［回憶］［校園］一個信息改變左我嘅中學生活: 續。結局篇(五十一)重返

    我好唔清醒咁坐係肥培架車,我覺得好心酸. 點解兩個人都係同樣嘅出身,依家人地就著西裝坐靚車,我就要做粥店嘅待應仔,仲要連女朋友都無埋啊!自負嘅心態令我情緒變到好唔穩定,我忍唔住開左口同佢講:肥培,其實我.....    
係我未講哂嘅時侯佢就一下將我截住左,跟住講:得啦,我明架啦.之後就開左首好特別嘅歌比我聽,係我聽到前奏嘅時候都未有咩問題，但係去到佢唱出第一個句嘅時候，我就有落淚嘅沖動。
「朋友，我當你一世朋友」陳奕迅嘅最佳損友，令我係呢刻嘅難堪同埋憤怒去到一個極點。 點解你要比我聽首咁嘅歌啊？你明知我比朋友陷害，你仲要咁樣黎騸動我嘅情緒？我控制唔住自己嘅行為，大大聲咁鬧肥培。
明知到係佢係我落難嘅時候出黎營救我嘅人，但有意無意我都係對佢嘅心靈作出左損傷。肥培唔單止無理到我，返而仲將音樂較得更加大聲，我沉浸係呢個音樂世界二分鐘左右，我開始慢慢釋懷，感慨咁問左肥培一句：你覺得朋友係默默扶持你嘅人，定係令你成長嘅人？
一首歌，洗滌左我仇恨嘅心情，即使我比tommy陷害，但始終唔啱嘅都係我，怨天尤人根本就唔會對自己有幫助，呢一刻我最應該嘅係重新振作，再一次挽回阿心！
多謝你啊，肥培！唔係你嘅話可能呢一刻我已經跳左落海啦！我好輕鬆咁同佢講。聽完之後，肥培就繼續車我去佢想帶我去嘅地方。唔知到左呢個目的地之後，我會有咩改變？
我一直坐係後面諗，到低用咩方法我先可以挽回到阿心？同埋我用左一個女朋友黎換取嘅真相係點樣嘅呢？我攞出左我部電話，打開左網上嘅討論區，睇到第十個留言就解開哂佢嘅身世。
佢的而且確係阿妍，同我估嘅果然係一樣，咁即係佢隻耳環係咪即係同我嘅過去有關係？我繼續睇埋落去，入面所講嘅電話號碼同埋地址我都無哂印象，唯一令我最驚訝嘅係其中一欄度寫：前男朋友—林家銘。
我嚇到大叫左一聲，驚訝所造成嘅手震令我成部電話跌低左。肥培立即拎轉左頭問我發生左咩事，我順勢問佢一句：我之前同李穎妍有咩關係啊？佢沉默左幾秒，我用焦慮嘅語氣再問多佢一次，得返黎嘅就係到達目的地前持續嘅dead air.
靜寂左十分鐘，我比肥培帶左去一個陌生嘅地方，附近並無龐大嘅招牌，亦無五顏六色嘅燈光，只係得一個三層高嘅別墅兀立係呢個山頂。點解呢種感覺好似似曾相識？正當佢打開左門個一刻，入面豪華嘅傢私，令我腦入面嘅畫面開始變到真實，咁樣嘅別墅咪即係同阿心屋企一樣，咪即係同我打左佢阿爸一巴之後搶走阿心嘅畫面差唔多一樣？




點啊？個感覺係咪好熟啊？呢度就係當日你係阿心阿爸面前搶走佢個度啊，你仲記唔記得當時你講左乜啊？果陣差唔多全香港都識你地兩個人啊。肥培笑住咁講。
「你唔配做阿心嘅阿爸啊！」
「你有無理過你個女嘅感受啊？」
「你跟本就比唔到阿心佢想要嘅生活！」
呢幾句係我個腦入度重播嘅說話，比我感覺好似返左去幾個月之前，我當日講嘅野係咪太過份，導致有今日咁嘅報應？假如我揀返同佢阿爸維持一個好好嘅關係，然後我地兩個一齊讀大學，一齊係同一間公司做野咁唔係仲好咩？仲會有依家咁嘅誤會咩？唔通呢個世界只要一無錢，所以問題都會隨之而來？千千萬萬個問號出現，我迷茫嘅思緒不斷受到沖擊，我忍唔住之下，我沖埋去攬住左肥培，可能呢個行為好基，但呢個時候，我只係想拋開哂身上嘅煩惱。
我：「點解肥培你同我係一樣嘅出身，你就飛黃騰達，我就要係度靠你黎開解我。但點解你有辦法去到呢間屋嘅？」
其實阿心嘅阿爸本身就同我好熟，佢見自己個女出左咁嘅事，所以就搵我去幫佢解決，於是我就諗到帶你黎依度啦。肥培好認真咁解釋。
肥培： 好啦，唔好企係個門口，跟我上2樓，我比小小野你睇啊。 我無哂心機咁跟埋上去，但我連佢會比我睇咩我都無興趣了解，因為呢個時候我只係想大大聲咁喊一場，然後訓一覺之後所有野都回復正常。
明明我已經睇開左，轉左用積極嘅方式去諗，點解肥培你要帶我去呢度啊，到低個含意係咩啊？我邊行樓梯邊諗。
係到左2樓個陣，我地入左去一間有部投影機嘅房。肥培好快就將部電話同電腦連線，然後投影出一張合照同埋一段短片，而當中嘅人物就係我個阿妍一齊係班房度影同拍嘅。呢個畫面重新激嘅我嘅心，到低我同阿妍仲有幾多野我係唔知？點解當初我同佢會有呢段感情，但係我無哂所有記憶？




係肥培打算播條片嘅時候，我叫停左佢，痛苦咁拎出我部只有一條錄音嘅舊電話，擺左係佢面前，喊住咁講：咁講呢段野嘅人係咪都係阿妍？


對唔住咁多位讀者，因為早排我好多野要做，同埋文章都比較長，所以先遲左咁多出，希望你地唔好介意同埋繼續支持。