【Ceci的故事】《越墮落越不快樂》: 七
(七)
我又諗起Kingsley。諗起佢點傷害我，諗起佢當日點樣同條女走左去，諗起佢... 唔係，係幻想到佢點樣同條女搞野。
個個男人都係咁，個個都係。
包括Kingsley，包括余家偉，包括呀豪，包括... 游灝謙。
... 佢真係... 會鍾意我咩，算把啦陳靜彤。
『不如聽日我地去行下街丫』嵐嵐wtsapp我同Apple，我地三個有個group，平時用黎傾八婆野同埋開心share(我)啲功課答案。
『好喎，唔洗陪Anson咩你』Apple秒回
『佢同啲fd去釣魚呀，無節目(笑喊)』
『唔怪得約我地啦(戴黑超符號)』
『咩喎！Ceci得唔得呀』
『嵐姐約到，我緊得架(笑喊)』
「做咩啊妳，好似有心事喎」呀豪訓係我隔離望住我碇開部電話
「睇黎我既偽裝功力有待改善」我笑左一笑
「想講我會聽」
「好似鍾意左個唔應該鍾意既人」
呀豪點點頭
「佢有女朋友，但佢又對我幾好」諗番起Alex成日對住我好溫柔咁笑，又摸我塊面摸「不過其實可能係我多心姐」係囉，可能佢對每個女仔都係咁。
「妳確定妳真係鍾意佢？」
我諗起勾引佢同佢搞野既畫面，我... 好似係真心想同佢做，係鍾意佢個隻想獻身俾佢。
「係... 掛」
「放手啦靜彤」呀豪攬住我條腰「妳會hurt多次」
我望住呀豪，佢眼神好認真。
我唔想再hurt多次... 就算要都係要我玩你。
「唔好鍾意我，唔好愛上我」
『我到左啦，你地係邊呀』
『轉埋個彎到，好快好快！』
『我塞車呀下個站到，sorry兩位大佬』我望一望外面條完全唔郁既車龍
『喂Ceci，我見到你嗰個中六靚仔拖住條女係天橋個邊喎！』嵐嵐岩岩sd出黎一秒，Apple已經緊接佢覆『真係架？喂你地有野咩做咩我唔知架！』
我未黎得切覆，嵐嵐已經sd左個過黎語音『你之前個排練oral唔得閒啊嘛，喂唔好講咁多，我跟下佢地先！』
我心諗，咩事呀你兩條友。
『我落左車啦，你兩個係邊呀』
『匯豐個邊間商務！快啲過黎！』
一過到去，就見到佢兩個係商務門口好highhigh咁等緊我
「乜你咁耐架！佢岩岩走左啦！」
「你兩個係咪痴線架，我同佢無野架囉」
「咩姐！岩岩諗住你早啲到就推你出去同個條女示下威架嘛」嵐嵐係度ff
「咪係囉！喂呀搞錯呀咁大件事都無話我知！」
「嗰個佢女朋友黎架頂」我真係頂佢兩個唔順，係都要逼我講出黎！「人地拍左兩年拖啦，做乜鳩呀你兩個！」
佢兩個見到我咁樣，嚇到呆左一呆即刻唔出曬，我就知我激動左
「對唔住囉bb，我地都係講下咋，唔好嬲唔好嬲」Apple即刻say sorry。
其實我都唔知自己點解會咁嬲。我根本唔需要咁激動，嵐嵐同Apple都係好似平時咁串下我講下笑咋嘛。
「係、係囉，唔講唔講，我地去行街街呀下」嵐嵐都即刻q住我同Apple走。
「食咩好呢，茄汁海鮮意粉好似好好食咁... 但我又想食白汁雞肉焗飯喎，死啦點算... 」
我地揀左間餐廳就諗住食左野先。
「好啦我諗好啦」
落完單，我地就係度吹水
「兩位呀？呢邊呀」
「咦Ceci」我抬起頭，見到Alex，同埋佢女朋友
「咁、咁岩既」我即刻露出笑容
「係啊，同女朋友拍拖」
「嘩你想曬我地？」我笑住講，但個心好唔知想點
「講呢啲」佢都笑左笑「咁我地過去先」佢指一指個侍應
我點左點頭，望住佢同佢女朋友行左過去。我望住佢地坐低，佢俾左件嬲佢女朋友著住，佢女朋友挨係佢身邊，佢地一齊睇緊餐牌，佢女朋友唔知講咩咁笑住拍左佢一下。
「喂Ceci你唔食既」Apple飲緊佢杯凍啡
「食、食呀，咩唔食，岩岩碟野熱呀嘛」我即刻回過神夾左啖意粉
「係呢岩岩講到... 」
我既目光又放番係Alex身上。佢幫佢女朋友洗餐具，切份多士，再餵埋佢食。佢女朋友臉上面掛住好幸福好滿足既表情。
點解呢種幸福並唔係屬於我？
Apple同嵐嵐仲係度傾緊啲八婆野，我就飲緊我杯檸茶。
「我地走先啦，byebye」Alex拖住女朋友行出門口個陣同我講
「嗯byebye」我見到佢女朋友都對住我好甜咁笑左一笑。
佢兩個拖住手並肩走左出餐廳。
望住佢地既背影，唔知點解眼淚好想流落黎。
我明明只係識左佢無幾耐，我明明開頭只係想勾引佢玩佢，但點解... 我望到佢同佢女朋友一齊，我個心會痛？
「你地話黑色定粉紅色靚呀」嵐嵐拎住兩條百摺裙
「粉紅襯你啲，其實白色都ok喎 」
「但我好多白色衫啦」嵐嵐話
「始終粉色岩你多啲姐」Apple一臉認真咁講「Ceci你話呢」
或者，我可以試下好似Candy咁，將Alex由Jessica身邊搶過黎？
「嗯？」
但係咁樣... 好似好賤格
「Ceci？」
呢個世界就係咁！賤既唔係我，係班男人！
「喂陳靜彤！聾左呀？！」Apple兜野拍落我手臂
「下？」我嚇一嚇即刻回神「咩呀」
「叫左你好多次啦頂你，諗緊乜呀」Apple舉起手上面個兩條裙「邊條襯嵐嵐啲呀？」
「喔... 粉、粉紅色靚呀」
「都話架啦！」
「好啦好啦，我買粉紅色啦」嵐嵐嘟起個嘴
「喂Ceci呀」嵐嵐同我地唔同路，所以係Sogo門口我地就分道揚鑣。我同Apple一齊行去車站
「嗯？」
「你... 無野呀嘛？」
「我？無呀，做咩呀」我有啲心虛
「你今日全日都神不守舍咁，係咪關嗰個F6事... 」
Apple就係咁，有咩都瞞唔過佢。我地F1識到依家，佢真係好了解我。
「唔係呀，琴晚溫書溫到好夜有啲眼訓咋嘛我」我講左個大話「係啦岩岩晏就sorry呀，我費事你地誤會我同佢咋，人地有女朋友唔係咁好呀嘛」
「我地都係講笑咋，點知你咁大反應」Apple頂一頂我「以為你真係嬲呀死人頭」
「我點會咁小氣」我笑住咁打左佢一下「係喎你同個st prince仔點呀」
「無咩點，佢乖仔黎」Apple係度甜笑
「下，成個mk樣咁」
「佢成績好好架，平時好少同fd出去，除左打波，放假多數溫書或者留係屋企，仲有！佢唔打機！」
「嘩岩曬你啦，悶到死」因為Apple係個種覺得拍拖唔洗成日出街，同男朋友係屋企攬住睇戲已經幸福死既人黎。
「係架，嘻嘻」
「你笑得好樣衰呀死姣婆，喂有車啦」
「bb，岩岩嗰個係你同學黎架？」
「係啊，佢F5」我拖住Jessica
「佢好靚女」
「聽聞校花黎」我諗起我班班男仔成日講起Ceci「但唔夠我女朋友靚」我對住Jessica露出個好charm既笑容
「口花花呀你」佢挨係我膊頭甜笑住咁講
無論我同Ceci上幾多次床，或者同幾多女人上床都好，我愛既只係得顧曉欣一個。由我愛上曉欣嗰一刻，我已經將性同愛分得好清楚。
「下！你真係同佢分左手？」我放低書包坐係呀豪隔離
「其實預左」呀豪好似無感覺咁，無咩太大既情緒變化
其實我諗過好多次，如果我有個好似呀豪咁既男朋友，我一定好好珍惜唔會放手。
或者佢係出面有搞第二個女人，或者佢係肉體上有對我唔住，但佢真係... 好好，對佢女朋友好好。
我記得佢同我講過，佢女朋友想要既，佢都一定去滿足佢。
今年只係Year1既佢，已經請過佢女朋友去幾次旅行。日本、韓國、泰國、新加玻，甚至巴黎同埋瑞士佢地都去過。
可能你會話，挑，有咩咁威威。但唔好唔記得，佢一邊要返工賺錢一邊要番學，仲要夠請埋女朋友去shopping去吃喝玩樂。個女仔自從同左佢一齊之後幾乎所有野都唔洗洗自己錢咁濟。
放工放學之後就去接女朋友放學，送佢番屋企，差唔多每日如是。
但佢條女，一到放假有時間就會搵班最佳損友去玩，朋友既地位絕對比男朋友高。
就算個男仔幾大方幾成熟都好，我諗都會唔開心會心淡掛。
「真係諗住就咁就玩完？」我望住呀豪
「我可以做既都做曬，佢話拍拖都係唔岩佢喎」佢慫一慫膊
「你有無唔開心」
「我話無就一定係呃妳架啦」佢苦笑左一下「點解我為左佢咁努力去付出，到頭來原來所有野都係廢，所有野都係無用。」呀豪呷左一啖啤酒「其實佢當我係乜，人肉提款機？」佢搖左一搖頭，然後又飲左啖酒「其實佢有無愛過我」
「或者佢未知咩叫愛啦」
「算啦，或者... 」佢挨係沙發「有時啲野真係無得勉強」
「唔好唔開心啦豪少」我將頭依靠係佢膊頭「下一個一定會更好既」
「嗯... 我地一齊加油喇」佢輕輕咁撫摸我既頭髮
我地... 一齊加油喇。