我老婆參加咗歌唱大賽......: 1

我係阿強，有個結咗婚六年幾嘅老婆Shirley，佢所有嘢都好好，對我好好乜都好好，仲要係「我初戀情人就係我老公」嗰隻，巴打們，唔羨慕得咁多架喇。不過有一樣嘢唔好...就係......

（電話鈴聲）「而每過一天  每一天  這醉者  便愛你多些  再多些  至...」

就係我老婆好鍾意唱歌！！！佢鍾意到要用佢唱嘅歌黎做佢打黎嘅專屬鈴聲，而每次佢一打黎，公司班人就對我報以鄙視、恥笑嘅目光！！！所以每次有人喺隔離我都會敷衍佢兩句務求盡快收線！！

「喂？老公呀？我今日買咗上次套戲嘅soundtrack呀，好開心呀~~我聽熟佢遲啲唱俾你聽吖！」
「好...老婆我仲同班同事食緊飯呀，走得再打俾你吖。」
「好啦...咁你快啲返喎！」
「ok，byebye！」





廿秒都唔洗，不過班人...

「wowwww~~叫阿嫂唱返幾句先收線呀嘛！！」
「下次唱k咪叫埋阿嫂一齊去囉，等佢唔洗匿喺電話入面唱呀嘛~~~」

See？呢班人就係咁賤格。

雖然我老婆好鍾意唱歌，而佢唱歌又真係幾好聽，而我都真係好愛佢，但係佢嗰種熱愛音樂嘅程度真係會令我好尷尬......