【夢幻】《我從來冇諗過我會有咁正既女朋友》: 初見－ 敏兒
但我萬萬都估唔到May姐個表妹原來係咁正！
佢真係同我夢中見到個女仔有七成似！個樣重要勁似孫慧雪！
唔撚係唔知孫慧雪係邊個下話！TBB果個三四線女藝人喎！
我有時起愛・回家見到佢客串就點都會睇哂成集！
當我一返到公司見到阿May個表妹坐左起道既時候，我真係覺得同我夢中遇到既女仔果時係一樣情景！
而家既我就好似發緊夢咁.... 「Hello!你好啊！我叫敏兒！今日係第一日返工架！」佢露出雪白既牙齒對住我笑！
係喇！就係佢喇！ 佢兩片薄薄既小嘴唇同埋一對迷人既笑眼，個陷得好深既小酒窩！
簡直係同夢中既女仔一模一樣！
佢着住一件白色既恤衫再襯一條黑色既長褲，佢既身型比例真係岩岩好，唔會太瘦塊面又有少少肉地再加上一條長腿 救命！真係好有OL feel啊 !
天啊！我都話你報夢比我知係想同我講我既真愛即將出現架啦！
我終於明白「大難不死，必有“艷福”呢一句說話！」 我控制唔到我心中既興奮，冇啦啦起到傻笑！
但下一秒敏兒好尷尬咁問我「你做咩起到笑啊！我塊面係咪污糟左啊！死啦! 第一日返工就失禮！」
我即刻醒一醒！屌！唔記得左人地同緊我講野！ 「
唔係啊！你好靚啊！啊！唔係！我意思係話你塊面好乾淨！」我輕輕一笑，現場氣氛有少少尷尬！
「我想問其他人呢？佢地未開始返工？」好快敏兒就再次開聲，打破左呢個老尷場面！
「唔係！係我今日早左返公司！你就係May姐表妹啊？」
「係啊！你係咪成仔啊？表姐有同我提起過你！」敏兒表現出對新公司既人都幾感興趣！ 咪住先！岩岩佢話May姐提起過我！佢會講起我咩架！唔會同佢講左話我係一條毒撚，叫佢唔洗理我之類既仆街野下話！ 似喇似喇！冇喇冇喇！我既形象冇哂啦！
諗到呢到，我發覺我既人生好絕望！ 敏兒見我聽到May姐提起我既時候我就靜左一靜，好快就加返句話：「佢讚你好肯幫人同埋做野好有手尾啊！」再向我報以一個微笑！
我聽到即刻想大嗌一句：「MAY姐，我愛你！」 但我緊係唔會比自己起佢前面咁柒架啦！我要抑壓住自己心中既興奮！！！
「唔好咁講！有咩唔明即管問我！」係我人生第一次咁自信講出口既一句說話！
因為之前一直都唔敢忘記我做人既宗旨！ 就係....「毒撚切忌有自信 ！」
但今天的我，已經不是昨天的我！ ！ 我要收埋平時起公司既“毒撚”性格！好好去改變自己！
老闆同其他同事都陸續返到公司，個個男人見到敏兒都不禁雙眼發光。
最明顯果個....就係「老闆」！ 老闆一返到公司就好熱情地同敏兒打招呼：「歡迎你加入我地既大家庭！為左歡迎新同事加入！今晚放工食飯我請！隨便當慰勞下你地呢個月幫公司接左單大生意！」
各位同事都比哂面交足戲異口同聲講左句：「多謝老闆！」
我心諗屌你啊！我第一日入黎做果時毛都冇條！淨係叫我比心機工作！我相信呢一刻唔止我一個係咁諗！
不過我算數！有得同敏兒放工一齊食飯都幾爽！ 平時都唔覺原來返工可以咁有動力！
今日我終於明白咩叫「熱血」去做一件事，因為我而家用盡我畢生既功力做好呢份report!
敏兒佢個位坐正我對面，之前May姐坐起道既時候，我真係十年都唔會抬起個頭一次！
但今時唔同往日，我差唔多每隔幾分鐘就抬起頭「偷望」下敏兒！
果種感覺都幾刺激，因為唔可以比佢發現我係昅緊佢，所以要鬼鬼崇崇咁扮諗緊野望下周圍啊咁！但隻眼就唔洗講都知昅緊佢啦！
工作中既女人真係特別吸引！佢果一種天生既氣質，果一陣「仙氣」真係隔住個電腦Mon都聞到！
從今日開始，我李仲成既一生將會有所改變！我要脫毒！
話咁快就到放工時間，我地一行十人去左一間酒樓到食飯！ 一拎到位其他人都好快咁坐低哂，得我同敏兒兩個企左起道。
老闆開聲話：「你地兩個企哂起到做咩啊！過黎坐啦！呢道有兩個位啊！」
呢一刻既老闆望落特別令仔，只係呢一刻！
咁好自然我地就坐埋一齊，我興奮得黎又帶少少緊張。話
哂都坐起我「夢中情人」隔離喎！點都會有少少唔自在架啦！ 要改變我既「內向」性格始終唔係一朝一夕既事黎！
所以我全程都係成碌木咁坐起到食飯，而敏兒就同佢地相處得好融洽，大家都有講有笑！
我就好似一個食飯搭枱既人咁！再次要用阿源名句「我覺得自己是零」 睇怕我都係食完飯返屋企訓教，起夢中同佢相遇算啦唉！
個個飲飽食醉之後都各自反屋企，當我打算轉身走人既時候.... 事情竟然有突破性發展！！
大家唔好睇錯...唔係性發展。
「成仔啊! 你住邊架？」敏兒主動行埋黎我身邊問我 「我住大圍，你呢？」 唔會咁岩住大圍架啦！做戲先有架姐...
「我住沙田架！一齊搭地鐵返去？」佢表露出驚喜既神情
「哦！好啊！還掂都係順路！」我難掩心中既興奮！
可能係因為佢個樣同夢中既女仔十分相似，我直頭當左佢地係同一個人，所以有返份熟悉既感覺。
我完全唔覺得緊張，反而重好輕鬆自在！
「你平時放假鍾意做啲咩架？」我想了解多啲佢既生活喜好 「我鍾意睇戲同跑步！你呢？」 原來佢鍾意跑步，唔怪得佢身型咁fit啦！重帶少少陽光氣息！
「我鍾意打機同訓教！」我好自然咁講左我日常生活習慣出黎！
下一秒，我即刻覺得好撚後悔！起碼我都扮下野話鍾意睇下書做下運動咁啦！
雖然我睇落都唔似，但都好過比佢知道左我既廢青生活啊！
「男仔都係鍾意打機架啦！做自己鍾意做既野先係最開心！」佢又再次對住我露齒笑喇！佢並冇覺得我既生活好頹廢，反而好單純咁講出佢自己既想法。
起呢一刻，我定左格咁凝望住敏兒！佢真係好pure啊！
佢絕對係一個我會想更加了解同接觸佢既女仔！
下一站大圍！NEXT STATION IS TAI WAI！係喇叭發出既廣播聲， 原來話咁快已經到左大圍站。
「你到啦！聽日見啦！拜拜！」佢向我揮手說再見.. 「聽日見啦！拜拜！」我微笑地點頭，然後轉身離開車廂！
我地今晚夢中再相見啦....