【少少重甜】《用甜筒打喪屍！！》（完）: 第32回 - 來自香港的whatsapp

我地返到旅館房間休息，老闆分左房比我地。雖然我同詩音係情侶，不過仍然要分房訓。  

206號房：我、虧佬。 
207號房：詩音、京香。 
209號房：田中 
309號房：師姐 

我地就係呢度逗留在平靜既兩日。兩日以黎無喪屍，不過老闆佢地連同鄰居呀，成條街既人組成左民間自衛隊。 

令人安心少少既係有警察黎過，佢地同街上既巿民叫做溝通左，話咩要戒嚴。但係對於幾時先有飛機返香港，警察都仍然答唔實我地。 



旅館有Wifi既情況之下，Whatsapp又有得玩了！   但係香港既朋友，仍然無任何討論喪屍既話題！！消息封鎖得咁緊要？ 

whatsapp最頂既message： 

阿妹：「你仲未返到呀？我仲諗住今晚你煮飯架！」 

我真心地笑左出黎，阿妹竟然唔關心手信，開始掛住我啦？真係有D感動。  

我回覆：「阿哥臨時決定玩多幾日，你食住自己先啦  」 



阿妹好快又回覆：「記得幫我買香水呀！日本限定架！」 

屌，我收返我感動果句。 

「錫哂阿哥！  」佢即時補多句。 

屌真係識tum人。 

第二位置頂message係我正印Benetta：「無係日本曳曳嘛？有無去邪骨？」 



鬼妹Benetta識好多廣東話，唔洗驚奇。 

「貴，無錢去邪骨。」我回覆。 

Benetta：「飛機delay左？」 

我：「係呀...所以玩多幾日囉，仲好。」 

Benetta：「哈，你慘了，返到來大把功夫你做！」 

我：「你唔好提工作住啦...」 

Benetta：「我幫你羅長D假啦。 」 



我：「Thanks my dear.Love you. 」 

我同Benetta既對話好簡單。因為平時激情在其它地方。 


至於我最在意既，都係中學時的女神Angel。 

與Angel的Whatsapp最後一個訊息——Angel：「淺草有喪屍。」Last seen都已經係發完訊息果一刻。 

我既message仍然係單剔。 

「呢...這訊息在說什麼呢？」詩音問。 

「話，淺草有喪屍。」我話。 



「啊..是啊。不過大家都在，不用擔心了。」詩音好天真地話。 

「係就好...」我望住窗簾。 

「要再做一次嗎？媽媽快回來了！」詩音話。 

「又做？用哂D安全套啦你就黎！」我話。詩音以傻笑回應。