校園愛情故事系列（不定期更新）: 《距離》

每一場籃球比賽,
莉莉都會去睇。
無論係校內定校外比賽。

雖然莉莉知道,
喺學校好受歡迎嘅佢,
唔會留意到自己。

不過莉莉去嘅目的,
只係想支持下佢見下佢。





有一次,
莉莉鼓起勇氣搵佢影相。
兩人之間嘅距離縮短咗,
不過依然有一陣隔膜。

記得嗰一次陸運會

-------------------------
莉莉諗左好耐…




見到前面嘅佢。
到底搵唔搵佢影相好?
「死就死喇!」莉莉心諗。

之後踏出左呢一步。
「可唔可以影一張相?」莉莉塊面紅哂咁望住佢。
「可以啊。」佢企左喺莉莉隔離。

莉莉亦張手機交比朋友,
叫朋友幫佢地影。





估唔到影完之後,佢竟然講左句…
「Send返比我啊,你應該知我IG嘅。」
----------------------------

自從嗰一次之後
莉莉每一次都會搵佢影相,
之後透過IG send返相比佢。
偶然仲會傾一兩句,
例如比賽加油之類嘅說話。

本來兩個人嘅距離因為咁而縮短,
不過…

莉莉心諗擔心成日搵佢影相,




佢會介意。
於是莉莉決定暫時唔再搵佢影相。
亦都冇去睇佢比賽。

久而久之,
佢發現到莉莉冇再搵佢影相,
就主動IG搵莉莉。

「你最近係咪忙緊考試?」

「冇啊,點解咁講?」

「之前次次比賽都見到你,不過近排比賽見唔到你..又冇搵我影相。我咪以為你忙緊考試先唔黎…」

估唔到,佢竟然留意到莉莉之前有去睇佢比賽!





「冇啊,我驚次次都搵你影相..你可能會介意,先暫時冇搵你。」

「傻喇,點會介意。有靚女搵我影相喎。」

之後莉莉同佢…
維持住友達以上戀人未滿嘅關係
彼此之間仍然有段「距離」。