《台灣個表妹嚟咗我屋企住》【完】: (九十八)露營裝備

呢一日返到屋企，就有個好詭異嘅現象出現咗⋯⋯

喺我眼前，居然有個非常齊全嘅露營裝備擺喺梳化上，而且我仲認得呢套裝備全屋企得一個人有，唔係我亦唔係阿爸，係阿哥⋯⋯

唔通阿哥佢返咗嚟？#oh#

我望向阿哥間房，見到房門半開，更聽到入面嘅腳步聲向住我傳嚟。

講起嚟，我好似爭阿哥一句對唔住⋯⋯





而一個嬌滴滴嘅身影就喺房入面步出嚟⋯⋯

「表哥！」原來眼前係我好蠢嘅女朋友。

我諗係我多心，但阿哥究竟會唔會返嚟？我總覺得對佢有種虧欠，即使有啲嘢無法挽回，但我都好想對佢講一聲對唔住，至少佢要肯畀個機會我講。

如果當初我識講大話就好啦，諗諗下我雙眼嘅眼眶仲有啲紅添⋯⋯

「喂喂！做咩呆咗呀！你喊⋯⋯呀？見到我都唔使喊㗎喎。」小南行到我面前，擘大雙眼望住我。





「白痴！冇呀，我邊有喎。」我捽一捽眼睛，好快就冇事。

「真係冇？」

「都話冇囉。」

「咁就好啦，嘻嘻⋯⋯咁你快啲過嚟睇下啦。」:D 說罷，小南就拖住我隻手去到梳化度。「見唔見呀？我喺大表哥間房搵到㗎！」

呢啲裝備連我都唔知我阿哥收埋喺邊，但小南都可以搵到出嚟，可想而知，女教師對佢嚟講其實都唔難搵出嚟。





「但係你知道係乜嘢嚟咩？」我問，心諗小南必定唔知道。

「嗯⋯⋯我上網見討論區啲人話用嚟喺山上面瞓覺㗎。」小南拎起個營，再話：「但係我諗極都諗唔到點樣瞓上去喎⋯⋯」

「啱一半啦，哈⋯」

望住小南拎起個未開嘅營，以為可以就咁瞓上去，真係幾好笑，枕頭咩？

初中曾經做過童軍嘅我，對於露營依樣嘢其實早就駕輕就熟，如何起營、起爐、原野烹飪，我仲一一記得。

既然阿哥都留低咗個營喺度，作為細佬，我好應該善用一下，於是我就同小南講⋯⋯

「咁就等我今日帶你去用下依樣嘢啦！」