[找數][外傳]「空白的五年」: 隱瞞

佢好似好開心咁，實在太好了。 

佢而家笑到四萬咁口，搞到我都唔好意思講出口。 

我只好好似佢隻寵物傻傻咁俾佢拖住走，跟住佢返我屋企。 

佢明明話要去廁所換番套衫，但整整下又無左回事，就咁著住套校服周街行，搞到好多人望住我地。 

個感覺好羞恥，人地會唔會以為我地玩咩制服play？ 





所以我行左陣就忍唔住，叫佢去廁所換返套衫，佢仲問我點解，我求其話套衫太細你唔岩穿去打發佢。 

結果，我食左佢兩拳，不過嚇到佢急急腳咁走去廁所換衫。 

唉，女人。 

計埋今次，今日已經係第二次同佢坐巴士，但所有野已經唔同哂。 

我，已經記得六年前同佢既日子了。 





佢好似好攰咁挨係我膊頭度訓著左，我好識做咁定格自己，令佢可以訓得舒服少少。 

過左一陣，我地就已經到站，佢都唔知幾時醒左，可以自己落車。 

一落車，我就見到美星，佢都見到我。 

我：「唷 」 

Cherry：「家姐~ 」 





美星：「Hi…咦你地…魯路修你記得返嗱！？ 」 

可能因為佢見到Cherry挽住我隻手，仲笑得鬼死咁開心，所以就判斷我已經恢復記憶。 

唔錯既觀察力，俾8分你。 

我：「你估下。」 

我無正面答佢，因為我唔想對Cherry講大話，如果呢度得我同美星，我一定答佢「未」。 

事實上，我的確係記得番大部分六年前既事，但都只局限於六年前，仲要唔係全部。 

我覺得自己已經記得返所有同佢一齊既事，好似去日本旅行之類咁。 

但奇怪既係，我好似無辦法將呢D野一一咁串連起。 





我應該有某種原因先肯同佢去ball，有某種原因先敢咁大膽同佢去日本。 

但我就係唔記得呢個原因。 

而且，有關同佢一齊既事，我只係記得六年前，其餘五年都無乜印象。 

直頭好似果五年佢唔係我身邊咁… 

我唔敢坦白同Cherry講，我怕又會打擊到佢，令佢再一次唔開心。 

所以，今次我要暫時瞞住Cherry，自己諗辦法去記起剩餘空白左既記憶。 

尤其係果「空白的五年」。 





我或者需要D幫手，但我唔知可以搵邊個，我怕大家都會去話比Cherry知。 

暫時，唔可以話比身邊任何人知，代表住我又要行返秘密主義呢條舊路了。