《台灣個表妹嚟咗我屋企住》【完】: 結局.幸福嘅倒數.5

結局.幸福嘅倒數.5


一個客廳，一張圓枱，坐咗五個人喺度，頭上有一盞白燈滲出淡淡嘅光芒。

「好啦！小南，玩夠就返去啦。」外公好嚴肅咁話。

「唔制喎！」面對住咁有威嚴嘅外公，小南仍然可以展示佢嘅任性。「我係點～都唔會返去㗎啦！」

「點解呀？」外公嘅語氣又忽然變得溫文。「你唔係話過九月頭嗰陣就返嚟㗎咩？無啦啦又會過咗嚟香港㗎？」





我猛然發現原來佢哋四個人都講得一口流利嘅廣東話，但依家唔係重點。

重點係跟住小南就坐過嚟攬住我隻手，然後話：「之前話去台北係呃你咋，表哥話要娶我，我要同佢結婚，我要留喺香港！我唔返去㗎喇！」

一句說話，足以令外公不知所措。

「你⋯⋯你講真㗎？」外公問。

「係呀！星星表哥話咗六年後會娶我㗎！所以我唔會跟你返去㗎喇！」小南好堅決咁講。





「嗯⋯⋯係呀。」我和應。

估唔到小南真係記住我嗰日喺公園嘅一個承諾。

「係你老母！」外公又突然發難，衝過嚟一手將我嘅手臂扭斷咁滯。

「哎呀！唔好呀！斷啦斷啦⋯⋯」我痛到兩行眼淚直流，不停拍枱求饒。

「你個衰仔溝我嘅孫女？」外公好憤怒咁講。





「唔好呀外公！我都係你嘅孫仔嚟㗎！唔好扭斷我隻手呀！求下你呀！」我喊住咁求外公放我一馬。

如果再係咁，我嘅右手真係會畀佢活生生扯斷，我嘅下半身幸福都無埋，因為右手對我好重要，我平時都係用右手嚟做正經事情。

而呢種痛楚，相比起中南施加喺我身上嗰種，簡直係小巫見大巫。

「外公唔好呀！你再傷害表哥，我以後都唔睬你！」小南以威迫替我求饒。

「吓⋯⋯」外公心軟落嚟，開始放開我隻手臂。

「都係唔好啦！」說罷，佢又改變主意，用力扭多我一次。

「呀！！！」我慘叫一聲，可惜兩位表姐都袖手旁觀。





連小南都幫唔到我⋯⋯點算好呀？

喺呢個僵持不下嘅氣氛之中⋯⋯

我聽到鎖匙聲。

「星仔、小南，我返嚟啦！」

救星到啦！