我的問題﹐你的答案: 二

洛峰出道既前一日，小璃收到由洛峰寄黎既包裹，雖然學校係轉左，但小璃依然住響舊址，因為佢唔希望洛峰有一日上門但摸門釘或者寄失信，所以寧願一早起身出門口都唔搬屋。

包裹有兩隻簽名既專輯，簽既唔係佢既藝名gloss，而係洛峰兩隻字，兩隻碟除左歌曲相同之外，其他都有好大既分別，最吸引小璃既係當中編號1既會員卡。
於是小璃上網一查，發現自己手上面既係限量版，全球得8隻。
「連限量數目都係峰鍾意既數字。」小璃自言自語感嘆起。
小璃一邊聽住洛峰既歌，理解佢既「辛酸」，一邊睇關於佢既新聞。
第一次搜尋佢既名字，好多新聞都話佢係大勢新人，未出道已經吸引一大班fans，「距離...比未認識你前，還要遠。」
以前「遠」對小璃既概念只係班房位置，成績...同心既距離，但相識以後，所有都開始變近。但偏偏響關係漸漸密切既時間卻換黎更遠既距離。
小璃坐響電腦前面呆想，諗左好耐，最後仲伏響電腦枱瞓著左。





到醒既時候，電腦熒幕亦然亮起光度，CD停止播放，窗外都拆射出陽光，竟然一瞓瞓到第二朝。返學既時間又到。

「小璃！你有冇聽gloss既新歌？」轉校之後小璃第一個認識既朋友，唐心緣挽起佢手行。
「嗯。」小璃牽起笑容。一個從未展露過既虛假既笑容。
「gloss把聲真係好好聽，個人又型。」心緣一臉犯花痴既樣子，小璃就一直笑同回答佢。
班上面既人都響到討論同一個話題，就係洛峰。
就算男女都響到講，因為洛峰以一個香港既身份響外國出道。

距離又拉遠。
小璃不安，低落。





「喂？」小璃接過突如其來既電話，慶幸學校可以使用電話，光明正大。
「你收到我寄俾你隻碟呀嘛？」電話係黎自同學一直討論既gloss洛峰。
「嗯。」佢簡單回答，沒任何音調。
「...你小心身體啦。」卻被洛峰誤會係唔舒服。
「嗯...」聽到佢把聲，失落感好似倒水般倒進心頭，好難過。
「你果面咁嘈既？」洛峰希望以電話令兩個人既關係保持密切，但佢冇諗過小璃既心已經開始退後。
「討論緊你。」小璃托起頭，若有所思。
「咁出名呀。」洛峰笑語。
「洛峰，我...係咪要繼續等你？」小璃淡淡講出心中果一句說話。




洛峰硬起笑容，腦袋變得一片空白，令佢步伐停留響路中心。
「嗯？」小璃發出疑問既音調，希望洛峰會盡快俾到答案。
「你...呢句說話係咪有咩含意？」洛峰皺著眉頭，手不自控收緊電話。
「嗯。」洛峰第一次感受到外冷內熱既梁采璃內外都變得冰冷「你應該好忙架啦，再見。」小璃未有等洛峰講再見就收線。

洛峰聽到冰冷而有節奏既電子機械聲，緩緩放低電話，熒幕上既桌面牆紙無情地投入佢雙眼，相片既男子搭住女孩膊頭，女孩企響男孩旁邊顯然細小，有種被保護既感覺，兩人亦笑得十分燦爛。

轉眼原來已經離開小璃一年多，呢一年黎，洛峰辛辛苦苦去訓練，當快要支持唔住就會諗起小璃，當諗到佢既笑容，洛峰就會更有動力。
而洛峰一直努力，唔止係為自己既夢想咁簡單，而係為佢地兩個既未來。
偏偏響佢成功既時間，小璃既一句說話，將佢有頂峰推到地上。
洛峰個心好亂，雖然節目都做到應有既水準，但面部表情彊硬，就好似有說不完既心事一樣。

「采璃，你冇事嘛？」坐響小璃前面既周永軒問，其實明眼人都睇得出周永軒鍾意小璃，只係小璃一直都唔知。
小璃搖搖頭，就攞起書包離開班房，心緣想阻止都阻止唔到。
滿是負面情緒既小璃去到學校既後花園，拎出由洛峰離開就一直陪伴佢既加紙畫簿，並且戴起耳機，聽住隨機播放既音樂一邊畫畫。




小璃堅持每一日就算幾攰，都會畫一幅畫，希望等到洛峰返黎既時候，可以俾佢知道自己過成點。
滿腦都係洛峰既佢，抬手就勾畫線條，竟然畫下畫下﹐又係佢日夜掛念著既男人。
一首悅耳既旋律從耳機傳出，小璃開啟電話既音樂列。洛峰？佢既歌上左熱門？
「呢首好似唔係佢既主打黎架喎。」小璃心想。
「To my lovely girl.I hope you never cry.」第一句歌詞傳入小璃既耳窩。
小璃諗返五年前，
喊到兩眼通紅既自己因為洛峰既一句，「我第一次見過咁可愛既女仔，我唔鍾意你喊，我會一直保護你，所以你唔好再喊。」
一句又一句既歌詞，唱出佢既心意。唱出屬於佢地兩個既故事。
原來呢個男仔第一眼已經喜歡上自己。
原來呢個男仔去外國，係為左大家既將來。
原來呢個男仔個心一直靠近，但自己卻一直退後。
小璃既眼淚滴左響畫簿上面，洛峰明明好努力工作，但自己就因為一時轉牛角尖，就發佢小脾氣，淚珠因為自責已急遽流出。佢攞出電話，迅速打出洛峰既電話。
「你所打既電話...」竟然唔通？！
小璃再一次撥打。同樣既聲音。