【自殺之後，我遇見死神小姐】救贖七個自殺者的故事: Case 5 拋棄兒女的母親—(28)

我無法望見呢刻Stephanie嘅面容，但我感到一股寒氣嘅逼近，令我不寒而慄。

甚至我猜測到此時此Stephanie掛起嘅表情。

「所以妳決定拋棄妳嘅子女？」

自救贖Cathy之後，我明白到自殺者嘅背後往往都有段悲慘嘅經歷，所以佢哋先會自殺。正因如此，每當面對下一個自殺者時，我都會不自覺地產生出憐憫嘅情緒。

但我懷疑緊我將呢種情緒放喺Stephanie身上是否適合。





佢無勇氣為佢嘅仔女抵受前夫嘅虐打，我明白。

就算佢無盡到母親嘅責任，佢愛佢對仔女，我從佢嘅一言一語聽得出。

既然妳愛妳對仔女，無論發生咩事都好，妳都應該要陪伴佢哋。

點解，妳可以咁狠心扔低佢哋？

「你可以想像到，喺最絕望、最絕望嘅困境中，見到眼前有個機會可以捉住希望時，會有啲咩情緒？」





我無回答Stephanie嘅問題，由佢講落去。

「我嘅人生，自從父母決定咗我嘅婚事後，就變得不幸。身處喺一個家暴嘅家庭中，向人求救但無人理會，呢一切我根本無得選擇！我唔想選擇個咁嘅人生，但我無得揀！到嗰刻，上天終於畀咗個機會我，只要我願意付出代價，就可以脫離嗰個被人選擇嘅人生，得到我自己真正想要嘅人生！

既然係咁，只要我將以往嘅一切抹去，包括我對仔女，然後重新嚟過，重新組織家庭，再次生兒育女就得喇！你可以明白嗎……你可以明白嗎……！」

「我並唔明白，就算眼前嘅希望有幾大，都唔應該拋棄自己嘅兒女。如果我係妳，我並唔會拋棄佢哋，因為佢哋就係我嘅全部。」

妳能感受到嗎？Stephanie，只有眼前有想守護嘅對像，佢就可以成為妳嘅全部。





有種情緒從我心底而發。

我拖實小妹妹嘅手，望住Stephanie。

但出乎意料地，Stephanie收起咗個股獰厲嘅情緒，反而流露出慚悔嘅語氣。

「我明白……我明白我做嘅抉擇係有幾咁自私，係有幾咁錯，但就算係咁，我都無法控制自己！你明白嗎……你明唔明白……」

Stephanie轉過身，捉住我雙臂，我都被佢突然嘅反應嚇親。

佢雙眼充滿住淚水地講：

「千辛萬苦得到嘅希望，能令我有多麼瘋狂！」









望住從雙眼滴落嚟嘅眼淚，我明白呢個係Stephanie最徹底嘅真心話。

我所指嘅真心話唔係單指字面上嘅意思，而係佢背後流露嘅情緒，以及對命運愚弄自己嘅不甘。

陷入如此絕望嘅人，可以有多麼瘋狂嗎？

我唔知，我無感受過。

我對Stephanie嘅不滿，從頭到尾都係以我心中認為一個母親嘅責任而定。

但係，我始終無法明白，Stephanie經歷過絕望係去到咩地步。





「對唔住……我太激動……」Stephanie放開雙手，後退兩步，抹去眼淚。

「唔緊要。」

我聽咗Stephanie真心話後，開始無咁對佢反感。

而且我由佢嘅情緒波動，感覺到佢有啲唔妥。

「最後妳拋棄妳嘅子女，嫁咗畀妳現任丈夫，開始咗妳嘅新生活？」

「嗯。」Stephanie整理返好儀態，「我現任丈夫都算有勢力，就算我前夫想搶返我走，都無可奈何，我父母知道我現任丈夫嘅背景後，亦無奈地答應呢頭婚事。分居兩年後，我終於成功離婚，嫁畀我現任丈夫，脫離曾經折磨到我痛苦不堪嘅魔掌，開始我嘅第二輪人生。」

Stephanie露出安穩嘅笑容。

「呢個就係妳過往嘅經歷？」





「係。」

「但當年妳都狠下心腸拋棄妳嘅兒女，點解事到如今妳因為妳對兒女而自殺？」

雖然Stephanie未講到佢嘅自殺原因，但我都略懂一二。

過往嘅經歷中，唯一放唔低嘅，就只有佢對兒女。

「開始咗我第二輪人生之後，我逼自己忘記佢哋，而我亦成功慢慢咁令自己忘記，著眼於眼前事物。無諗過事隔咁多年，我會再一次重新遇上佢哋……」Stephanie無奈地苦笑著。