《台灣個表妹嚟咗我屋企住》【完】: (一百一十一)無憾

「喂⋯⋯你攬咗好耐啦喎，攬完未呀？」

「唔⋯⋯我想攬多陣。」

「畀人望住㗎，我哋去行下啦⋯⋯」小南怕怕羞羞咁話。

「都好，唔攬你就拖下你啦。」說罷，我又牽起小南纖纖玉手。

「嘻⋯⋯」





離開令人煩躁嘅街道，我拖住佢行過一條充滿自然氣息嘅小徑。

「如果第時我哋結婚可以喺遠離市區嘅地方搞就好啦。」望住綠油油嘅景色，我講出咗心中想法。

「痴線㗎你？我邊有話嫁畀你喎？」小南狠狠咁鬧我，嘴角卻甜絲絲咁笑緊。

「你唔嫁畀我，仲有邊個肯要你喎？」

「我講過我好多人追㗎？你唔信呀？」





「我唔信有人會鍾意隻又蠢又肥嘅豬囉⋯⋯」

「你又話我係豬？哼⋯⋯」

小南故意鬆開我隻手，行快咗幾步。

我都加緊腳步追返上去，然後又拖返住佢隻手。

「我都未講完！除咗我之外呀，冇人肯養你呢隻蠢豬㗎啦，所以你呢世都走唔出我嘅五指山㗎喇。」





呢個環境同埋呢種氣氛，如果我有準備戒指，我一定諗都唔諗就會向小南求婚，要佢快啲成為我嘅妻子，要佢永遠都畀我保護住，要佢永遠都咁幸福。

「係喇係喇，口甜舌滑你最叻呀！」小南與我十指緊扣，佢笑住咁輕輕挨落嚟我嘅手臂上。

有你，陪着我走過呢條甜蜜嘅小徑。

人生已算是無憾。