《台灣個表妹嚟咗我屋企住》【完】: (一百零三)唔敢問

「咁你又會點呀？如果我死咗。」我問。

「我會令你翻生！」

「你係咪睇得太多小說傻咗呀⋯⋯」我又出動手指彈一彈小南嘅額頭。「傻豬，就算死呀，都係我哋兩個老咗嗰陣啦，問埋哂啲白痴問題！」

「你就白痴！問定先唔得咩？同埋⋯⋯同埋⋯⋯嗰個魔咒都唔知會唔會實現㗎？」

魔咒？嗯，之前講嗰個宿世姻緣。





「我都話過嗰啲嘢冇可能會實現，你唔好咁迷信啦。」

「我都係諗下啫⋯⋯」

真奇怪，明明我都係個諗得好長遠嘅人，會諗埋未來點樣發展落去，偏偏會唔敢諗「離別」嘅一刻係點，或者到咗我兩鬢斑白嗰陣，先至有勇氣去問。

我同小南會唔會分開呢？

其實作為男朋友都有好多白痴問題想問，只係冇宣之於口。





可能到咗某個冇得再退步嘅位置，人先至學懂開口去講出心聲。

但呢種心態最可怕嘅地方係，正如剛才套戲嘅男主角一樣，直到最後一刻先敢講，可惜已經太遲⋯⋯