙都望住我。小遙笑左一下，塊面出現左兩個酒窩，好靚，好可愛。小遙捉得我隻手更加實，佢D手指好幼，好似幾條蟲蟲係我隻手上面爬咁。
「嘩！呢度又煱又冇野睇，我地出海邊行下哩？」小遙搖下我隻手，叫我陪佢出海邊。
我拖住小遙隻手，行到去岸邊嘅海濱長廊。赤柱嘅海岸真係超靚，灣灣地，沿途冇咩高樓大廈。我拖住小遙沿住海濱長廊由市集果邊行去美利樓，沿途有小小海風吹埋黎，都幾舒服。「呀，真係舒服⋯⋯」
「係囉，如果同男朋友黎就好啦。」小遙話。
咩話？小遙有男朋友？原來我一直都係兵？「乜你有男朋友咩？」
「冇喎，你呢？」
「我都冇男朋友⋯⋯我直嘅。」
小遙對於我廢話一樣嘅答案唔太滿意，用手指搣我手背啲皮「你知我唔係想問你呢啲㗎。有冇女朋友呀？」然後鬆開我隻手。
我企圖捉番住小遙隻手「冇呀⋯⋯」
小遙放鬆隻手俾我捉住「咁你有冇追緊女仔呀？」
我將隻手伸向下，嘗試拖小遙隻手「咁你呢？有冇俾男仔追呀？」
小遙啲手指好似一條條蚯蚓咁爬上我隻手「唔知喎⋯⋯你話呢？」
我捉實小遙隻手「我睇你梗係冇仔追，所以先跟左我黎赤柱⋯⋯」
「唔知啵⋯⋯喂，關公，果邊好靚呀！」
的而且確，眼前嘅景物真係好番左去幾十年前咁。我同小遙行到去美利樓，見到一堆懶係復古嘅物品。小遙相當興奮，跑左埋去，擺左幾個女神常用嘅港女十式「關公，幫我影相post 上snapchat！」然後做左幾個可愛嘅表情，又曬下長腿。「關公⋯⋯一齊影。」小遙伸左個頭埋我，用個胸壓住我手臂，伸長手自拍。
***
「小遙，我地過卜公碼頭睇下囉。」我拖住小遙沿樓梯行左落卜公碼頭。卜公碼頭望落好古舊，而且凸左去個海出面，我拖住小遙係碼頭吹住海風，小遙將個頭捱左落我度。
「關公，我想去沙灘玩下。」
「但係⋯⋯」
「唔好但係啦，我著左泳衣係底。」
「但係⋯⋯唔可以去住喎⋯⋯今集要完啦喎⋯⋯」我話。
小遙嘟出個嘴「吓，又要等下回牙？」
「係呀⋯⋯欲知後事如何，請看下回分解嘛。」
「屌！樓豬你去仆街啦！」