[找數][外傳]「空白的五年」: 朋友

或者我地可以做既只有呢D。 

無人知道魯路修既記憶幾時先可以恢復同點先可以恢復。 

身為朋友既我可以為佢做既，應該只有盡量勾起佢既記憶，幫下佢儘快記起D野。 

所以我用左兩日時間安排呢一切，call返哂所有人，聯絡學校同埋老師，仲有準備校服。 

萬幸既係，大家聽到魯路修出左事都即刻出黎，連老師都話學校果邊佢地會搞掂。 





魯路修，你睇下大家係幾咁關心你。 

你一早已經積累左一大班既好朋友啦。 

所以，快D記返起呢幾年既野，然後同芷睛結婚啦。 

大家都等緊飲你個餐架。 

「好遲呀魯路修，趁Miss未到，快D坐低啦。」 





係呢一日，大家都陪魯路修返番去六年前。 

或者，呢D就係朋友掛。

魯路修：「點解大家..？」 

我：「快D坐低啦仲問。」 

唔知佢係咪俾我嚇親，好快就行去自己位度坐低。 





果然，停滯左係六年前啊… 

既然係咁，就等大家陪你返去六年前一日啦。 

雖然話目的係幫魯路修，但我自己都有少少得著。 

最近呢年，過得唔係太順，感覺好辛苦。 

身邊可以傾訴既人，又只有阿欣一個，但我又唔想成日同佢訴苦等佢為我擔心。 

結果就變成自己一個谷埋谷埋，成個人好多負能量。 

就係我幾乎頂唔順之際，佢兩個突然向我地宣布話要結婚，終於有件開心事。 

但最後又變成咁。 





所以我靈機一觸，召集返所有人，打算係中學同學入面尋找救贖。 

結果如我所料，再一次體會中學生活，再一次同呢班人一齊果然可以好開心。 

好似可以拋開一切煩惱咁。 

昔日既Miss都一一登場，同我地呢班超齡學生係度談笑風生，一齊回憶昔日趣事。 

好開心，除左開心都唔知可以講咩。 

無人刻意去提起魯路修失憶既事，亦無人主動去問佢有無記番起D乜。 

大家都順其自然，由得佢慢慢咁接收當年既資訊。 





中學既朋友真係好啊… 

正當我坐埋一邊，睇住魯路修佢同若晴成班人係度傾計果陣，有人拍左我一下。 

「呢段日子，辛苦你啦。」 

係阿欣。 

見到著住校服既佢，我突然忍唔住，挨落佢度。 

我：「啊…但我地可以做既都只有咁多啦，畢竟今日既主角唔係我地啊…」 

阿欣：「希望佢去到果度就可以記起呢一切啦。」 

我：「望就咁望啦，個傻仔應該起碼可以記起少少野既。」 





我見到魯路修拎起個電話，表情仲好疑惑，我就知道計劃已經進入軌道了。 

今日既野有無白費，就睇妳同個天啦。 

不過對我黎講，今日絕對無白費既。 

至少我好開心，重新咁過一日中學生活幾好玩幾開心。 

多謝你吖，魯路修，俾左個咁既機會我。 

快D記番起啦，我既兄弟。