早兩日OT遲收工,女上司叫我上去佢屋企..: 31

今日一如既往探Jenny,
當我插住玫瑰時,
忽然聽到一陣輕笑聲,
我心頭一震,
望向床到,
發覺Jenny已經睜開雙眼,
非常柔和咁望住我,
我一陣激動,
衝過去摟住佢,
Jenny: 哎呀, 你好重呀….痛…




我急忙鬆手: sorry, 冇野呀嘛?
Jenny嘻嘻一笑: 但我鍾意, 快d摟番住我.
我不禁一笑, 再輕輕力摟住Jenny,
真係想,
時間永遠停留係呢一刻.
 
唔知過左幾耐,Jenny係我耳邊輕輕出聲,
“冷,我仲以為…以後都見你唔到….”
我: 你以後都會見到我, 因為我會好好咁陪住你.
Jenny: 你…你真係唔會離開我?




 
同樣既內容, 使我一剎那有啲猶疑,
但我最後仍然確實咁點頭: 嗯!
 
Jenny既眼淚, 沿著眼角流下,直到枕頭,
即使醫生護士入黎大吵大鬧,
我地仍然輕輕相擁,
深深擁吻.
 
果一日,




我真係以為,
我可以同Jenny,
一生一世.
 
如無意外,
今日Jenny就可以出院,
仲會同我屋企人一齊食飯添.
 
我拎住最後一束白玫瑰,
準備拎花瓶去洗時,
卻聽到兩個護士係到傾計.
 
“你有冇睇新聞呀? 終於真相大白喇.”
“邊單呀?”
“馬田田呀!!! 原來係謀殺案黎架!!!”




“咁捉到兇手未?”
“兇手係佢老婆….”
“話左架啦…我睇左咁多年tvb, 有番咁上下功力.”
“唔係喎,又好似唔係佢老婆, 新聞寫到關係好複雜,好睇過tvb呀!你睇下…”
 
或者係佢地愈走愈遠,
或者係我深深咁呆滯左,
我已經聽唔到佢地講乜.
 
我坐係長櫈到,打開智能電話,
好快就見到好多條新聞,
“【馬田田命案】青梅竹馬兼情敵 攜手殺人滅屍奪身家”
“【風流惹殺機】富商風流成性 三十年關係錯綜複雜”
“【真相大白】馬氏聯同十九歲少年 合謀丈夫過百億財產”
“【兇殘血案】美女兇手今自首 因愛成恨肢解分屍”




“【神之馬田】毛毛呢排覺得天氣又咸又濕 原來係關馬家事…”
 
每份報紙傳媒,寫既事都唔同,
重點亦都唔知放左係邊,
亦都唔知邊個講真,邊個講假,
 
但我每一份報導都睇得非常詳細,
腦海將所有既事,
逐一逐一拼湊,
好似拼圖咁,
緩慢,
但確實地拼出事實.
 
直到睇到一份報紙,
上面有一張大相, 有三個年輕人微笑,




色彩有d舊, 著住畢業袍既全身相,
唔知幾多年前.
 
但我一眼就知道,左邊正常咁企既係Angela,
一樣美麗, 一樣令人不能轉移視線,
中間係一個靚仔, 白白淨, 眉清目秀,
係馬田, 我對左佢咁耐,又點會認唔出..
而右邊係一個用波緊緊貼住馬田隻手,
笑得好甜,隻腳仲勾起,
我從來未見過佢,
但我一睇,
就知佢係一個發姣既西女人.
 
我望住呢張相,久久不能平息,
三個人同時間微笑,似乎好開心,




但我從Angela既雙眼睇得出,
由心而發既淡淡悲傷.

忽然,我望到個西女人勾住martin隻手戴著既戒指,
好熟口面,好熟口面...

唔通... 

我慢慢係公事包一個暗格將戒指拎出黎,
自從果日開始,我就將戒指一直放係到,

我將佢放係報紙隔離對比,
冇錯,
一模一樣.

一剎那,
我放低電話,放低戒指,
諗左好多好多,
我大概明白哂來龍去脈,
我忍唔住,
係長櫈上面,
無視他人奇怪目光,
對住呢張相,
嚎啕大哭.