【自殺之後，我遇見死神小姐】救贖七個自殺者的故事: Case 3 破碎家庭的父親—(15)
警署門口。
中年男人俾我嘅說話打動到，但佢未完全立定決心。
「我想要多少少時間考慮……」
我講咗咁多番話後，佢都需要時間考慮，既然佢都講到呢個地步，我無謂繼續強迫佢。
佢重希望我幫手搵下佢筆錢，睇有無機會搵返嚟。即使明白到金錢只係一種手段，呢筆錢係佢花費十多年所賺返嚟，佢對筆錢仍然有份執著。無論點講都好，佢都重想要返筆錢。
作為救贖佢嘅人，自然要幫手做呢件苦差。
由於無法用中年男人嘅身份去報案，所以我訛稱我係被害人。入到報案室，寫咗報案紙，經一輪查問後，就離開警署。
不過睇來搵到嘅機會好渺茫，只係提供到時間地點同車線，以及失竊嘅袋嘅外形，連車牌號碼都唔知，由警察態度散漫睇得出難以搵得返。
報完案後，就只有等消息，大概等幾日，無消息就再作打算。
今日處理完阿立嘅案件，然後遇見野鬼小妹妹，跟住重要浸親，真係精疲力倦。而家除咗等消息，就無其他嘢做，當然就醫飽個肚後好好休息一番。
中年男人緊隨我身後，到而家我都未知佢叫咩名。
「大叔，我應該點稱呼你？」
「叫我達叔就得。」
「達叔……我係……」正當我想介紹返自己時，我先記起我唔記得自己係咩人。
好似次次都係咁樣出醜。
達叔見我無講落去，於是問：「細佬，其實你係咪嗰啲天生陰陽眼，專幫遊魂野鬼超渡嘅神人呀？」
估唔到達叔完美地幫我作咗個解釋。
「啊啊……算係啦。」
「我估呢個世界上真係有鬼嘅話，一定有好似你咁嘅人存在。」達叔笑說。
你梗係知啦，因為你咪就係鬼囉！
之後我同達叔傾咗唔少計，大概都係問我嘅幾大，讀書定工作，有無拍拖呢啲基本個人問題，然後再問咗我一啲關於靈媒同遊魂野鬼問題，我全部都係靠鳩噏當秘笈，佢聽完我嘅回答多數都係「係呀係呀……」咁樣帶過，睇嚟我都幾成功呃過佢。
每次救贖人，我都有唔同嘅身份。天使真係天馬行空，係得Cathy先願意去信，引導者又係個意義不明嘅身份，我諗應該同菩薩分別唔大。呢次比較好，係個比較現實嘅身份，同時代表我係個普通人。
食完飯後，我同達叔就返去酒店。
行到酒店門口時，達叔問：「你去邊呀？唔係返屋企咩？」
我已經訛稱自己係個靈媒，喺達叔眼中我都係個普通人，總唔可以話自己連自己屋企都唔知咁奇怪。
我又作咗個大話：「我被我阿媽趕咗出嚟，佢話我成日掛住搞呢啲神鬼嘅嘢，不務正業，所以就趕我出家門。」
「哦，一係你嚟我屋企住先？反正我屋企得我一個人，而家我死咗就剩低間空屋。」
「但我點入你屋企？你又死咗，我又無你屋企鎖匙。」
「有辦法嘅。」達叔親切笑咗笑。
達叔帶我去到佢屋企。佢屋企係公屋。上到去後，達叔教我用萬字夾去開佢屋企門，最初完全一竅不通，重被隔籬屋以為我係賊，差少少就報警拉我走。搞咗幾個字終於開到大閘，再過多兩個字就開埋大門，入到達叔屋企。
「話時話，達叔，你竟然識啲咁邪惡嘅技能嘅？」
「我為咗賺錢，做過好多唔同嘅工，大大小小技能都識返啲咁，不過我從來無拎嚟做過犯法嘢。」
達叔屋企擺設簡潔，客廳只有一張梳化，一部電視同一個木櫃，重有張摺檯，用嘅時候可以打開。睡房就一張床同一張書檯，至於廚房同廁所更唔使講。
我打算去梳洗，但醒覺已經有兩日無換內衣褲，雖然達叔話借佢啲衫畀我，但我覺得共用底褲嘅感覺就好似我同佢貼埋一齊咁，所以我落咗去買底褲，至於衫褲就借住達叔嘅著。
梳洗後我瞓低落床，雖然個人十分疲倦同眼睏，但今日嘅事喺我腦海中揮之不去。
目前我做嘅係暫時等達叔筆錢嘅消息，但我醒起死神小姐講過我時日無多，再唔快啲就會發生無可挽救嘅事。
我……而家重剩低幾多嘅時間？我應該無了期咁等筆錢消息，定盡快幫達叔搵佢老婆？
死神小姐指嘅無可挽救嘅事又係指咩嘢？
諗起今日嘅事情，小妹妹嘅模樣又浮現於我眼前，佢到底係一個咩人嚟，點解會喺街到四處飄泊……
唔知佢而家點呢？
我仍然記掛住小妹妹，佢無辜嘅神情一直喺我腦海中揮之不去，罪惡感依然困擾我嘅心。
其實……我扔低小妹妹，其實係一件錯嘅事情？
瑣事纏繞住我嘅大腦，令我唔可以好好放鬆入睡。
我側住頭，望向窗外高聳入雲嘅大樓，以及掛喺天上嘅明月。
「細佬呀……」達叔突然開口叫我。
「嗯？」
「人一生點都會做錯事，可能係好嚴重嘅事，亦可能係小事，最緊要係識得道歉，然後改過。唔好好似我咁，錯完之後連道歉嘅勇氣都無。我諗你阿媽都係關心你，唔想你嘥哂時間落呢啲神怪嘅事，先趕你出家門。你哋點都係母子，你幫完我之後就返屋企，好好同阿媽道歉，唔係一旦關係破裂就難以再修復㗎啦。」達叔用慈祥嘅語氣道。
我呆咗呆，然後答：「嗯……我會。」
達叔重糾結喺我作出來嘅大話，搞到我都有啲內疚，但同佢再解釋過又太麻煩，所以就扮作會聽佢話咁。
況且，明明佢係我說教嘅對象，自己都未立定決心道歉，依家變返佢話返我轉頭，真係無說服力。
不過，雖然我被媽媽趕出屋企係作出來，但聽到「做錯事後要識改過」，心裡就有股油然而生嘅感覺。
唔知點解有種悔疚感從心而發，就好似，我曾經做過無可挽救嘅事。
唔知基於我扔低小妹妹呢件事，定係……其他事情。
望住漆黑嘅天空，眼皮漸漸垂落嚟，然後進入夢鄉。
白光刺進我眼簾中，我打開眼睛，太陽已經高高掛喺天空上。我望向時鐘，原來已經晏晝一點幾，我足足瞓咗十二個鐘。
我起身行到出廳，見達叔瞓喺梳化上閉目養神，我唔知鬼有無瞓覺呢個生理需求，但就精神需求來講，當一個人精神疲倦或者完全無嘢做時，瞓覺係最佳良伴，至少可以唔使煩惱其他事情，安然地渡過一段時間。
梳洗換衫後，留低達叔一個，落街食飯。食完之後，今日我就化身為偵探，去幫達叔去搵一搵筆錢嘅消息。
我先去到當日達叔上車位置，查問乘客有關資訊，之後又搭咗幾程車，同樣向車上乘客查問資訊，但毫無收獲。之後巴士總站到詢問巴士司機該日車次資訊，佢哋一概不知，佢哋叫我去問警察睇紅綠燈嘅閉路電視。我又去咗警署到問，但警察話佢哋查過閉路電視，並無特別發現，或者佢哋根本無心幫我哋查。
結果用咗一個晏晝，遊咗一大輪花園，依然一無所獲。
接近晚間時份，我喺大街上行走，諗住隨便搵間餐廳醫肚。
我行到某間餐廳門前，舉起一隻手指，向門口嘅侍應道：「一個，唔該。」
正當我打算入餐廳時，我見到一個熟悉嘅身影喺我前方。
一個嬌小的長髮身影喺我前方十米遠處，
係小妹妹。
小妹妹就喺我面前行過。
一望到小妹妹，心裡歉疚嘅念頭再次浮現，我應唔應該上前追小妹妹……？
尋日我以任務為由拒絕咗佢嘅請求，但其實……我心裡面一直都掛住佢同擔心佢。
小妹妹轉入小巷，消失喺我眼前。
「先生，呢邊呀。」
侍應親切嘅聲音傳入耳中，但我無理會佢，因為我決定咗要上前追小妹妹。
直覺話畀我知，我應該要咁做。