[找數][外傳]「空白的五年」: 最終章 Part1
十二月二十五號，聖誕節，普天同慶既日子。
我都係咁諗，因為今日係我結婚既日子。
終於，終於走到黎呢一步喇，如果係六年前既我，根本無諗過可以行到呢度。
六年前今日，我同佢第一次倒數聖誕，當時佢仲帶病在身，成件事好搞笑。
原來咁就過左六年，我同佢已經一齊左六年，時間過得真係快得嚇人。
「喂，係度搞乜。」
哦？係晨哥。
佢地成班兄弟上左黎，幫我set好所有野，準備去接新娘。
我：「無，諗下野啫。」
晨哥：「夠鐘啦，換衫喇。」
我：「嗯，而家換。」
雖然我好唔情願，但而家並唔係著美星做俾我果套衫既時候，所以我都係著左西裝。
呼，第一次著係為左佢，今次著又係為左佢。
可惜既係呢件並唔係以前果套。
美星：「幾靚仔吖，都唔明點解你咁抗拒著西裝。」
我：「始終感覺好怪，唔多舒服。」
朱雀：「最緊要好睇！行得未？」
我：「嗯，行得喇。」
晨哥：「好！報告狀況！」
「爆門team Ready！」
「盾牌team Ready！」
大家…都好有幹勁呢…
係咪睇TVB劇既接新娘睇得太多呢大家…
Jason：「車到左啦。」
晨哥：「咁我地行喇。」
我：「哦好..」
哇大家好似好有條理咁，我只要跟住佢地就實無死喇。
落到樓下，已經見到有幾架花車係度。
哇我無諗過咁大陣仗…
居然要十四做我司機...超級唔好意思吖真係…
不過佢地個個都笑容滿面咁推我上車，我都唔好意思推，只好乖乖咁上車。
就係咁，成隊車隊就向Cherry屋企出發。
十四手車非常之辣，好快就送我去到Cherry屋企，我地仲要等多成十分鐘其他車先到。
晨哥：「好~各位！我地而家即將去打副本！難度會有前所未有！大家要有心理準備！」
「好！」
eh…大家…冷靜少少先…我地係去接新娘吖！
但佢地好似聽唔到我既說話，用一個要「一命爆機」既氣勢上樓。
吖，會唔會出事架咁…
「叮噹~」
「開門利是！」
係子琪把聲。
我：「等我黎啦，大家退一退開先。」
大家終於肯聽我講，讓開左條路比我去鐵閘前。
我：「要幾多吖。」
「係lulu把聲喎。」
「開道木門睇下先？」
我聽到門後有討論聲，討論緊開唔開門好。
最後佢地都係開左道木門，嘩一大堆八婆係度，但就係唔見Cherry既身影。
我：「要幾多先肯開門啫你地。」
子琪：「$888888！」
「嘩唔好去搶。」
「爆門team隨時可以行動。」
我身後傳來男子組既聲音，好似真係想夾硬黎咁。
我又唔想搞到咁僵，所以我決定同班八婆講數。
我：「喂有無得平d吖，大家都係想開心啫，你都見我後面班兄弟全副武裝架啦，玩到爆門就無謂啦。」
若睛：「無得傾！你要錢定老婆！你自己揀！」
我：「喂大佬成八十幾萬喎邊到搵俾你，俾支票得唔得？」
若睛：「No！cash only，無cash唔開門！」
痴線，八十幾萬收cash，一盒大富翁都唔夠俾喇係咪先。
子琪：「快D㨂！要錢定要老婆！」
「我地大佬兩樣都要！爆門team做野！！」
仆街仔肥豬，我幾時做左你大佬。
不過肥豬講完之後阿偉同師父又真係拎哂野好似想爆門咁喎！！
咪呀你地！！我唔想結婚搞到要上報吖！
我極力勸阻，但無人理我。
班八婆仲要係度叫囂，簡直係火上加油，搞到班兄弟真係準備爆門，已經瞄準左道門。
千鈞一髮之間，有一把聲叫停哂全場人。
「唔好玩啦，俾佢地入黎啦。」
係Cherry，佢行左出黎。
好靚，佢著住套裙掛行出黎，真係好靚。
Cherry既出現令雙方都議論紛紛。
「真係就咁開門俾佢地吖？
」 「人地新娘都咁講啦，開門啦仲等咩？
」 我：「大家冷靜D先..
」 Cherry：「開啦，再咁嘈我怕隔離屋會報警吖。
」 嗯，講得好吖，我都驚緊，果然我地心靈相通吖老婆。
講到黎呢個地步，班女終於肯開門。
呼，終於。
接新娘唔小得既當然係玩新郎啦，我都已經有哂心理準備。
今天的我是凌駕於阿修羅的存在啊！！
我：「黎啦！有乜挑戰比我？老子甚麼鬼都不怕！！
」 子琪：「好好既氣勢吖，咁飲哂呢度五杯野佢啦。
」 飲野？比想像中簡單喎。
我：「就係咁多？
」 子琪：「你老婆錫住你吖
，又知你咩都唔多掂，咪叫你飲野算囉。
」 哇好感動同時又好hurt，居然俾咁多人知自己咁無用，而家仲要係全程錄影架。
唔好諗咁多喇都係，飲哂眼前呢五杯野就可以帶走Cherry喇。
我：「好我飲，開黎見我！
」 佢地打開呢五杯野，我差少少屌左出聲。
你老味，五杯齋啡。
明知我唔飲咖啡，仲要黎五杯齋啡…
就算已經手下留情都係一件難事啊…
但出奇地，我無一絲既猶豫，一口氣咁飲哂呢五杯齋啡。
果然我凌駕左阿修羅啊。
我：「搞掂啦。
」 咦，在場既人對於我一時之間咁快飲哂好似有少少錯愕，無人比反應我，只係呆左咁望住我，包括Cherry。
阿欣：「咁…讀愛的宣言喇！拎住佢！
」 阿欣遞左張畫紙比我，上面有好多字，但我無睇過，一下就撕爛左佢。
哪來的霸氣啊我。
我：「無聊，唔讀，我對佢點佢好清楚，唔需要呢D野。」
呢個真係我..？
成場又再一次deadair。
「哈哈哈，講得好講得好，令我諗起當年既自己，點解自己當時會屈服讀左呢個不平等條約呢？」
噢，係Cherry爸爸。
我：「Uncle你好，無同你打招呼先唔好意思。
」 Uncle：「噢唔緊要，我睇到你既決心啦，我個女就交比你架啦，你要好好照顧佢得唔得？
」 我：「一定一定，我一定會俾最好既野佢。」
Uncle：「非常好，嗱去啦乖女。」
Uncle開始拖Cherry過黎我呢邊將佢交俾我，我亦接過Cherry隻手，拖住佢，十指緊扣。
真係一個好有意義既儀式，由父親既手轉去牽丈夫手。
之後奉荼儀式當然唔少得喇係咪？又再一次同Cherry父母講左兩句就完左個儀式。
「咁我地個女以後就拜託你啦魯路修。」
呢句係我聽過以來最有感覺既說話之一。
我頓時感到身上多左一份責任，一份要好好照顧人地個女既責任。
「嗯，請放心交你個女比我喇兩位。」
我好少可諗都無諗就答人。
因為根本唔需要諗。
斟完茶之後就代表成個接新娘儀式搞掂，可以返我地屋企，但邊有咁簡單吖係咪？
「咀佢！咀佢！
」 全屋人都係度叫囂。
我：「佢地叫我地咀喎。」
我問Cherry。
Cherry：「係囉咁點算好吖。」
我：「咁咀囉。
」 Cherry：「咀囉。
」 講完我地就係咁多人同閃光燈前kiss左。
無話邊個kiss邊個，因為我地係一齊做主動。
「返去咯，返去我地屋企。」
我咁同Cherry講，之後就拖住佢離開呢個而家對佢黎講叫做娘家既地方。
之後我地就返去屋企，帶埋女方令到成班人好大陣仗咁。
返到去屋企，感覺好唔同。
明明以前已經帶過佢去我屋企咁多次，點解今次特別扭擰？
我唔識形容呢種感覺，總知就係好怪。
所以結果係由佢帶我入去，令我更加覺得怪。
一開到門，美星就已經企左係度，好似係到等我地咁。
美星：「唷~等左你地好耐啦。」
果然呢。
都無乜特別儀式要做，都係斟茶比美星同老豆老母就OK。
我以為過程會好輕鬆好簡單，但出乎我意料，我感覺到有一份無形既壓力。
種感覺就好似細個比成績表父母睇咁，硬係凝住父母會鬧自己咁。
兩老既表情非常認真，眼神一直望住我地手上杯茶，老實講，係幾嚇人的。
只有美星笑笑口咁企係後面望住我地。
Cherry：「老爺奶奶飲茶~
」 爸，媽：「乖~
」 我：「阿爸阿媽飲荼…」
爸，媽：「哦。
」 哇態度完全唔同既喂？我先係你地個仔黎架！
爸：「魯路修。」
我：「係！
」 全身所有神經即時繃緊哂。
爸：「要好好錫住人地個女啊知唔知？得來不易架你知。
」 嗯，我知道。
媽：「大個仔喇你，要建立自己既家庭喇，要俾心機做野搵錢養老婆吖知無？
」 呢樣我都知，我會俾心機係美星手下做野架啦。
突然間我又被付託左兩個重要既任務：愛妻同養妻。
又係一個重擔啊…
我到底可唔可以俾到幸福佢呢？
「謹遵王命。」
就算無乜信心，我仍然係眾人見證之下作出承諾。
之後就係到美星。
Cherry：「家姐飲茶~
」 我：「家姐飲茶。
」 美星：「嗯，乖喇。
」 佢好爽快咁飲哂兩杯茶，然後攬住我地兩個，攬到實一實。
美星：「大個仔大個女喇，以後都要幸福吖，要比而家更幸福吖，得唔得？
」 其實，家姐係好錫我地，一直都係。
之後，班兄弟姐妹團就先行撤退去食飯，留低我地一家人係度食飯。
呢餐，非常和睦，好溫暖。
係第一次Cherry以我老婆既身份同我父母食飯，感覺好特別。
可能係我太多感情啦，我有少少眼濕。
下午三點，兄弟姐妹團重新集合係我屋企，準備一齊去酒店。
「喂，lulu。」
我：「嗯？做咩吖？」
Cherry係我望緊風景個陣叫我，但我無望過去，只係繼續望住出邊。
Cherry：「擰過黎啦。」
我仍然不為所動，繼續望住出邊，因為我而家喊緊。
離開左屋企，上左十四車之後我就開始係咁，我自己都唔知點解會咁，所以我唯有擰轉臉。
但我勢都估唔到佢會夾硬黎，用手捉住我逼我望住佢。
佢輕輕咁用紙巾抹走我眼淚，咩都無講。
我：「點解你會知我喊…」
Cherry：「傻既，做得你老婆，呢D小事我當然知喇。」
我：「哈哈真係瞞唔到你..」
Cherry：「唔好再喊喇，今晚有排喊吖你。」
有排喊？咩意思？
係我思量緊呢個問題既時候，十四停低左車，原來我地已經到左酒店。
唔知個場係點架呢？我都未見過。
之後一班兄弟團好似G4咁護送我地上去宴會廳，哇幾有氣勢吖真係。
晨哥：「俾你睇下個場，記住唔好嚇親喎。
」 晨哥企係宴會廳大門前禁住道門，好似準備比個大驚喜我咁。
我：「開黎見我！老子什麼鬼都不怕！
」 我懶有氣勢咁講。
晨哥聽完笑左一笑，推開左道門，入面既燈光開始照入我眼中。
嘩…痴線架…
「好大」
我詞窮了。
晨哥：「呢個係我地準備比你兩個既Party吖，要好好享受吖。」
個廳真係好大，分開兩邊，一邊係酒席，一邊係飲野吹水既地方，完全係一個極上既Party。
美星：「唔好發呆啦，入去喇，一陣你地仲要招待人客架，趁而家休息下啦。」
Cherry：「知道家姐。
」 我：「哦…
」 朱雀：「手足們做野！
」 子琪：「姐妹們都係！
」 我既伴郎伴娘開始指揮兄弟姐妹團做野，場面好壯觀，我一時之間成個人呆左。
大家都好有條理咁行動，好似都知道自己要做乜咁，顯得我更加傻仔。
我開始四處張望，再望下呢個大得離譜既宴會廳，俾我搵到樣吸引到我注意力既野。
台上有塊大布，好似cum住D野。
「想知咩黎？自己去打開睇下lor。
」 晨哥唔知係邊度彈出黎，笑笑口咁同我講。
又俾佢讀心。
好奇心既驅使下，我拖住Cherry慢慢接近果件「物體」，好快就行到去件野前面。
我一下就揭開左佢，今日我真係特別大膽，如果入面係隻象就仆街了。
萬幸，入面既唔係象，而係兩張皇座，星矢入面波賽冬坐果D。
我：「喂呢D係…
」 Cherry：「我見你成日坐到個皇帝咁，我咪請佢地諗下辦法囉，鐘唔鐘意？
」 我忍唔住鬆開拖住佢隻手，用雙手緊緊咁抱住佢。
我：「多謝你，我既皇后。
」 Cherry：「陛下你鐘意就好喇
，坐上去試下？ 」 好提議。
我再一次拖住佢，同佢一齊坐係兩張皇座上面。
一坐上去，就突然聽到大家既掌聲。
我望望周圍，原來大家都望住我地兩個。
多謝大家咁細心…
仆街我又想喊…
唔得！皇者係唔可以喊既！要忍！
時間慢慢推移，親戚朋友開始慢慢咁到，我同Cherry開始不斷咁影相。
我發帖請既朋友全部都有到，真係好開心。
「魯路修，時間到喇，係時候去換衫…」
朱雀行去我旁邊，好細聲咁同我講。
我：「嗯，我明白喇。」
我用雙手按住皇座兩旁既扶手，一下就企左起身，發現Cherry都已經企左起身。
「一陣見喇我地。」
我地異口同聲咁講，之後就向兩同相反既方向前進。
Cherry，我要令你眼前一亮，俾你睇下一個新既魯路修，用美星造比我既衫！
就算已經試著過好幾次，著呢套衫都係咁麻煩。
真係好佩服美星可以做到一件咁複雜既衫出黎。
明明呢個款可以上淘寶或者Amazon買，但美星偏偏決定要自己整。
無錯，呢件衫其實係《CODE GEASS》入面第九十九代不列顛皇帝著既衫，可以話係cosplay。
我起初都有諗過咁著會唔會俾人笑，但諗落又有乜所謂啫，今日我先係主角，我鐘意點就點。
再加上我都著過比老豆老母睇，佢地都無話咩，仲話咁可能會係一個幾得意既婚禮添。
咁樣著一定可以俾到個驚喜佢啦，佢一定無諗過我會咁著。
不過，一陣會進場架喎，我一定會好緊張架喎，仲話唔定會行行下仆親添，點算好？
唔得，我要冷靜一下先。
朱雀：「喂魯路修我地要去入面standby喇，一陣會有人叫你出去架啦。」
我：「嗯，你地去喇。」
岩哂，我而家就係想一個人靜下。
佢地出哂去，留低我自己一個係度望住塊鏡。
我開始對住塊鏡自言自語。
「一陣我可唔可以做得好好睇睇呢？」
「會唔會失禮佢呢？」
「件衫扣好未呢？」
「冷靜D喇你，主角咁失魂點得架。」
係一間應該只有我既房入面忽然傳黎一把女聲。
我擰轉頭望向門口，見到Ada企左係度，個心即時寒左一寒。
佢唔會係想學TVB D19劇咁係行禮前…
我成個人都好驚好慌張，仲開始標冷汗。
Ada：「冷靜D喇，我又唔會食左你既，我黎睇下你啫。」
我：「哦哦哦…」
Ada：「企起身俾我睇下~又幾靚仔喎，轉個身睇下？」
我好似一個公仔咁由佢舞，因為我真係唔識點處理好，只好順佢意。
但當我擰轉臉背向佢，佢突然從後抱住我。
一時之間，我個腦空白左。
我：「eh…」
Ada：「咩都唔好講。」
「要幸福吖，魯路修。」
佢講完之後就用力一下推左我出房。
Cherry同對花仔花女已經企左係度。
我同佢都無講野，只係呆左咁望住對方。
原來見到自己愛既人著婚紗係咁既感覺…
周圍既野我都望唔到，只係見到佢。
哇…應該由邊度形容起好..
一個原本已經完美無瑕既女人，再配上雪白既婚紗，長長既拖尾，完全係錦上添花，畫龍點精。
「你好靚。」
「你好型。」
我地同時開聲，搞到大家都笑左出黎，連對花仔花女都笑埋一份。
我牽起佢隻手，緊緊咁捉實，然後望住個度好大既門。
「呼~」
我不自禁咁嘆左一口氣，果然我仲係好緊張…
隻手開始出汗，心跳開始加速。
「lulu啊。」
Cherry突然叫我，我即刻成個人震左一震。
我：「咩事？」
Cherry：「你覺唔覺得呢，而家呢個場景好似曾相識？又係會有好多人注意我地。」
我：「你指去ball領舞果次？」
Cherry：「嗯，當時你又係咁緊張haha。」
果然比佢發現左啊…
我只好係度傻笑，整下件衫咁。
Cherry：「你記唔記得，當時我同你講左D乜？」
我：「eh…我唔止要你既世界，要埋我既身體？」
Cherry：「嗯，你記得就好，今次都係咁做就得，交哂所有野比我就得。」
我：「嗯。」
大門開始慢慢打開，會場入面好暗，同當年個ball真係好似。
射燈打落我地頭先坐緊既皇座之上，前面仲有張檯係度。
Cherry：「見唔見到果度？一條直路就係架啦，無事架，信我喇。」
就咁睇，又好似真係好短咋喎，我應該可以既…
應該…
「呼~」
我不自禁咁嘆左一口氣，果然我仲係好緊張…
隻手開始出汗，心跳開始加速。
「lulu啊。」
Cherry突然叫我，我即刻成個人震左一震。
我：「咩事？」
Cherry：「你覺唔覺得呢，而家呢個場景好似曾相識？又係會有好多人注意我地。」
我：「你指去ball領舞果次？」
Cherry：「嗯，當時你又係咁緊張haha。」
果然比佢發現左啊…
我只好係度傻笑，整下件衫咁。
Cherry：「你記唔記得，當時我同你講左D乜？」
我：「eh…我唔止要你既世界，要埋我既身體？」
Cherry：「嗯，你記得就好，今次都係咁做就得，交哂所有野比我就得。」
我：「嗯。」
大門開始慢慢打開，會場入面好暗，同當年個ball真係好似。
射燈打落我地頭先坐緊既皇座之上，前面仲有張檯係度。
Cherry：「見唔見到果度？一條直路就係架啦，無事架，信我喇。」
就咁睇，又好似真係好短咋喎，我應該可以既…
應該…