【自殺之後，我遇見死神小姐】救贖七個自殺者的故事: Case 6 得到惡報的扭曲之人—(36)
「我諗我明白妳嘅自殺原因，面對毀容咁大打擊嘅事，身邊嘅人態度一百八十度轉變，唔單止無人支持妳，更加對妳冷言冷語，冷嘲熱諷，一直以嚟原來好多人都唔鍾意妳，面對雙重打擊，所以妳決定自殺去了結自己嘅人生，同討厭自己嘅世界講再見，係嗎？」我向阿Yan道出佢自殺原因。
「哈哈……」阿Yan聽完之後無回應，只係詭異地笑咗兩聲。
「妳笑咩？」
「你覺得自己睇得好通透定吧？你一定會覺得我咁嘅下場係我自作自受，鬼叫我份人做作，持住自己比其他人靚就當自己高人一等，懶係abc咁周圍r人fd，對住男人淨係識發姣，成日show自己嘅身材唔知搏乜，見有錢靚仔就狗衝，見窮撚毒撚就收佢哋做兵掠佢哋水。好似我咁嘅臭港女，邊會有人真係鍾意我？想我快啲死都嚟唔切啦吓嘛！」阿Yan自怨自艾地講。
我無畀反應阿Yan，由阿Yan繼續講落去。
「個男仔話我收兵釣狗公，咁呢個世界就係咁現實㗎喇！男女相處就係睇樣，有人不自量力追我，咁佢哋又無真係表白，我又廢時直接拒絕佢哋，咁咪keep住做朋友囉！佢想請我食飯，請我睇戲，送嘢畀我，我又唔好意思拒絕佢哋好意，咪接受囉！唔通咁又有錯？
重有，個男人講到咁憎我收兵，佢自己咪又嚟做我隻兵！以為自己好靚仔，成日黐埋想衝我，主動請我食飯，送禮物畀我，我有暗示過話佢唔係我鍾意嗰type，係佢自己死唔要臉係都要黐過嚟，咁怪得邊個？又係怪我收咗佢做兵？」
阿Yan指住遠方嗰堆唔知傾咩傾到暗自竊笑嘅男仔。
「嗰堆男仔話我成日周圍姣仔，明明就係佢哋自己成日主動whatsapp我，聊我傾偈，見我唔理佢哋理其他男仔，就話我係雞係公廁！我ig po相又有得罪佢哋咩？成日cap我圖討論我身材，又話我著得咁暴露成隻雞咁！我係靚女，我有身材，我有本錢，咁我梗係想展現最好最自豪嘅一面畀人睇㗎喇！我收兵就話我對你哋唔公平，咁我ig po張sexy少少嘅相然後被人話係雞又叫做公平咩？嗰堆男人，根本就係人渣！」
阿Yan放低佢嘅手，望住遠方一個女仔。
「我以為佢一直係我嘅好朋友，我估唔到原來我一直被人當係小丑咁笑！」阿Yan指住啱啱不停辱罵佢嘅女仔，「佢平時成日話我哋係好姊妹，話咩有福同享，有難同當。結果到頭嚟呢？原來佢一直背後數臭我，我出事之後佢無關心過我，嗰陣嘅我有幾無助你知唔知呀？我以為身邊重有個好朋友會支持我，我重要厚面皮到主動去想佢關心我，換嚟嘅係冷酷無情嘅一句『自作自受』，我嘅心有幾痛你知唔知？」
阿Yan激動到流下眼淚，但係佢嘅心情反無平復，更加變得更憤怒，指住眼鏡男。
「佢呀……真係好心，喺我毀咗容之後，幫我出頭，關心我，阻止我自殺……呢啲全部都係佢自己作出嚟！」阿Yan哽咽道，「咩嘢被人報復，被人整蠱，佢就係帶頭整蠱我，恥笑我嘅賤人！佢重要扮到自己正人君子咁！其他人向我報復我都算，我同呢個男人無仇無怨，點解佢要咁樣對我呀？點解呀！」
阿Yan崩潰地跪喺地上，雙手揜臉地喊，膊頭不停顫抖。
「點解要咁樣對我呀……我究竟做錯咗啲咩……」
我望住眼前嗰堆阿Yan嘅「同學」，望住佢哋偽善同虛假嘅笑容，諗返起阿Yan所講過嘅嘢，不禁感到噁心。
收兵、釣狗公、搏出位、拜金……等等阿Yan做過嘅事情無疑會令人覺得乞人憎，但無論阿Yan做過幾多嘢，都唔會係應該落得如此收場。
毀容對阿Yan嚟講打擊好大，原本應該掛住一副姣好嘅臉蛋，以美貌去滿足自我一切，卻因為一部份嘅臉容被摧毀，剩低一副醜陋嘅臉容，基本上同毀去餘下數十載人生毫無分別。
毀容之後，身邊嘅人紛紛離佢而去。原本已臉容嚟討著數嘅佢，再無法憑住佢嘅臉容去吸引異性，搏取名氣，展示自己，貼性感相上Instagram，一切一切女神特權，都喺一夜之間失去，從天使變返做凡人。
而且，呢副標奇立異嘅臉容，一定會被人指手劃腳，甚至當面辱笑。就算無都好，當事人都會覺得身邊嘅人係笑緊佢，要掛住一副咁嘅尊容若無其事地生活，心裡一定承受好大嘅壓力，更唔使講阿Yan一直就生活喺人們嘅注視之中，毀容之後嘅佢一定會覺得更多人望住自己。
但呢啲都唔係阿Yan自殺嘅原因。
阿Yan自殺，唔在於外貌，唔在於被人離棄，唔在於心裡壓力，
而係虛假嘅世界。
指責阿Yan收兵釣狗公嘅人，自己都係一個狗衝女人嘅狗公。
對方對自己不感興趣，就辱罵人哋係雞係公廁。
身邊最好嘅朋友，卻係喺背後捅得自己最多刀嘅人。
帶頭捅完人一刀之後，重可以扮作嘗試幫人擋刀嘅好心偽人。
呢一切一切，都虛假得令人發笑，虛假得令人毛骨悚然，虛假得令人作嘔。
你以為你活於真實之中，當你揭開虛假嘅序幕之時，先會發現原來現實係有幾咁可悲。
我哋好難去分辨出，眼前究竟邊個人對自己係真心，邊個人對自己係虛偽，慢慢我哋沉淪於虛假嘅相處之中，再無去嘗試分辨真心與虛假。
我輕輕撫摸住阿Yan嘅頭，安慰住佢。
但係，相處呢樣嘢係雙向，如果單一方向懷住虛假嘅心意，並唔會造成如今嘅局面。
「妳如果嘗試去真心對待人，或者唔會淪落到咁嘅下場。」我講。
「就連你……都覺得係我嘅錯？」阿Yan抬起頭，將我嘅手撥開，「因為我收兵，我拜金，我做作，所以呢一切都係我應得？」
「可以咁講。」我直接道出答案。
「我……收兵，拜金又有咩錯？邊個女仔會唔想有大把男仔圍住自己身邊轉？邊有女仔會唔想好多追求者請自己食飯，送禮物畀自己？重有呀！我想搵個有錢啲嘅男朋友，過啲好啲嘅生活，又有啲咩問題？我想展現自己最完美嘅一面，做作啲又有錯咩？我天生無咩優點，有嘅就只有樣同身材，我只不過想展現自己最靚嘅一面出嚟啫，點解咁樣都會被人恥笑，被人話係雞！我唔明白呀！」
「我唔係呢個意思，我明白妳所表達嘅事情，我亦唔覺得妳做嘅嘢係十惡不赦。」
「既然係咁，點解呢個重係我應得嘅下場？」
「因為妳無真心對待過妳身邊嘅人。妳收兵只係利用緊自己嘅美貌去搵人著數，妳係踐踏緊人哋對妳嘅愛意，享受緊呢種虛榮嘅愛慕。我明白呢個世界係現實，美女配野獸只係童話，同妳拖手嘅唔係內在美而係披著外貌嘅人，但無論靚仔毒撚都好，佢哋都係同樣有住一顆心嘅人，並無分尊卑，妳唔應該踐踏他人嘅心。」雖然我呢番話係責罵緊阿Yan，但我嘗試用最柔和嘅語氣同佢講。
「妳為咗有個更有錢，外型更討好嘅男朋友，而飛起一直愛著妳嘅人，妳覺得咁樣做只係想為自己搵個條件更好嘅另一半，但咁樣嘅話只會變得本末倒置，妳唔係真心愛著一個人，妳只係愛著對方嘅金錢同外貌，而被妳飛起嘅男生，佢對妳付出過嘅真心卻被妳拋棄。
重有為咗展現完美而變得做作，已經唔係真實地去展現自己最真嘅一面。妳做嘅事通通無問題，甚至係人之常情，但妳做咁多事情同時，妳有無考慮到妳係咪真係真心對待人？如果妳唔係真心對待人，妳又有咩資格要求人哋真心對待妳？」
阿Yan眼神變得空洞望住我。
「你即係話……所有嘢都係我自作自受，如果我唔係咁樣嘅話，就唔會有咁嘅結果……？」
「我意思唔係話妳自作自受，我亦唔認為妳係應該獲得呢個收場。只係如果妳願意付出真心去對待人，未必個個人都會以相同嘅心回報妳，但妳一定會得到人哋嘅真心對待。」
「咩真心……通通狗屁一通！收兵，拜金，做作……呢一切嘅事情……就算喺好多人眼中係唔應該又點？你唔明白……我只能夠用呢種方式去滿足自己嘅慾望，用虛榮用物質去滿足自己，去生活落去呀！」阿Yan流下不甘嘅淚水。
「但人生只有一次，與其要個虛假而榮耀嘅生活，我會選擇與人真心相處嘅生活，咁嘅話妳會活得坦誠得多，而且妳會得到人哋真心嘅對待。」
「你即係話……我一直以嚟都係錯？如果我唔係啲咁嘅人，我身邊嘅人就唔會咁虛偽咁對我……」阿Yan望住前方走廊嘅同學，「或者呢刻會有人支持住我，企喺我身邊……係咪？」
「我唔會話妳錯，至少好似妳咁靚嘅女仔，想展示自己嘅容貌，影啲性感嘅相po上ig係人之常情，至於咩p圖p到成副裝甲咁，女仔嘅話當然想自己靚啲㗎啦！」
「係呀……哈哈……」阿Yan低下頭，「我明白喇……一切都係自作孽，先會得到咁嘅收場……」
其實，呢個收場嘅責任不完全在於阿Yan，至少我認為眼前呢班虛偽嘅「同學」有大部份責任。
「我……由頭到尾都無得到人哋嘅愛……」一滴滴眼淚沿阿Yan嘅臉頰滴落地上，「我做人真係做到好失敗呀……！」
望住阿Yan咁傷心，我心裡面又感到些少悔疚，我會唔會將說話講得太重？
但如果唔咁講嘅話，阿Yan唔會意識到問題嘅真正所在。
可憐之人必有可恨之處，當然好似Cathy同阿立咁係例外。
「妳嘅同學唔愛妳，唔代表無人愛妳，人存活於世上，一定被人愛著，至少妳重有妳嘅家人。」
「我屋企人……」阿Yan抹去臉上嘅眼淚，「由細到大佢哋都唔點理我，就好似唔係我父母一樣。」
「佢哋唔識表達對妳嘅愛意啫……」
「夠啦！」阿Yan大叫喝停我，然後企起身講：「我好清楚無人愛我呢件事，你唔使再安慰我。」
我嘅話語似乎令阿Yan鑽咗牛角尖。
如果阿Yan嘅父母都唔愛佢，咁呢個世界上就無人愛佢。
無人愛嘅人，到底重算唔算真真正正咁生存過？
「喂。」阿Yan轉過身，面向住我，「你係咪想知道Cathy嘅事情？」