《台灣個表妹嚟咗我屋企住》【完】: (二十三)珍而重之

有人話過往生前，會睇到屬於自己最珍而重之嘅回憶。

我見到我自己企咗喺書展入口。

用自己第一身嘅視覺去睇返一條錄影帶，喺我腦海中拍低咗嘅影片，依家播返出嚟，呢一段往事浮現喺眼前⋯⋯

「乜你咁耐先嚟㗎！依家先到嘅⋯⋯」眼前嘅女仔語帶怒氣，翹住手對住我講。

睇嚟⋯⋯我激嬲女朋友，唯有就係死死氣咁認錯啦。





「sorry呀⋯頭先軒少唔放人呀。」

「我男朋友都敢唔放？搵日真係要話下佢先得！」呢個女仔霸氣咁話。「好心你都話下你啲朋友啦，我哋都要拍拖㗎，班友成鬼日捉住你⋯⋯」

「係嘅係嘅⋯⋯」

「算！唔講住喇，入咗去先啦。」說罷，佢就急急腳咁行先。

「喂！等下我先啦，阿琪。」





呢個女仔就係我中四時候嘅初戀情人阿琪，飄逸嘅長髮下五官分明而清秀，纖瘦嘅身型再加上較為霸道嘅性格，佢就係我曾經深愛嘅一個女仔。

亦因為佢嘅性格關係，所以作為男朋友我係長期畀佢食住，但係凡事我都好樂意去遷就佢，因此都好少鬧過交。

「阿星！快啲過嚟睇下依邊啦。」阿琪示意我過去，然後指住一本歷史書話：「呢本書個作者好叻㗎，研究好多台灣英雄㗎！」

「嗯嗯⋯」

「喂呀！乜你咁㗎，頹下頹下咁嘅。」阿琪開始有啲怨氣。





唉！女朋友依種生物真係難搞。

「唔係呀，頭先同軒少佢哋玩耐咗咋，所以先有啲攰啫。」 我嘗試降低佢嘅怨氣。「唔好嬲我啦。」

「哼！」阿琪漲起佢兩邊嘅面頰，扮一個嬲樣咁望住我。「唔理你呀！總之你應承咗今日同我出嚟就要專心啲呀！」

「當然啦！」我馬上扮哂好精神咁樣，雖然真係覺得有啲攰。

之後我哋就拖住手行咗去流行文學攤位嗰邊，雖然有好多人行嚟行去，但因為拖住阿琪嘅手，佢溫暖嘅手嗰種暖意柔柔咁暖住我嘅心靈，所以令我覺得好舒服，一啲都唔驚身邊有咁多人。

「阿星，嗰邊！嗰邊係簽名會呀！」阿琪向住我講。

「吓⋯邊個嘅簽名會。」我問。

「我最鍾意嗰個作家呀！」阿琪指一指一個畀好多人圍住嘅攤位。「佢得今日先會有簽名會咋。」





「咁快啲去排隊喇。」我話。

「但我想去個廁所先喎。」 聽阿琪嘅語氣都知道佢想點。

「唉⋯傻豬，頭先入嚟之前又唔去埋。」我用手篤一篤佢有少少肥嘅面頰。「我幫你排住隊先喇，快啲返嚟呀。」

「嘻嘻⋯⋯咁先至係我嘅好男友呀嘛。」阿琪露出一個奸奸地嘅笑容。

「得啦得啦，行啦。」

「係！」

我慢慢將隻手放開畀佢走⋯⋯





唔好放手呀！我睇呢個畫面卻無能為力，儘管我想用力去捉住阿琪隻手，但係控制住呢隻手嘅人並唔係我，我就只能眼白白睇住自己放手，放開屬於阿琪嗰一隻溫暖嘅手，我知道從此之後我再感受唔到任何嘅暖意。

點解我捉唔住㗎？

點解！！！

「阿琪！」