《台灣個表妹嚟咗我屋企住》【完】: (一百)相戀係世上最美好嘅事情
人嘅一生，可能會遇上好多鍾意嘅人。
但鍾意，並非等於擁有。
所以可以擁有自己鍾意嘅人，係一件好幸福嘅事情，因為對方都認定咗你，先會願意陪伴你嘗試白頭偕老，一段關係能否走到最後係後話，最重要係識得珍惜眼前同對方一齊渡過嘅快樂時光。
相戀、拍拖，要經歷好多麻煩嘅事情。
而呢啲麻煩嘅事情就正正可以反映出兩個人係咪真係適合喺埋一齊，當中產生嘅磨擦，可以認清對方嘅性格，知道彼此係咪夾得埋。
有啲人，會喺途中離開。
有啲人，會選擇堅守到最後。
視乎你覺得值唔值得為對方付出咁多。
我好慶幸可以能夠同小南同居，因為同居，令我更加清楚我哋嘅性格真係好夾。
例如我唔識煮飯，但小南就可以炒得一手好菜，入得廚房出得廳堂。
或者係我份人比較細心，而小南就粗心大意啲，我份人容易比負面情況影響，但小南就永遠都咁陽光氣息，甚至將佢嘅開心分享畀我，所以性格上亦能互補不足。
有人話過：相見好，同住難。
相見好，係因為雙方根本都唔熟悉大家；同住難，係因為要去認識真正嘅愛人。
直到阿琪離開我嘅一刻，我先至發現其實我唔熟悉佢，不斷質疑緊係咪自己有唔啱嘅地方，係咪自己做錯咗嘢，但後來先發現皆因我唔明白佢，所以先至會咁諗。
但係當小南嚟到嘅時候，同佢可以毫無顧忌咁生活而冇出現任何爭執，我覺得同佢相處既舒服又自在，雙方能夠坦誠而冇秘密存在，咁就已經係真正認識咗自己深愛嘅人。
我哋呢對情侶真係比起一般人幸福好多，有一個蝸居畀我哋兩個居住，又唔使驚憂柴憂米。
功利社會下嘅情侶，好多都會因為一層樓同埋身份地位嘅懸殊而分手。
可惜現實終歸現實，冇話啱定唔啱嘅，人越大諗嘅嘢就越多，連拍個拖考慮嘅因素都多都數唔哂，已經冇可能好似細個咁純粹因為愛而一齊。
現階段我同小南都未踏入呢個社會，所以唔使驚住，但我估總有一日都要被迫向現實低頭。
有好多人成日笑我諗乜都諗得好長遠，好似遠到遙不可及⋯⋯
不過未來，唔係遲早都會嚟到㗎咩？
相戀係美好，但我總會不自覺咁諗得好遠，可能係我已經察覺到幸福似乎倒緊數⋯⋯
「喂呀！你做咩呆下呆下咁㗎，套戲都做完啦！」耳邊傳嚟一把語氣幾不滿嘅聲音。
「嗯？」我捽捽眼睛。
我坐喺光猛嘅戲院入面，而小南就挽住我嘅手，鼓起泡腮咁望住我。
咦⋯⋯我好似諗嘢諗得太過入迷。
「又係你話嚟睇戲嘅⋯⋯瞓着都有㗎⋯⋯」我留意到小南臉上有淚痕。
「咦⋯你做咩喊呀。」我搣一搣小南塊面。
「我邊有喎⋯⋯」
「你當我盲㗎咩？」
「套戲感動呀嘛⋯⋯」
之後我哋喺戲院離開，我拖住小南塊去到一間餐廳鋸扒。
我好耐都冇嚟呢度⋯⋯唔會過於浮誇嘅裝潢，再者食物嘅質素又唔差，所以媽媽好喜歡嚟呢度食嘢。
嗯⋯⋯對上一次嚟嗰陣，坐喺我對面嘅係媽媽。
位置一樣，人物唔同咗。
依家坐我對面嘅係我嘅女朋友。
睇住小南拎起刀叉，傻呼呼咁喺塊牛排上面掃下掃下咁，真係好搞笑。
「哈哈⋯哈⋯哈⋯」我笑到手都軟埋，連刀都揸唔穩。
「你笑乜呀？」小南惱羞咁望住我。
「笑⋯笑你唔識切囉⋯哈⋯」我笑點實在太低，忍唔到。
「哼！我平時喺屋企都切開菜㗎啦！唔識切唔得咩？」小南繼續喺塊排上用力掃兩掃。「哎⋯點解切唔開㗎⋯」
「唔識切就交畀我啦。」我笑住話。
「唔識切？我切咗你啫啫都得呀！」小南一講，我就下意識立即撳住自己下體，感受到淡淡嘅悲衰。
乜小南咁粗魯㗎？可能真係上得太多討論區，吸收咗太多齷齪嘅思想，學壞了。
但佢一講起，我就不自覺地諗起嗰晚同佢相好嘅情景去。
「喂呀！又發怐愗嘅？」小南阻止咗我嘅遐想，將佢碟牛排推過嚟畀我。「你係咪幫我切㗎？」
「又話唔使我⋯⋯」我拎起刀叉幫小南鋸好哂一小舊。
「我犧牲咗咁多嘢畀你呀，做少少都咁多怨言！」小南雙手放喺枱上面托住下巴，漸露出不滿嘅神情。
明明佢嚟完M超過成個禮拜㗎啦，點解仲係咁好火嘅？唔遇佢每個月會嚟兩次⋯⋯
不過小南講得啱，為咗我，佢真係犧牲咗好多嘢畀我，所以我更加唔可以辜負佢。
「哼⋯衰人星，頭先咁都可以瞓得着㗎，明明套戲咁好睇。」原來小南係嬲緊我啱先喺戲院冇睇嗰場戲。
「咁你講返畀我知咪得囉。」我話。
「點同㗎？好似搞到得我一個睇咁。」
「我都有睇⋯⋯少少㗎。」
「即係冇睇啦！」小南搖一搖頭，語氣一轉變得溫文：「唉⋯⋯係咪想我講你聽呀？」
「嗯！」我點頭。
「嗱⋯⋯個故事呢，就係話⋯⋯」喺小南準備講故仔嘅時候⋯⋯
「等等先！」我用支叉拮起塊肉放喺小南嘴邊。「我知你肚餓㗎啦，食咗舊肉先再講啦。」
「表哥你真係知我心⋯⋯好呀！我唔客氣啦！」小南滿心歡喜咁擘大口，笑𣉢𣉢將頭靠近過嚟。
正當佢想一啖將塊肉食咗嘅時候，我就將支叉慢慢移向我口中，然後我就好快咁一啖食咗落肚，而小南就食咗好多空氣。
「唔⋯⋯牛排真係有牛味！」我從咀嚼中細味，好得戚咁望住小南。
「你呀！」撲咗個空嘅小南本來唔知發生咩事，但一見到我嘅樣，就馬上嬲爆咁話：「又恰我！衰人！衰人！衰人！」
「你想食就梗係自己拮㗎啦，唔遇我餵你咩？哈哈⋯⋯」我理性咁向小南解釋。
只可惜多次受到屈辱嘅佢，已經忍無可忍，進入咗瘋癲狀態，再一次擘大口⋯⋯不過今次係起埋身向住我咬過嚟。
「呀呀！咬死你！」面對小南虛張聲勢嘅攻擊，我就拍一拍佢額頭。
「哎呀！」受到重創嘅小南就瞌埋眼坐返喺凳上面。「好痛呀⋯⋯」:-(
「吓⋯⋯我好細力咋喎。」我呆咗一呆。
「唔理你呀！總之我好痛呀！」小南好任性咁講。
「對唔住囉，咁你想點呀⋯⋯」諗諗下，我驚自己可能真係有啲無情力整痛咗小南，所以有啲歉意。:-(
小南嘅回應就係笑笑口咁指住自己個嘴，然後話：「錫錫！」
吓？咁細路女㗎，要向我索吻都有嘅？
雖然我好樂意咁做。
「好囉。」說罷，我就起一起身將個身體靠緊過去，再錫咗小南甜甜嘅嘴唇一下，同時我將自己嘴唇上留住嘅牛扒肉汁印埋落去。
「嗱！今次真係餵你食啦，肥豬南。」我再拮起一塊肉，緩緩地放入小南口裏面。
「本小姐就信多你一次啦！」說罷，小南就狼吞虎嚥咁從我手上食咗塊肉，然後好滿足咁咀嚼：「好好味呀！」
「因為我切得好啫。」
「邊關事喎？」
「好過有啲人連切都唔識啦⋯⋯」
「邊個話㗎！」被我挑釁一下，小南就暴跳如雷咁拎起刀叉繼續喺塊牛扒上掃下掃下。
明明唔識又扮識⋯⋯
「哈哈哈哈⋯⋯哈⋯⋯」我捧腹大笑。
「唔準笑呀！再笑切咗你先呀！」持刀嘅小南好凶狠咁望住我。
「okok⋯⋯」畀佢咁恐嚇，我立即笑唔敢笑。
我諗當雙方所付出嘅可以係對等嘅時候，先至可以不停咁打情罵俏而唔會破壞關係，反而有所增益。
如果可以，畀我一直沉醉喺咁溫馨嘅空間入面好冇？
無論係單戀定係偷戀，都遠遠不及相戀咁好。
我覺得⋯⋯只要相戀之中冇殘忍嘅成份。
相戀就真係世上最美好嘅事情。
起碼喺呢一刻，我覺得係。