【自殺之後，我遇見死神小姐】救贖七個自殺者的故事: Case 6 得到惡報的扭曲之人—(33)
死神小姐留下意義不明嘅話，就喺我眼前消失。
本以為一場簡單嘅救贖任務，愈來愈籠上更多嘅霧霾。無論係小妹妹、時間無多、定係「頭七」，我都唔明白係咩一回事。
但死神小姐講得啱，我唔需要諗咁多，因為終點已經喺我眼前，只要我將最後嘅兩個救贖者拯救，我就可以取回我嘅記憶，得到真相。
死神小姐消失前留下嘅一句話，令我感到不安。呢句話彷彿同緊我講，我無可能救贖到今次嘅自殺者。
我依照死神小姐，帶同小妹妹一齊前往第六個自殺者嘅地點。
嗰個地方，我曾經去過。
我哋到達一間中學嘅門前。
「呢度……我哋幫狗狗尋人嗰陣，唔係曾經嚟過呢間學校咩？」
「係，狗狗想搵嘅人就係讀呢間學校。」
事情實在太巧妙，巧妙得令人懷疑……一切都係整定。如果我嘅假設無錯，所有事情，包括七個自殺者同小妹妹，都係死神小姐一早安排好。
今次嘅校舍大門閂埋咗，可能係因為上課時間，並唔可以好似上次咁容易進入學校。
兩邊校門都有校工守住，我無意衝破校工防線，直接搵一個隱蔽而無人嘅位置爬入學校，再兜返去校舍裡面。
我跟隨住將我牽引嘅吸引力，沿住樓梯一層一層上去，直到最頂層一道生鏽嘅大門前。
「我感覺到第六個自殺者就喺門後。」
我輕輕拉開封塵已久嘅門鎖，慢慢將大門推開。
嗞——
一道金屬磨擦嘅刺耳聲響起，令我不禁雞皮疙瘩。
白光映入我眼中，我眼前係一片廣闊嘅地版，係學校嘅天台。
我慢慢行出去，周圍盡是水管同排風機，喺我前方接近天台嘅邊緣，有個身穿校服，紮住一道波浪曲髮馬尾，有著一雙纖幼長腿嘅少女企喺天台邊緣。
我只能望見佢背影，望唔到佢嘅外貌，但我從佢嘅背影就感覺到，眼前呢個少女係一位大美人。
佢好似察覺到我，轉過身望向我。眼前嘅少女有著明亮動人嘅大眼睛，白哲得通透無瑕嘅皮膚，高挺嘅鼻子，粉嫩嘅小嘴，重有線條優美嘅身材，簡直就同模特兒一樣。
不過，如果話美中不足嘅話，就係佢用長長嘅瀏海將左半邊臉幾乎遮住，連佢左眼都見唔到，但縱使如此從剩低嘅輪廓就睇得出，佢嘅臉貌係無瑕可擊。
如果話Cathy係鄰家女孩，佢就係女神類型嘅少女，兩者雖然都靚，但Cathy係屬於平民女孩嘅漂亮，而眼前呢位少女就好似真正嘅模特兒一樣。
我同少女嘅視線對上，但似乎佢唔知我可以望見佢，只係眼碌碌咁望住我。
我行到少女幾米面前停下。
「Hello！」我同佢打招呼。
少女對我突如其來嘅招呼露出驚訝嘅模樣，「Hi……？」
「我哋係嚟幫妳完成最後心願嘅人。」
「吓？最後心願？」少女對我嘅言語感到疑惑。
「係，妳已經自殺死去，但作為自殺者嘅妳會陷入自殺輪迴，每日重覆住自己自殺嘅情景，而我就係嚟幫妳完成最後嘅人願，令妳可以安詳咁離開世界。」
「你係咩人？點解你會見到我？」少女瞇起眼睛問，「呢間學校，無論係老師或者學生，校工定路人，全部都見唔到我，點解你可以見到我？」
「我係嚟幫妳完成心願嘅人，妳可以當我係幫鬼魂超渡嘅人。」我再次臨時作咗個大話。
「超渡……咁你係嚟超渡我嘅？」少女眉頭一動，似乎感到興趣，「我係咪可以盡早去投胎，重新做人？」
少女問咗一條連我都唔清楚嘅問題，呢條問題睇嚟要問死神小姐先會知。
「我都唔肯定超渡之後係咪可以即刻投胎，但唔超渡嘅話，妳嘅靈魂永遠都會困喺度，每日不停重覆自殺。」
「哦。」少女態度十分冷淡。
「所以我係嚟幫妳，妳心底裡有無啲咩願望係想去達成？」
「我無任何心願。」少女一口堅決地講。
「妳話妳無任何心願？」我呆望住佢，嘗試重覆提問，希望係佢聽錯，或者我講錯。
「係，我無任何事情想做，你唔使幫我完成心願。」
我第一次遇到自殺者係心中無願望，呢個困境令我不知所措。
「妳講真？難道妳無任何事情想做？或者想見任何人？例如妳嘅好朋友，妳嘅屋企人？又或者過往曾經留下遺憾，妳想去修補返佢？」
但換嚟嘅依然係同一答案。
「我都話無！我對呢個世界上任何事情一啲都唔留戀！」少女甚至用唔耐煩嘅語氣道，「既然我無心願嘅話，你係咪可以快啲將我超渡？呢個地方，我留喺度多一秒我都覺得嘔心。」
睇嚟直接問佢係唔會得出答案。
既然無法問出佢嘅心願，咁唯有退求其次，問另一條問題。
「咁點解妳會自殺？」
「點解要話畀你知？」少女態度惡劣地回答。
啱啱單係問少女嘅心願，佢已經變得唔耐煩，加埋佢態度又惡劣，如果講話「為咗幫妳瞭解妳有啲咩放唔低嘅話」，佢一定會更加唔耐煩嘅語氣回答。
「我係嚟幫妳，所以我想知點解妳會自殺。」
「吓？知道咗又有咩用？你可以幫得到我啲咩？」雖然少女嘅容貌十分姣好，但佢嘅態度卻令人十分生厭。
「並唔係幫唔幫得啲咩嘅問題，即使聽完妳嘅自殺理由之後，我都未必幫得到妳做任何嘢，但如果妳唔講嘅話，我一定幫唔到妳。」
「你咁多事做咩？既然你係嚟幫我，你直接將我超渡就夠啦！我嘅事你無必要幫我。」
「如果妳唔話畀我知嘅話，我係幫唔到妳超渡。」
少女聽完之後皺起眉頭，猶豫咗一下，然後問：
「你……意思係如果我將我嘅自殺理由講畀你知，你就會幫我？」
「嗯。」睇嚟用呢個方法可以令佢快啲吐出自殺緣由。
「好吧！如果你想知我嘅自殺原因嘅話，你行過嚟，我就話畀你知。」少女忽然變得順攤。
我逐步逐步行近少女，少女原地不動望住我。
當我差唔多行到少女面前時，少女忽然後退咗步。
「妳做咩又向後退？」我疑問。
「你過嚟咪知。」少女微笑道。
我同少女之間嘅距離逐漸縮短，而我亦可以近距離觀賞到佢嘅輪廓與面貌，的而且確十分迷人，恰到好處嘅五管再加上秀麗嘅雙眸，好難令人將視線從佢嘅臉上移開。
但係，我對佢感到一股厭惡感。
當我行到同少女面對面嘅時侯，少女嘅雙手突然攬住我條頸，我哋之間嘅臉相近不夠五厘米。
「你做咩？」我問。
少女雙手好似有啲郁動，之後佢皺起眉頭，斜視住其中一隻手。
但好快佢放鬆返佢嘅眉頭，然後雙眼緊緊望實我，吐出淡淡嘅香氣。
「再退後多一步，我就同你講點解。」
我承認，我被佢嘅容貌吸引住，而且為咗得知佢嘅自殺原因，我毫無思索就順應佢嘅意思。
結果——
我一步踏空，失去平衡，然後失足從天台跌下！
我嘅視線被佢嘅臉容遮住，再加上我不知不覺被佢引導過去，完全無諗過自己企喺天台邊緣！
弊傢伙！
臨跌落去嘅一刻，我見到少女嘅嘴角稍微向上翹……
以及佢得逞嘅眼神。