【夢幻】《我從來冇諗過我會有咁正既女朋友》: 校園－白色校服
我地最後都係冇去到搵志威，只係send左個whatsapp同志威講左聲我地兩個有事走先，下次再約。
「明白既！兄弟！有咩事記得搵我！」有好多野我同志威兩個之間係唔需要解釋咁多，好多時大家都係「在心中」。
我送左敏兒返屋企之後煮左個麵比佢食，再叫佢落床訓陣好好休息一下。
其實我講呢句說話既目的真係想叫敏兒訓陣休息下，話哂佢今日都喊左咁耐，一定好攰架喇...
但敏兒聽到之後誤會左我既意思，佢以為我咁同佢講係準備要走。
所以佢冇啦啦就即刻捉實我雙手話...
「唔好走...你坐起我張床側邊陪住我訓啊…」敏兒真係好用力咁捉實我雙手，好似真係好驚我會走左咁。
「傻既！我都冇諗住要走！好啦！你而家訓一陣先，訓醒之後一打開隻眼就會見到我架啦！」
敏兒聽到之後就拖住我隻手，安心咁合埋雙眼訓教。
我望住眼前既敏兒，心入面起到諗...
點解個天要呢個女仔經歷咁多艱苦既事情....
究竟平時表面上成日笑，比人感覺上好樂觀既敏兒，佢內心既真實世界又會係點樣既呢.... 因為今日知道左太多令我感到震驚既事情，所以我都覺得身心疲累。
我都開始慢慢合埋雙眼....就係咁我好快就訓著左....
叮噹叮噹...係久違既校園鐘聲...
「小息喇！李仲成你重起到訓教！」我慢慢打開我既雙眼，濛糊之中見到敏兒著住一套純白色既校服，再用佢對纖幼既雙
手，係到拍緊我既膊頭。
「咩啊….做咩叫我起身啊！」我伸一伸懶腰再加上岩岩訓醒帶有一種磁性既性感聲線講出呢一句說話。
「你問我做咩叫你起身？今日係學校一年一度既中學電腦組比賽啊！你究竟訓醒未啊李仲成！你再唔去報到就比人取消比賽資格架喇！你今年已經係最後一年可以起畢業之前參加呢個比賽，你走唔行就真係唔得掂架喇！」
敏兒佢表露出非常焦急既神情，再用盡佢全身九牛二虎之力諗住拉我起身。
等等先...點解成件事好似怪怪地咁既...
敏兒佢做咩冇啦啦會着住套校服裙既...
重要點解個樣好似童顏左咁多咁既.... 我再望一望自己，仆你個街！點解我又會着住套咁柒既校服既！
大佬！我承認我起中學既時候都係無心向學，日日返學基本上唔係上堂傾計就係訓教，最叻就係發白日夢姐！ 但就算我起學校點頹廢都好，我都好肯定我套校服明明係淺藍色架喎！話哂都着左成六年我冇理由會搞錯架嘛！ 做咩而家冇啦啦變左套白色校服既...重要連個校章都變埋！
搞到我着到好似送殯咁撚樣..真係好柒啊救命！
本身都重係訓到迷迷糊糊既我，當一見到自己搞成咁既時候真係成個人都嚇到醒撚哂！
我唔撚係參加左啲咩cosplay比賽下話...
冇可能啊….我明明從來都唔鍾意玩cosplay架喎！
「你重呆起到做咩啊！快啲同我一齊跑上去七樓既電腦室啦！」我完全未搞清楚發生咩事既情況底下，已經比敏兒拉住左我瘋狂咁跑樓梯。
我用強烈而不滿既語氣講左句「等等先！你停一停先好冇啊！」
我都係第一次咁惡同敏兒講野，可能係因為岩岩起身個人好緊燥底既關係...
「冇得停喇！再唔跑快啲你就參加唔到個比賽架喇！」敏兒並冇理會我既說話，只係一直拉住我一直狂奔。 好彩佢冇嬲我頭先對佢咁惡姐...
不過我見敏兒用咁強硬既語氣回答返我，我都唔敢再點出聲，只好一直起佢後面跟住佢跑。 去到電腦室門口，好快就聽到有位大嬸嗌我個名。
「李仲成一次，李仲成二次，李仲成..三…」
「李仲成起到！」大嗌呢一句說話既並唔係我本人，而係企起我旁邊扯哂氣既敏兒。
「快啲入去比賽啦！加油啊！你應承過我會贏兩張海洋公園門票同我入去玩架！我相信你一定可以做得到架！」敏兒興奮地為我打氣
此時此刻既我...連個比賽題目係咩都唔撚知，重話學人去贏個比賽.....我真係得啖笑
我一入到去已經見到有好多條友係到比賽緊！所以我相信我應該係最遲加入比賽果一個！
當我坐左起張電腦枱面前既時候，見到有一張寫住比賽規則既紙...
題目係「郵票設計」！我心諗唔乸係咁益我下話...如果係咁簡單我就真係冇得輸啦！
話哂我都成日起公司幫客戶設計下啲logo啊咁！呢一方面真係完全難我唔到喎！
當我知道左個比賽題目之後，我就快快手睇下有咩program起部電腦入面，等我可以快快手設計到一個獨一無二既郵票。
最後我發現部電腦係乜春program都冇！最後我決定選擇左用....
「小畫家」你地並冇睇錯，就係每個人呢一生人一定會用過既「小畫家」！
但我好有信心以我既實力就算用小畫家都「夠做」啦！
話咁快我就已經設計左個郵票，真係十分鐘到已經搞掂好哂！
我設計左一個用高登表情撚專用既「表情符號」組合成既郵票。上面再加多句高登名句...就係
「上高登，勿認真！」
搞笑得黎又帶出香港網絡世界既迅速發展，咁岩高登又係全香港最受歡迎既電腦討論區。
咁呢個又係一個電腦比賽，貼題貼到咁撚樣我實在諗唔到有咩理由唔咁樣去設計。
我再望一望個鐘，距離比賽時間重有成三分鐘先結束。
咁我就令轉個頭望住敏兒，擺出一個「贏硬」既表情啦！
細心一睇，原來身穿校服既敏兒，除左係幼齒左之外...
我發現原來敏兒既髮型都唔同左喎..
敏兒而家既髮型係「齊陰」再加扎住條馬尾
雖然係睇落比較細個失去左種成熟既韻味，但都重係咁有氣質。
岩岩因為未訓醒既關係再加上太多突如其來既事情發生，所以都冇留意到敏兒個髮型原來係唔同左。 重點其實都唔係敏兒既髮型....
而係敏兒今日係素顏上陣！！！
點解我會睇得出係素顏？
其實佢個樣就真係冇乜太大既變化，五官同化?妝既佢無咩分別，一樣輪廓分明。
之不過個樣重要係天然到令人無話可說既地步....
不過就算佢化左妝都係比到人一種好清純既感覺...只係唔化妝既敏兒更加突顯左「天生靚女」既優勢之處 對男人而言，心中既女神如果素顏同化妝一樣咁靚的話，就好似你買去野食既時候有「買一送一」優惠同一樣道理，我唔知你地明唔明白我既意思啦！
即係簡單黎講，就好似好多人都話化左妝先靚係因為化妝品靚，唔化妝都靚先係真．女神喇！
而唔洗講都知敏兒絕對係真．女神啦！
敏兒既笑容依舊係咁甜美，但身型方面明顯係瘦削左唔少！
唔知點解每次起夢中既敏兒望落去都好似好瘦同弱質芊芊既感覺..
鈴鈴鈴….係計時器既鐘聲...
「係咪比賽完左喇...」
「咩比賽完左啊！你發開口夢啊？」係敏兒把聲
我打開雙眼，再望一望四周圍既環境。
呢到係敏兒既屋企...即係代表岩岩既夢已經完左。
「岩岩你叫我好好去休息下！點知我訓醒之後見到你重起道訓緊，重要訓得咁舒服所以我咪冇叫醒你囉！你知唔知你重訓得耐過我啊！」敏兒一面無奈咁笑住同我講
「你知唔知岩岩我起夢入面夢見到你啊？」我望實敏兒，諗返起佢著住校服裙既清純樣，但總係唔知點解唔太match !
可能係因為髮型唔同左掛...
「下！咁搞笑！咁你起夢入面夢到我地起道做緊咩啊！」敏兒又再次望住我起到傻笑，好似覺得我重未訓醒亂咁噏。
「認真！我真係夢到我地讀同一間中學！我同你都著住果間中學既校服架！重要係白色架！我去左參加電腦比賽，你重話
一定會贏到兩張海洋公園門票同你去架！」我好認真咁講返起夢中我同敏兒做過啲咩黎！
我既語氣就搞到佢好似忘記左我地之間既回憶咁...但明明就係成件事都冇發生過...
「咁最後你贏唔贏到啊！」敏兒見我冇啦啦咁認真，都好似好心急好想快啲知道個結果咁。
「我都唔知啊！因為公布比賽結果既時候我就已經醒喇！哈哈！」我都覺得今次個夢勁智障搞笑得黎又好奇怪... 今次竟然係發夢夢見讀緊中學時期既我，同之前發夢見到敏兒既情景真係好唔同。
「你個夢都幾特別下喎！不過你中學係讀男女校架？我中學係讀女校架喎！」我真係而家先知原來敏兒中學係讀女校，之前我地一直都好少提起以前讀書既生活！
不過都好...敏兒份人咁單純，如果讀男女校會比啲狗公呃都唔出奇。就算唔係肉體上既傷害，心靈上既傷害都唔好啦！