【我怕沒有這運氣】一個相戀十年的故事: 愛快147 GTA

「唔好帶漏野呀下！」
「一大袋喇，去野餐都唔使咁多野…」
「你知你個仔Ｄ野唔係去7-11就有得買架啦！帶漏左你就弊傢伙！」
「水樽…奶粉…奶樽…尿片…毛巾…餅乾…餐具…毛毯…濕紙巾…Barney…」
「Barney！Barney！Barney！Wow！Barney！」
「洗唔洗帶BB車呀？」
「帶啦！陣間佢眼瞓唔肯行，你抱住佢會好攰架！」
「我架車都唔會泊得遠啦…」
「唉唔係喇，我都係同你一齊去喇，陣間你湊到個仔呢咁Hea…」
「得啦…我OK喎…」

「仲有蕃薯乾呀！食完記得幫佢抹手呀！」
「佢會食到成車都係架……」
「好過佢喊丫！」
「咁又係………」
「小心揸車呀！記住用BB座呀！」
「佢個龍座從來都冇拆過出黎…」
「記住依時間湊個仔放學呀！唔好顧住行街唔記得哂Ｄ時間呀！」
「得喇得喇……我驚過您啦王太后…」
「放左學帶佢去廁所先，之後俾奶佢食，然後先好同佢去買衫！」
「哦知道知道…行喇我……」

「喂！仲有個防拐子佬器呀！」
「哈……」

左肩揹上姜碧瑄的奶粉袋，
左手拿著BB車，右手握著鍾翹的手，由家出發到停車場。
鍾翹特愛外出，他自懂走路以後，外出時就不喜歡手抱和坐BB車，
除了睏睡不願站著之外。

「ＶＶ…」

按響車子的電匙，
先敞開後車門，把鍾翹安放在他專用的BB椅，扣上安全帶，然後離開車廂，
走到車尾打開揭背式的車尾廂，把BB車和奶粉袋都放進去……
「嗚…嗚嗚……」以為鍾翹是怕我掉下他不管，
原來是忘了把那頭紫色恐龍遞給他……。
「其實呢隻野有乜咁過癮呀……？」
「Barney！Barney！Barney！Wow！Barney！」

開車離開停車場，出發到中環的學前遊戲班學校。
其實，我跟姜碧瑄一直反對當一對怪獸家長，
幹麼要花幾千元在這些學前班？
為那個180度無敵大海景？
為那些一應俱全的Flash Card？
為那些五官端好的女導師？

其實是姜碧瑄的媽媽硬要鍾翹上課，
外婆很疼這孫子，奈何日理萬機，連一秒也沒閒見，
就寄來一張支票，要求我們買他最好的襯衣、最高級的奶粉、最全面的幼兒保健，
和每星期至少帶鍾翹上一課play group……。
那張支票，足夠鍾翹一直上，上四年。

於是，我們無奈的接納要求。(而錢早就花光來買樓)

一個月只上四課，每課兩小時，要是把每堂的時間除開，
比我們每一個打工仔的時薪還要高。
花得這麼多，自然對課堂的效果有點要求，
才兩歲的孩子不懂告訴我有多好玩、學到有幾多，
我們大人自然會追問導師，我兒子怎樣、他跟同學怎樣，
問長又問短，要是孩子剛巧哭起來，導師們就慘了。
說到底，八百多元一課，我們自不然變成怪獸家長……是無可厚非。
想一想，那些導師根本不需要育兒才能，只需要交際手腕，
她們真正要面對的不是孩子們，
而是我們這班一個月花了幾千元的家長，
她們就像咸蛋超人，每天也要打怪獸，
我們其實也不想變成怪獸，
只因地球空氣污染太差，

簡直是萬劫不復的惡性循環。

送了鍾翹上課，就到附近茶餐廳吃一個早餐Ｂ，
四十元的沙爹牛肉湯意粉也真夠少，加一本車書，這餐早點就差不多一百元。
看到Alfa的新款跑車Romeo C8，想起以前的147 GTA，
火紅色車身、瀟灑的單門、五段棍波的浪漫，
跟皮叔的奧迪TTS有過一段頭文字D年華。
可惜結婚之後，女權當導，姜碧瑄和媽媽大力反對單門的浪蕩，
我像維權人士奮力抗爭，堅持浪漫不涉浪蕩之名，
直至姜碧瑄懷孕了，以動胎氣為名挾天子以令諸侯…

「鍾莫言你肯換車未呀！」
「做咩姐……都話除左妳之外未載過女咯…」

「公子哥兒先會揸單門車架乍！你婚都結埋仲響度扮單身！」
「冤枉呀大人！我冇呀……單門架車會實淨Ｄ輕身Ｄ之嘛，冇扮單身呀！」
「以前拍拖o個陣都仲可以俾你扮SKY哥哥，你就黎做爸爸喇，係咪應該踏實Ｄ呢？」
「咁鍾太，點先為之踏實Ｄ呢請問？」
「唔……要揸敞門o個Ｄ車！」
「吓？！咁即係趕絕我既姐…俾條生路我行下好喎！」
「奶奶上落又方便Ｄ，第時BB出左世Ｎ咁多樣野，你呢架紅色跑車點裝得哂呀！」
「都話呢架係房跑，唔係跑車咯！」
「總之你就換架敞門車啦！」
「計埋BB，我地總動員都係得四個，買架7人車託咩！」
「咪買架敞門既4人車囉！」
「邊有架！」
「係咪有既話就買先！」
「喂，咪住先！陰謀黎既！」
「冇呀！邊得閒陰你姐！」
「唔係既！一定有野！」

「仔呀……咪順下家嫂意頂左子怡Daddy o個架車囉！」
「哎呀奶奶！唔好咁快講呀！！」
「子怡…Daddy……喂，SIENTA七人車黎個喎兩位鍾太！」
「都冇第三排位！」
「佢收起左姐！」
「細細架好呀！」
「o個架野得1500cc…坐多兩個人都難喎…」
「怕咩姐！計埋BB，我地總動員都係得四個，買架咁大馬力既車託咩！」
「排氣量同馬力係兩樣野黎架天才！」
「哎呀，咁岩子怡個Daddy放車，咪睇下先囉！我覺得好OK呀！」
「唔OK呀！！！我揸架咁既車仲使出黎行既？！」
「你係爸爸黎架喇！紅色車唔岩你架喇！」(姜碧瑄)
「關咩事！呢度又唔係加拿大，紅色車保費又唔會貴Ｄ既！」
「你揸架咁搶眼既車搏咩呀！一定趁我大肚o個陣去追女仔啦！」
「都話架車除左妳兩個之外，冇載過其他人咯……」
「你講大話！」
「哎家嫂，唔好動氣！唉呀！你咪當就下個老婆換過架車囉！」

「要換都唔換SIENTA啦？要敞門，我寧願買架Hiace！」
「咩係Hiace？」
「咪貨Van囉！起碼棍仔行Turbo偈！」
「好丫！你仲可以夜晚兼職做埋運輸添！」
「仔呀，既然我同碧瑄都覺得子怡Daddy架車幾好，咪試下囉，試左又唔係一定要買既！」
「哼！陰謀呀！一定係陰謀黎！」
「鍾莫言你唔錫我同奶奶喇！仲有BB……BB，你Daddy唔錫你架，一日就顧住去追女仔…」
「唉家嫂，唔好動氣呀，對身體唔好架，奶奶會心痛……」