【中學時期，我竟然被一個女仔改變晒】: 六、認識

六、認識
有日，同我一齊留班既朋友。佢叫智，比較多人叫佢做薯智或者大智。佢話唔熟呢級既人，要我陪佢周圍行，周圍睇下女仔。睇左A、D兩班。佢話得幾個靚，我心諗︰緊係啦，最靚果個根本唔喺果兩班。最靚果個一直都喺C班，就係女神。行到C班門口我向入面望一眼，女神並唔喺入面，咁我唯有同智一齊去廁所啦。行多兩步，竟然比我見到女神就喺前面。
我︰「喂，智，前面個女仔好得架，上前睇下咯。」
智︰「係咪架？你唔好fake我喎。如果上到前面見到係豬西，我實打9你架！」
我︰「係呀，我幾時呃過你呀？行啦。」
 
之後我地就實行我地既計劃啦，就係要智跑去前面，然後我要跟住佢一齊跑，之後我仲要扮唔為意咁撞到其中一個女仔，最後就要另轉頭同佢道歉。成個計劃為我地產生左兩個睇女既機會。只係我破壞左呢個完美既計劃。
計劃一直都完美咁進行緊，直到我既出場，我照計劃咁扮撞到女神。但係我撞到佢之後正諗着道歉時，我停左喺度。好似凝固左咁。
因為……因為……佢真係好似我夢到既女仔一樣咁靚，但係如果睇真人……係仲靚……佢好似一個冰雪公主咁，唔知點解我望落去，我就連呼吸既氧氣都好似係凍咁…真係好靚。我就咁停左喺度，望住佢，就好似望左梅杜莎一眼咁，佢同梅杜莎都一樣係神話，唔同既係梅杜莎係令人死亡既神話，而佢…係令我生存既神話。因為我望得太耐，佢身邊既肥妹仔終於出聲。
肥妹仔︰「喂！你望夠未呀？你望左好耐啦喎」




我：「又唔關你事，收聲啦雞仔聲。」
我又尷尬咁向女神講︰「對唔住，岩岩咁大力撞你，你無事嗎？」
女神︰「無野，都唔係好大力姐，不過……」
我︰「不過咩呀？」
女神︰「你岩岩咁大聲話我個FD，我想你同佢道歉。」
我︰「好啦，見係你，我講下又無妨既。對唔住肥妹仔。」
肥妹仔反擊︰「你去死啦，我肥你老味呀。我有名架，我叫方心誼呀。再道過歉啦非洲雞。」
竟然夠膽叫我非洲雞？你個死肥妹你死硬！此時女神為我講番句公道說話。
女神︰「算啦肥豬，你唔好再搞咁多事啦，走啦。」
眼見女神將走，我唔知下次仲有無咁好彩可以同佢講到野，所以我決定問埋咩名先走。




我︰「女神唔好走住，你叫咩名呀？」
仆街！我竟然直呼佢做女神！
女神︰「你叫我做咩話？」
我靈機一動︰「無呀…我早幾日聽人講你係全級既女神，所以我咪順口得濟，叫左你做女神囉。」
女神︰「原來係咁，我叫顏雪靈，不過比較多人叫我做Joyce既。你都叫我Joyce啦。」
我︰「好啦Joyce，有機會既話我地再傾計啦。」
Joyce︰「好呀。」
 
就係咁，我就識左佢。智望住我，好似未見過我出手咁講左句。
智︰「你都幾勁喎，撞一撞就知人地個名。」




我︰「呢D碎料黎姐，唉，少年大把野你學呀。」
 
番到屋企，第一樣做既緊係唔係換衫啦。我打開部電腦，用九秒九既時間上FB、IG搵下有關佢既野。過左一陣，我終於搵到D野，一D我唔想面對既野。佢FB既icon係一對情侶望着鏡頭，手拖手既畫面。佢身邊企住一個幾靚仔既男仔，黑黑實實，大大隻隻，睇個樣就知運動唔會差得去邊……犯賤既我決定再深入了解呢個男仔。入到佢既FB，第一張相就係佢地接吻既相……隨後仲有幾張籃球比賽攞冠軍既相，又有一D甜蜜既合照……真夠他媽的虐心……。最後我一野熄左部機上床訓教，沒有換衫，沒有沖涼，沒有食飯，腦袋只有果幾張親密既相，不停徘徊着，然後就訓左……