【我怕沒有這運氣】一個相戀十年的故事: 像樣

「太太…妳孫女跌親喎…」 
「小朋友跌親好閒既姐，佢Daddy Mammy平時就係太寵佢，跟住我就要堅強Ｄ架喇！」 
「我老豆o個代真係天生天養…冇病冇痛都算係咁，哈哈……」 
「我地o個個年代香港得o個少少人，人少Ｄ自然空氣又好Ｄ，我一個湊住六個都係咁湊！」 
「靚女妳Keep得咁好，又唔似一拖六喎！」 
「哈哈哈哈，後生仔你真係識講野！黎黎黎，送個火龍果俾你食！」 

「哎呀！著紅色衫o個個係你個仔呀？」 
「呃…係呀……。」 
「咁鬼似樣，真係唔怕走失呀，哈哈哈哈！」 




「係咩？真係似樣咩？」 
「似呀！成個餅印咁呀！個面形啦、對眼啦，最似係個下爬，成個蝦餃仔咁！」 
「尋晚kelly鬧得我好岩……」 
「下？」 
「哈，冇野。」

「哦，你話陳慧琳個蝦餃仔呀？佢個仔都得意，不過冇你o個個咁得意囉！」 
「哇……乜咁客氣呀，哈哈哈哈哈……」 
「你…太太應該都幾靚女個喎！」 
「唔…都唔錯架…高高瘦瘦…咁囉……」 




「真係好，Daddy Mammy都係靚仔靚女，佢第時一定好靚仔！」 
「哈哈哈哈哈……其實我第一次聽人講個仔似我…」 
「可能冇對比啦，我就咁睇你同你小朋友真係好似樣！」 
「我…我有相，俾妳睇下。」 

「哦，呢個就係佢Mammy喇？」 
「哈…係呀……」 
「好靚女喎！」 
「哈哈…係嘛……」 
「咁睇落去又真係幾似Mammy喎！」 




「唉…青篛笠，綠蓑衣，斜風細雨不須歸。」

鍾翹很喜歡到遊樂場玩耍……其實全宇宙的小孩子也喜歡。 
平日，嫲嫲會帶他來散步，不過她怕鍾翹會走失，每次也緊緊握著他的小手不放， 
所以他們是到遊樂場散步，而不是遊樂。 
媽媽常說：「你個仔咁得意，轉個頭就俾人偷咗喇！」 
所以，我每逢假期也會帶他到遊樂場來一場真正的遊樂。 

所需的物品比平時外出更多，除了他的出巡用品，還有那輛保時捷電動小車。 
有時候阿皮會過來跟我一起溜仔 (溜狗的變詞)， 
他很喜歡鍾翹，千里迢迢走來跟我湊仔，還每次買來一套新款童裝送他。 
可惜鍾翹看來不喜歡他。(我會把責任歸咎姜碧瑄一定閒來打他毒針所致。)

見阿皮的新款保時捷，就令我想起當年的青春烈火，所謂： 
昔年曾向五陵遊，子夜歌清月滿樓；銀燭樹前長似晝，露桃花裡不知秋； 




西園公子名無忌，南國佳人號莫愁；今日亂離俱是夢，夕陽唯見水東流……。 
公子已為人父，性格比從前沉靜，也比從前多顧慮， 
同為公子的皮叔卻依然年青。 
見鍾翹坐在小保時捷撞了牆要倒車向後時， 
一邊轉身向後望，一邊拿著呔盤轉動， 
阿皮見狀笑得捧腹：「你個仔學野真係快，話唔定第時會做賽車手！」我們在遊樂場一邊喝啤酒吃花生一邊看著鍾翹駕著保時捷，在滿佈小孩的路上穿插。 
鍾翹會把車駛過來，嘻嘻笑地指著我的啤酒樽，我就知他口渴要給他水。 
先替他抹一抹臉頰的汗水，再給他青島酒樽形狀的私家水樽。 
阿皮說：「唉，俾番人啦！費事人地以為你拐帶兒童。」 
他總是說孩子長得不像我，連我媽也說孩子長得像個姜碧瑄的複製娃娃。 
所以那位太太跟我說鍾翹長得像我的時候， 
我真有過超興奮的一片刻。 
直到樂極忘形的我把銀包裡的照片遞給她看， 
我真的相信，鍾翹是屬於姜碧瑄的。





「妳岩岩生完…邊有咁快落得床架娘娘…」 
「小言子快Ｄ扶我……我要落去睇個仔呀…」 
「唉唷…第時個仔跟足妳五十年呀，唔爭在o個一兩日啦！」 
「唔好啦……我好想睇下佢個樣呀……」 
「醫生會鬧我架…」 
「你惡過醫生啦！」 
「外母會打死我架！」 
「佢點敢打你呀！打死左你邊有人照顧我！」 
「妳奶奶黎到見唔到妳會好驚架！」 
「所以你快手Ｄ啦……」 
「唔好啦…」 
「老公呀……」


 「哎………ssss……」 




「拿！睇妳行兩步又痛一野……」 
「你個仔八磅幾呀…真係生死人……」 
「係喇係喇……唔好意思…Sorry！」 
「奶奶話你以前都七磅幾……」 
「係呀…然後佢好似你咁，怪落我度。」 
「乜唔係應該怪落老爺度既咩？」 
「係囉！我都唔明關我咩事……」 
「奶奶生你o個陣，得自己一個人，好淒涼…」 
「所以我今次打死都唔走囉……」 
「錫哂你，老公！哎……ssss…」

「D11…D11……」 
「應該係前面…」 
「到喇喎…」 
「哇…原來有咁多o靚仔出世架…」 




「唔好以為私家醫院就冇雙非先得架……」 
「咁佢地都非富則貴個喎！」 
「係架……」 
「邊個係呢……」 
「唔…」 
「鍾翹鍾翹，Daddy Mammy黎搵你呀，見到我地就笑一野啦！」 
「哈哈哈哈哈……哎…ssss……」 
「唔係叫妳笑呀！」 
「我搵到喇！」 
「唔？邊個？」 
「呢！」 
「吓？」 

「咪最似你o個個囉，Daddy。」