《台灣個表妹嚟咗我屋企住》【完】: 結局.後來的我們［完］

結局.後來的我們［完］


而另外一首我最鍾意嘅歌，就係《後來的我們》。

只期待 後來的你 能快樂
那就是 後來的我 最想的

唔知道過咗六年，小南你依家嘅生活如何呢？





我好希望你能夠幸福啦。

蔚藍嘅天空下，陽光普照，夜幕中嘅星星尚未出現。

我慢步回家，路過一個公園嘅時候。

就見到喺一個不顯眼嘅角落，有一個喊緊嘅細路女。

呢個畫面似曾相識⋯⋯





眼見個細路仔都生得幾可愛啊，圓圓嘅大眼睛，喊起上嚟惹人憐愛。

我走過去彎低腰，好溫暖咁問個細路女：「小妹妹，你怎麼了？你為何在哭啊？」

只見個細路女抬頭望一望我，再話：「姨姨⋯⋯不見了。」

「嗯⋯⋯」望落個細路仔都只係五、六歲，有咩理由佢啲屋企人唔好好睇住佢㗎？

「不要緊啊，哥哥帶你去找姨姨，好嗎？」我話。





「但是⋯⋯姨姨說不要跟陌生人走⋯⋯」細路女都有一定嘅警覺性。

「嗯⋯⋯那，我走了。」既然係咁，我都無謂插手去理會佢，希望佢個阿姨快啲帶走佢。

但當我轉身想走嘅時候⋯⋯

「咕嚕咕嚕⋯⋯」

我望望個細路女，只見佢耷低頭，扁晒嘴咁。

陰公囉⋯⋯我好驚會餓親佢。

於是我就提議話：「既然你肚子餓，不如哥哥買點東西給你吃，和你一起在這裡等姨姨，好嗎？」

細路女本身都有啲猶豫，但一聽到有嘢食，就馬上笑住咁點頭叫好：「嗯！」





跟住我就去咗買兩個甜筒返嚟。

同呢個啱啱認識嘅細路女一齊坐低食。

見到個細路女冇再喊，而係好開心咁食住個甜筒。

天真爛漫嘅佢開始放低戒心，同我傾起計嚟⋯⋯

「是喔，大哥哥，你怎麼會一個人的？」一雙水靈靈嘅大眼睛又望住我。

「我在這裡沒有親人嘛⋯⋯」我苦笑，然後問返佢：「你在等姨姨嗎？那你的父母呢？」

只見細路女本來露出嘅笑容因為我嘅問題而化為烏有。





佢淡淡然咁回答我：「我沒有見過爸爸⋯⋯媽媽在我剛出世時就走了⋯⋯」

走了，係離世嘅意思？

「對不起⋯⋯」原來我無意中勾起咗一個小朋友嘅傷痛，望見佢垂頭喪氣嘅模樣，我都安慰返佢：「其實我也沒有媽媽喔，她在一次意外中離開了我，所以你也不用傷心的，只要記着媽媽是最愛你的就好了。」

或者呢啲叫同病相憐，所以我特別明白佢嘅感受。

「都很久了，不要緊⋯⋯我還有姨姨嘛！我們繼續吃吧！」細路女又重拾笑容，好滿足咁食緊支甜筒。

咁細個就已經咁堅強，佢嘅內心一定好寂寞。

我望住甜筒，回想起六年前，我都係喺呢個環境下同小南定下我哋嘅六年之約。

「我一定會娶姐姐，六年！六年之後，我一定會娶姐姐！」





六年之約已經期滿，但係我連你都未搵得返，又點樣去實踐我哋呢個約定。

小南，我好掛住你呀！

我好想再見返你，完成我向你許下嘅承諾。

「嗚⋯⋯」回憶勾起，眼淚溢出。

我真係冇用，成日都喊⋯⋯

「大哥哥，你怎麼啦？」到咗細路女嚟安慰返我。

「沒⋯⋯沒有事呀。」我抹去眼淚，笑住咁話：「大哥哥只是突然想起一個人。」





突然諗返起你，可惜你又唔喺我身邊。

「繼續吃吧！不夠的話，大哥哥再去買給你。」我話。

「嗯！」細路女笑一笑。

之後，我哋一直喺個公園入面食住甜筒，食完就傾下計，陪下呢個好可愛嘅細路女玩。

忽然有一把聲音，伴隨一個高高瘦瘦嘅身形嚟到我哋呢邊⋯⋯

「星嵐！」

「是姨姨喔！」細路女拉住我指向嗰個方向。

眼見嘅人應該就係佢嘅阿姨。

「哈哈，姨姨來找你了，你快過去吧。」我輕輕摸一摸佢嘅頭。

「嗯！謝謝大哥哥你陪着我喔。」細路仔好有禮貌咁講。

「不用謝了，你快過去吧，再見了。」

「再見大哥哥！」

望住細路女回到佢姨姨嘅懷抱，我亦都默然地轉身離開。

小南，似乎我同你嘅約定冇法子達成得到。

但後來嘅你，應該幾幸福。

希望再有下一世，我會早啲記起你，記起我哋宿世姻緣，

然後再對你講三個字：

「嫁畀我。」

在某處 另一個你 留下了
在那裏 另一個我 微笑著
另一個我們 還深愛著
代替我們永恆著
如果能這麽想 就夠了






《台灣個表妹嚟咗我屋企住》全文完