天使原來是男生（舊名：魯莽天使）[小甜][變身][男變女][籃球]: 81
~卜sir帶住我地搭巴士去到灣仔，我地去左老地方(小童群益會籃球場)做我地嘅最後訓練，
內容其實同平時差唔多，但係就對協思中學嘅球員做左一啲針對性嘅訓練。
卜sir同我地講，協思嘅球員無論係內線或者外圍，進攻能力都係爆哂標，
但係唯一嘅缺點就係後衛嘅防守能力都好一般，所以希望多啲利用我地嘅得分後衛或者小前鋒，
盡力打爆佢地嘅外圍防線...。
而家身為小前鋒嘅kimmy壓力就更加大啦，
卜sir對佢同小美委以重任，成唔成功就睇佢地啦。
練到差唔多四點鐘，我地就收拾心情咁跟住卜sir同程sir一步一步咁行過去修頓啦。
因為已經係放學時間，所以我地一班著住籃球衫嘅女仔，
沿途都吸引到唔小男學生嘅目光，唔知點解呢，比啲學生望住果陣...
我嘅壓力已經開始離啦...，如果一陣入到場館入面...我都真係唔敢想像啦。
行左十分鐘左右，我地終於都行到去修頓場館，我地最後嘅舞臺。
~…呼...啪....。~
場館入面原來已經離左唔小觀眾啦，而家人頭湧湧...
個個都七咀八舌咁...氣氛已經相當熱烈啦...。
我地跟住卜sir行到去場側邊嘅球員席度，放低哂隨身物品之後，
我地就開始拎住啲籃球拍吓波熱身啦。
周圍都有好多記者喺度影相，連體育世界都有離錄影添囉...。
「…你好呀...妹妹，可唔可以傾幾句呀?」又有個女記者行左埋離我度。
「...吓...哦...。」我拎返起個籃球應佢。
「…八號仔係周子欣同學呀呵...今日呢...你地嘅對手係四界冠軍嘅協思中學喎，
會唔會好大壓力架...有冇信心先?」記者隊左枝咪埋離囉...
而且仲有個攝影師揸住部機影住我...，唔係要上電視掛?.?
「…吓...冇壓力喎...，對住邊隊都係咁打架啦...，而且信心十足添。」
我戇居居咁答，大佬點都答有信心架啦...問埋啲廢問題嘅....。
「…哦...咁牙，但係對手被譽為(神之隊)喎...仲有幾個港青球員添，
真係一啲都唔驚?」記者繼續引導我講野。
「…係咩...唔清楚喎...嘻嘻。」快啲啦...問完未呀...好煩呀。
「...哦...咁好啦...唔該哂周同學。」記者覺得冇引咁走左去訪問第二個啦...yeah。
~…WU....bi...WU....~
喺我繼續拍波期間，場內突然一片歡呼喎。
我即刻望一望過去歡呼嘅沿頭，原來協思中學嘅隊員終於都離到啦，
而家浩浩蕩蕩咁行緊入場，觀眾席上面，協思中學嘅人都大聲高叫緊，
好似贏緊我地咁嘅樣。
本來訪問緊我地嘅體育記者即係衝左埋去協思嘅球員度啦，
因為我地嘅距離唔係太遠，所以我都勉強聽到佢地嘅對話。
「...hello，咁多位協思嘅同學，同你地做個訪問先，頭先我地訪問過對方嘅八號球員周子欣喎，
佢話對今日嘅比賽充滿信心...一 定會打贏你地喎，而且仲話唔多識你地添...你地點睇呢?」
搞錯呀...個記者斷章取義喺度譁眾取寵囉...!!!
「…哈哈...佢都好大口氣喎，我反而想知佢係邊個囉...，我地已經連續四年都未輸過啦，
今年亦都唔會例外。」協思其中一個同我一樣著住件八號波衫嘅球員好招搖咁回應，
講完之後仲望一望喺場中間拍緊波嘅我添。
「…....。」我即刻擰歪面若無其事咁行返埋我地果邊嘅籃框附近。
「…子欣...啱啱講野果個八號，就係協思嘅王牌球員張華倩啦，
佢同你對位都係打大前鋒，而且仲係上年嘅精英賽mvp得主添呀...
一陣子欣你要小心啲佢嘅三分呀，雖然佢有成米七高但係三分都真係唔差架。」檸檬行左埋離同我講，
之後檸檬再將逐個協思球員嘅優缺點分析比我地聽。
而家睇到同kimmy對位嘅十三號小前鋒都真係好q大隻囉...
檸檬唔講我仲以為係男仔離嘅添...應該比起男仔果陣嘅我更加大隻...
唉...點算呢...咁搞法kimmy會比人撞死架喎。
「…小欣...。」咦...嘻嘻...一軍到左啦，依家喺場邊叫我。
「...嘻嘻...咁早嘅?」我即刻走左埋去。
「…係呀...一放學我就飛的過離啦，泳琳同阿成都跟埋車，
而家喺觀眾席上面咋嘛。」一軍指一指觀眾席講。
「…嘻嘻...。」最衰有咁多人喺度吖，如果唔咪真係想攬住一軍。
~…bi....。~
雞聲響起，而家所有球員都返到埋場邊。
「...所有人快啲快啲埋離。」卜sir已經坐左喺度拎住塊戰術板啦。
「...加油呀...小欣。」一軍整左個勝利手勢比我。
「...嗯...。」我點一點頭之後就行左埋去卜sir度啦。
而家每一個人都打醒十二分精神咁聽緊卜sir講野...
一場腥風血雨嘅撕殺...半分鐘後就要開始啦。
「...拿...一陣開波，我地試吓主攻佢地嘅外線先，出面三隻盡量搓散佢地，
一有機會就放個三分冷戰...，kimmy可以試吓突破分球，防守方面就大三二，
因為佢地有幾隻神射手...絕對唔可以放三分...，所以內線就辛苦阿檸同子欣頂住啦。
「…係...!!!」我同檸檬一齊回應。
~...咇....bi....。~
球証嘅雞聲再一次響起...，代表比賽即將開始...。
「…好啦...。」卜sir伸左隻手出離，
於是我地所有人都伸左隻手壘上去。
「....~...我地係最強嘅...一....二...三!!!」
「....我地係最強嘅!!!!!!」卜sir數到三我地就一齊大叫。
「...好啦...子欣...阿檸...小田...小美...kimmy....，出場啦。」卜sir用堅定嘅眼神望住我地講，
於是我地五個正選就一字排開咁行出去啦...加油呀。