天使原來是男生（舊名：魯莽天使）[小甜][變身][男變女][籃球]: 77
~之後我就拉左一軍入我屋企啦，老豆依然係招牌動咁訓左喺梳化度，
好似仲未發現我琴晚走左出街咁，於是我叫一軍收埋對鞋靜靜雞咁鼠入去我間房，
而我呢...就真係要沖返個涼，換返件衫啦。
搞完一輪出返離之後，老豆已經起左身，睇離佢仲未發現到一軍喺度...嘻嘻。
「…咦...阿女，咁早起身沖涼嘅?」老豆坐左喺梳化度望一望我講。
「…er...嘻嘻...係...係呀。」我笑笑口咁一邊用毛巾抺頭一邊答老豆。
「…老豆約左傻仔去飲茶，之後打牌喎，阿女你落唔落去飲呀?」老豆輕描淡寫咁問我，
等我介紹吓先，傻仔呢...其實係老豆嘅一個朋友叫做屈家強，佢係我認識嘅人入面，
除左屈原之外，第二個姓屈嘅人啦。
佢同老豆係以前踢波識嘅，不過其實阿屈佢只係得廿零三十歲架咋...，
但係就唔知點解會同我老豆咁friend囉，而家老豆同佢係一齊喺福建做野嘅...
老豆當正佢係契仔咁濟架啦...有時我會覺得佢地嘅感情仲好過我依個親生仔添...，
不過咁都好嘅，而家冇左個仔都仲有個契仔吖....。
「…吓...唔洗啦...，老豆你地自己飲啦...嘻嘻。」我笑笑口咁答。
「...唔見吓強哥牙?」老豆單一單眼問我。
「...吓...老豆咪玩啦，強哥佢都唔知我搞成咁...點見姐。」我有小小緊張咁講。
「…容乜易姐，咪照舊話你係我個女啱啱喺台灣讀完書返離咪得囉...。」
老豆真係講大話講到上左癮咁囉。
「…點解老豆你咁想我去姐?」我有小小唔耐煩咁問。
「…er...我而家有個咁靚嘅女喎，緊係想show多啲比人睇吓架嘛。」老豆好自豪咁講。
「……吓...老豆呀。」我好無奈咁講。
「...離吖...陪老豆去一次啦，最多你食夠就可以隨時走啦。」
老豆楚楚可憐咁求我。
「…吖....怕左你啦...食完就走架啦。」唉...見老豆咁慘咁嘅樣，
再加上其實我而家都真係好肚餓咁...唯有應承佢啦。
於是我入返房同一軍講聲，叫佢喺度等我一陣，
之後我就跟左老豆落樓下酒樓啦。
去到酒樓...因為今日係年三十嘅關係，同琴日一樣係人頭湧湧嘅，
我跟住老豆衫尾穿過人群，終於行到入內廳嘅一張細枱度啦。
阿屈已經坐左喺度洗緊啲餐具...，而老豆就揮住手咁行埋去阿屈度。
「...喂...安哥...，時間啱啱好呀。」阿屈眼尾望一望老豆就繼續洗野啦。
「…喂...傻仔...洗多份吖。」老豆坐低左之後就同阿屈講。
「…做咩呀...你個仔落離牙?」阿屈望一望老豆講。
「…唔係呀...係我個女。」老豆繼續自豪mode講。
「…咪玩啦...識你咁耐都未聽過你有個女嘅...夜總會果啲牙。」
阿屈笑笑口咁喺度串緊老豆，可能依個就係佢地嘅溝通方式啦。
「…無離正經...，子欣埋離坐啦。」老豆話完阿屈之後就揮一揮手示意我坐埋去啦。
「………。」阿屈見到我之後，成個人呆哂，好似比人毒啞左咁。
「…er...我個女子欣，啱啱喺台灣讀完書返離，...阿女牙...
佢係我朋友叫阿強，叫叔叔啦。」老豆做樣咁為我地介紹。
「...咩野叔叔呀...，你好...叫我強哥得架啦...我廿幾歲未結婚架。」
阿屈而家好似食左興奮劑咁...，係咁同我單眼...。
「...er...強哥你好...，你對眼...冇咩事吖嘛?」我講。
「...哦...冇事，鍾意食啲咩呀...隨便叫啦...我請。」阿屈好似導遊上身咁，
幫我斟哂茶咁...又係咁喺我身邊介紹有啲咩好食喎，
好似當我真係唔知香港有啲咩食咁囉...，我唯有盡量配合啦...繼續扮傻。
食緊途中...老豆不斷講阿屈有啲咩野...好...有啲咩野掂咁，又話阿屈老豆喺大陸開廠...
好似好想拉埋我地咁，我就真係冇佢咁好氣啦，拿拿林食完野就拍拍囉友走人啦。
哈哈...唔好意思啦老豆，你嘅如意算盤打唔響啦。
之後我就緊係急急腳咁返屋企會我嘅情人啦...。
一返到去...一軍已經走左出聽度睇緊電視。
「...咦...小欣你返離啦，我仲以為你飲茶要飲好耐添。」一軍坐左喺梳化度講。
「…嘻嘻...掛住你咪快啲食完快啲走囉，你睇吓...
我仲買左你最鍾意食嘅回煱肉麵同凍奶茶比你添...。」我笑笑口咁舉一舉高袋早餐講。
「…嘩...小欣你好體貼呀...，我啱啱仲諗住自己煮個麵食你就買左比我啦...thank you!!!」
一軍好開心咁起左身，行埋離接過個早餐，之後我地就坐左埋飯枱果邊食啦。
一軍食緊果陣，我就坐住喺佢對面，雙手托住個頭咁望住一軍，
同一軍相處嘅時間真係好開心呀...。
「...小欣...做咩呆左咁望住我呀?」一軍一邊食一邊問我。
「...嘻嘻...因為我鍾意囉...傻佬。」我好開心咁答一軍，等一軍食完之後，
因為我而家都真係好眼訓嘅關係，所以就叫一軍佢陪我入房訓陣啦。
訓左上床之後，一軍好sweet咁喺我背脊攬住左我....。
「...一...軍。」我細細聲咁叫。
「...點呀...豬豬?」一軍喺我後面溫柔咁問。
「...講比我聽吖....琴日發生過嘅事。」我問一軍。
「...er...真係想知?」一軍欲言又止咁...好衰囉...。
「...你...話...呢...，係咪有啲咩唔比我知得吖???」我扮哂嬲咁講。
「…嘻嘻...邊係呢...，咁好啦...等我諗吓應該由邊度開始講呢。」一軍笑一笑之後講。
「…我...要...全...部!!!」我繼續扮惡。
「…哈哈...係啦係啦，件事應該由琴日訓醒講起嘅...，刷完牙...洗完面之後呢...，
我望一望個電話，突然發現到一個匿名whatapp喎，一個完全唔識嘅電話號碼，
咁我咪撳入去睇吓囉，點知一撳入去就寫住(如果唔想周子欣嘅秘密公開的話，
下午三時正，準時在你屋企樓下遊樂場出現...。)我當時真係好驚訝...，
唔知到底係邊個做，因為好驚小欣你會有事，所以我諗都冇諗就走左出去啦。」
「我未夠三點就到左，坐左喺側邊啲櫈度等...等左幾分鐘之後，alice就出現啦。
我當時都同你見到佢嘅反應一樣，好驚訝...alice明明係比人送左入精神病院架???點解...會係佢嘅...。
佢一開口就重覆返whatapp果番說話離要脅我，要我同你分手，
我緊係死都唔肯啦...同佢拉鋸左一陣之後，佢終於肯改變要求，
要我陪佢一晚就肯放過小欣你啦。」一軍憶述中。
「...你...你冇問清楚咩野秘密架咩???」我打斷左一軍。
「…er...因為當時好驚呀...個腦咩都諗唔到...，所以...咪...冇搞清楚囉。」一軍有啲唔好意思咁講。
「...er...咁之後呢?」我講。
「…之後alice就拉左我去陪佢行街啦，為左安撫佢，除左親密接觸之外，
我盡量都滿足佢嘅要求。」一軍繼續憶述。
「...喂...咩叫親密接觸先...。」我好緊張咁擰左個身過去面對面望住一軍講。
「…er...點講呢...。」一軍好尷尬咁講。
「…有...冇...kiss?」我繼續緊張。
「...緊...緊係冇啦...，連拖手都冇呀!!!」一軍好緊張咁答。
「…只...只係比佢翹住我咋。」一軍細細聲好怕比我鬧咁講。
「...哼...之後呢?」我繼續扮嬲。
「…er...之後咪陪佢返屋企食飯囉，佢又係好似上次咁，買哂啲心形牛扒返離整，
我咪全程坐左喺個廳度等囉。搞完一輪之後，alice就拎左啲野食行返出離，
點哂蠟燭咁...一邊鋸一邊餵我...。」一軍憶述。
「…er....。」我又打斷左一軍...，因為諗起alice餵一軍果個情景，
我真係打冷震囉...而且有小小嬲添。
「…做咩呀小欣?」一軍聽到我er一聲，所以問我。
「…冇野...繼續啦。」我黑住面咁答。
「…食完之後我就覺得好眼訓啦，個人神智不清咁...我懷疑係alice落左安眠藥落我杯野飲度囉，
咁之後我就不醒人事啦。到第二朝醒返，alice已經訓左喺我隔離，而且....。」一軍口窒窒咁停低左。