《台灣個表妹嚟咗我屋企住》【完】: (一百零七)房間

「阿爸我入你間房拎啲相呀！」我喺廁所門外，同阿爸交代一聲。

「吓？喂！星仔！」

我無視咗阿爸嘅呼叫，打開咗門，然後入到去阿爸⋯同媽媽間房。

我仲記得，好細個嘅時候成日都要嗲媽媽，要求同佢一齊瞓。

眼簾內嘅呢張床，好熟悉。





喺房間入面嘅擺設，自從媽媽離開咗，一路都冇變過。

我行近放滿相簿嘅櫃，拉開個櫃嘅同時，將入面盛載嘅回憶同時拉埋出嚟。

相片，係記錄低人物、同事物嘅變遷。

我隨手拎起其中一本相簿，打開嘅第一頁，係一張全家福。

當年仲係襁褓中嘅我，如今已經係一個牛高馬大嘅青年。





當年有烏黑頭髮嘅阿爸，如今已經變得白髮滄桑。

當年可以溫暖我心靈嘅媽媽，如今已經⋯⋯

點解⋯⋯張相突然會濕咗⋯⋯

點解呀⋯⋯