《台灣個表妹嚟咗我屋企住》【完】: (一百零九)被愛也能哭泣

回神過嚟，我發現我喺自己間房入面瞓咗喺度。

身邊有一個坐喺電腦凳上嘅小南。

「你醒啦？」小南好緊張咁問。

「嗯⋯⋯」我緩緩咁坐返起身。「發生咗⋯咩事？」

「你頭先喺姨丈間房入面喊呀，仲要喊到成個人好似失哂魂咁，姨丈同我見到你咁咪過嚟安慰你囉，點知你又一時喊下、又一時笑下咁，嚇到我哋都唔知點算好呀！」小南依然有啲慌張。





「吓⋯⋯咁跟住呢？」我問。

「跟住⋯跟住姨丈就同我扶你入嚟瞓低，你一瞓低就瞓到依家啦。」小南以另一個角度將頭先嘅事好詳細咁講我知。

「乜有啲咁嘅事咩？」我好似完全冇晒印象。

「你真係完全唔記得？見住你喊㗎喎⋯⋯」畀女仔見到個男仔喊晒口咁，真係有啲唔好意思。

明明男仔唔應該咁柔情似水，但我就係個咁嘅人，好容易表達出自己嘅情感，但同時又好鍾意強迫自己收埋呢啲情感。





搞到谷住谷住，直到某一日就忍唔住爆出嚟⋯⋯

因為媽媽嘅緣故，搞到我又忍唔住⋯⋯

「哈⋯⋯哈⋯⋯小南⋯⋯我⋯⋯」

我好想搵人同我傾計呀，我都唔想將自己嘅心事收埋哂㗎。

「我好⋯⋯唔開心呀⋯⋯」





「有咩事咪同我講囉。」小南靠近過嚟，將我攬入佢嘅心口。

軟軟地、暖暖地嘅感覺⋯⋯好舒服。

喺呢個空間裡面，我個心真係可以靜得到落嚟。

或者我一直等待緊，就係一個可以將我拯救嘅人。

我終於明白點解阿爸會咁驚我入佢間房，

原來係怕我會諗返起媽媽。

「呀⋯⋯哈⋯⋯」我倒在小南溫暖嘅懷內無聲哭泣。

「我喺度呀表哥，有咩事都可以講我知㗎。」小南溫柔咁輕撫住我嘅頭。





暖暖嘅手，提示住我可以做返自己，盡情咁釋放情緒。

有咩咪同我講囉。

有咩事都可以講我知㗎。

我都唔知道有幾多年都聽過呢啲說話⋯⋯

淺白簡單嘅說話要做得到，好難。喺生活嘅圈子入面搵到一個樂於聽我傾訴嘅人，亦難。

一直以嚟，我都只係同小南談「話」，但從來冇談「心」。

情話再多，也不及一個擁抱。





「咁⋯⋯我話你知㗎啦⋯⋯」我閉上眼睛，感受小南給我嘅餘溫。

「嗯，你講啦，我聽緊⋯⋯」佢平淡而溫柔體貼嘅聲音，令我好有安全感。

「其實⋯⋯」

其實我好唔開心。

冇咗媽媽嘅生活，唔單止冇咗一餐住家飯咁簡單。

中一入學，每個小朋友都會有一個家長陪伴佢哋出席唔同嘅講座，家長為佢哋嘅小朋友入學做好哂準備，而我嘅阿爸因爲要返工所以冇嚟，掉低我一個孤單咁坐喺一角。

仲有⋯⋯每一次見到啲同學帶飯喺學校食，聽住佢哋炫耀自己嘅母親整咗啲咩嘢畀佢哋食嗰陣，我個心好難受，因為我連母親都冇，更遑論係一餐飯。

初中嘅一篇作文，題目係《我的母親》，要我哋寫下對母親嘅感恩，多謝佢哋默默付出去養育我哋，提醒我哋要好好孝順佢，但係我嘅媽媽唔喺度⋯⋯我連報答佢嘅機會都冇⋯⋯





有次學校搞埋啲親子活動，叫我哋帶埋屋企人嚟BBQ，嗰次阿爸有嚟，但只有阿爸一個嚟咗，所謂嘅親子活動根本就唔係嗰回事，望住身邊啲同學都有媽媽去煮啲嘢畀佢食，我個心好酸呀⋯⋯

我真係好討厭生活喺單親家庭呀⋯⋯

我要畀身邊嘅同學早幾年學識獨立，一日三餐、衫褲鞋襪，全部都係自己搞掂，所以早早就捨棄咗童年。

缺少咗母愛嘅我，以為可以喺鍾意嘅女仔身上搵返「愛意」，點知最後又分手收場，加深咗我嘅痛苦。

諗住仲有啲好朋友會支持一下我，但係我連知己都唔願意同佢哋交心，一次又一次推開佢哋，最後連朋友都唔多個。

同阿爸阿哥嘅相處又唔多，莫講話傾訴，連傾計都少。

就係咁一步一步作繭自縛，形成依家嘅我。





其實我⋯⋯好想被愛，被人照顧。

我都唔想將我嘅感受收埋㗎！！！

唔知道小南聽完之後，會唔會明白我呢？

「我明呀⋯⋯我都冇爸爸嘅⋯⋯」

「嗯？」

講起嚟，真係冇聽過小南提過佢嘅爸爸。

「雖然我仲有外公⋯⋯但外公取代唔到爸爸⋯⋯所以我好明白你嘅心情㗎。」

「小南⋯⋯」

「做咩呀⋯⋯」

「冇⋯⋯」

我覺得自己，終於感受得到咩嘢叫做「被愛」。

我被小南深愛住，同時我亦都深愛住佢。

世界上冇嘢再可以比得上呢一刻。

「你攰就瞓下啦。」

「嗯⋯⋯」

「我氹你瞓啦。」

「嗯⋯⋯」

呢一晚，我變咗小南平時嘅角色，變咗一個好平凡嘅小朋友，好平凡咁享受住愛意，好平靜咁休息。