轉性人的荒淫校園: 20.《考試前的補習班。上》
上回講到，我遲左半粒鐘番到補習社，我坐左係小遙側面果張凳，見到小遙陰陰嘴笑。
「哇！你唔好再遲D？」
「有黎都算係咁啦⋯⋯」
「疑，你賴尿呀？唔怪之咁耐呀⋯⋯」
「唔係呀⋯⋯D咖啡倒瀉左⋯⋯」我作左個大話。
「哇⋯⋯今日你遲左咁多，重以為見唔到你添。你知你啦⋯⋯出席率特別低㗎嘛！」小遙嘅語氣有啲串。
但又唔怪得佢嘅，冇錯，我真係唔係成日番補習，猶其係果D「燈塔」，「古代」，「沙王」⋯⋯其實D老師名師都係東抄D，西改D，拼埋拼，厚厚地一份，一個月一本，教就教四分一。細個果時屋企對面住左個神婆，日日講輪迴，咁我肯定班補習天王下世係做樹。對我黎講班補習天王只係生存係公仔箱入面嘅一個角色。除左講嘢悶D之改，「歪歪𡃁」同數碼暴龍入面嘅基爾獸基本上冇大分別。老母自細就將睇電視同晒時間劃上左等號，都唔明點解佢會認為電視機入面果隻貌似基獸嘅物體可以教識我物理。我好肯定我寫嘅《變性人的荒淫校園》內容精彩有趣過「歪歪𡃁」任何一本書。起碼我唔會睇佢本《給年青人的話》然後睇到想打飛機。OK⋯⋯其實我有補過「尋日陰」⋯⋯我老母有交錢嘅。而我相信如果佢見到呢篇連載，佢會因為自己有個咁嘅學生而驕傲。
（完全off topic)
好⋯⋯愈扯愈遠⋯⋯番番呢度⋯⋯呢part 係講我同小遙係點識嘅。
話說我D物理不嬲都好掂冇問題，但係老母見一街所有人都補「歪歪𡃁」，講到補完好似會曉飛咁。老母又見「歪歪𡃁」企係巴士後面，側邊寫住佢有十九幾個狀元學生，同埋條撚個位啱啱有條死氣喉係度噴煙，型到震。加上隔離屋神婆話佢骨格精奇，一定可以教到我天下無敵咁話。老母睬我都有味，就幫左我去報名啦。
我去聽左一堂，發覺佢都嘥氣嘅，教果D野係淺到死，然後乜叉都話係「基爾獸絕招」，又話自己係被時代嘅補習天王。聽就嚇一跳，原來得啖笑。加上關公好比愛因斯坦再世，所以覺得「歪歪𡃁」教physics 係絕對冇用。但為左令老母心理上舒服啲，我都係去拎本野，之後眼瞓果日就入去瞓覺，唔眼瞓果日就去行誠品，銅鑼灣地帶。
我D筆記好齊，加上我D物理不嬲好掂，所以一直都相安無事，老母亦冇理我有冇上堂。直至有日隔離屋神婆個仔託我老母問我借之前果個禮拜份筆記黎抄⋯⋯屌！神婆個仔⋯⋯歌仔都有得唱
「細個
瞓公屋四十座
住喺對面神婆
成晩問掛搞到幻覺多」
明知自己幻覺多，D物理飛到四圍係，屌佢老母！就死撚番去上堂啦。老母拎左我本筆記，諗住拎去俾神婆，點知一揭開。老母發現佢可能係第一個揭果本野嘅人。
「哇！新成咁？！拎去退錢都得喎！死仔包你同我出黎」老母十分燥底
「ehhhh....」
「eh....乜春啊你！你究竟有冇去上堂㗎。」老母就好似食左火藥咁。
有人講過，如果你只可以有一樣叻，就叻講大話，因為如果你叻講大話就即係你樣樣野都叻。講大話可以話係關公嘅本能。「有！點會冇嘅！」
「你係個人有去，但隻耳冇聽！隔離神婆呀智障仔又去補習，你又去補習，點解人抄到肥婆坐屎塔咁遢遢撼呀？」
除左講大話之外，我駁嘴都係一流「我好專心聽㗎！隔離神婆呀智障仔就冇啦，一尾掛住抄，我好專心聽，一心不能二用，咪冇抄囉。同埋如果隔離神婆呀智障仔係咁專心抄嘅就唔使問我借黎抄啦！」
老母俾我吹漲左於是話「你唔好咁多阿支阿左摩洛哥啦！總之你今個禮拜之內呢本野你幫我填滿佢。老痘老母搵錢好辛苦⋯⋯」（下略一萬字⋯⋯寫到下年都寫唔曬。
「是但啦⋯⋯」今次大鑊⋯⋯邊度搵咁多字填落啲窿窿度。
***
「喂！關公，你發完夢未呀？打開筆記第二十二頁呀！」小遙一野亨左落我個頭。
「嘩⋯⋯你使唔使出盡全力咁亨我個頭呀？」
「我見你呆左係度成幾分鐘啦喎⋯⋯你係咪有咩事呀？」
「冇呀⋯⋯下個禮拜就考試啦喎」我諗起學校嘅Jessie.....今日佢瞓左係我大脾上面⋯⋯搞到我成褲係口水，搞到我俾小遙恥笑⋯⋯
小遙性格樂天，笑左一聲「唔好諗重有一個禮拜就考試，要諗重有半個月就考完試。」
「考完試你有咩做呀？」我回過神來，嘗試同小遙寒喧。
「你唔好咁多嗲啦，上堂啦！你想約我咩？」
我望住出面部大電視，裏面困住左一個叫「歪歪𡃁」嘅人，又或者係一隻基爾獸，個口開下合下，將D淺到死嘅野重複完又再重複。我望住公仔箱入面隻基爾獸，對眼愈來愈攰⋯⋯好快我瞓著左。
有人話發夢就好似坐時光機，有時你做一D野，會覺得好似早兩晚發夢做過。鬼佬叫呢D做Deja Vu，係法文黎，中文譯「既視感」。傳說外國又試過有人發夢見到幾個冧把，然後佢拎左個幾個冧把去買六合彩，然後中左。呢D叫好彩。又有人發夢會見到之前發生D野。
我趴左係燈塔補習社張枱瞓覺⋯⋯今日我發嘅係第三種夢。時間又回到我初初識小遙嘅時候。
話說老母限我一個禮拜內填曬本筆記D窿，於是乎我死死地氣去左上堂，諗住抄得幾多就得幾多。我入到課室就搵左個位坐，隔離坐左個女仔，佢輪廓好公明，皮膚好白淨。「唔好意思呀，呢度有冇人座㗎。」個女仔放左佢袋係班房入面唯一一張空凳。（係，我又遲到。）
「冇呀」個女仔望一望我，拎走左個袋「但你唔坐得住喎。」
我好奇怪，於是問「點解呀？」
「因為今集完啦喎，你下集先坐啦⋯⋯欲知後事如何，等下回啦⋯⋯請看下回分解。」個女仔答。
死樓豬⋯⋯咋咋帝罰我企⋯⋯都係果句：
欲知後事如何，請看下回分解。