《台灣個表妹嚟咗我屋企住》【完】: (七十九)溫柔
可能個沙灘太多人嘅關係，小南同我都冇話好熱衷去行下，反而買咗個沙灘蓆，去到一個比較少人嘅地方坐低。
但我呢個唔止有夢遊，仲有過度活躍症嘅表妹點會乖乖坐喺度，坐陣唔夠一陣，佢就已經叫我同佢一齊除咗對波鞋同埋對襪，然後拉住我赤腳咁喺沙灘上緩步咁走。
幼幼嘅沙，微微海風。
見住小南行向大海，着住短褲嘅佢施施然咁行落海，無懼一波又一波想將人吞噬嘅海浪。
「表哥你過嚟呀！」小南大聲嗌我。
「做咩呀？」我就聞言行過去。
「你頭先咪話過你識游水嘅？」
「嗯，係呀。」
想必表妹又要嘮嘮叨叨咁再三提醒我如果佢遇溺要去救佢。
點知唔係⋯⋯
「咁你識唔識飲海水呀！」小南雙手插入水中，然於再運勁向上，將大量海水潑向我。
毫無防備嘅我反應唔切，就咁中咗佢嘅暗算⋯⋯
「屌！」畀表妹搞到我成身濕晒，仲有一陣鹹水味。
「你大獲啦！」
我就梗係不甘示弱，馬上落水潑返佢以示反擊，小南亦因此連續迎面中咗我幾下鹹水攻擊，令佢雙目緊閉。
「咳⋯咳⋯好鹹呀⋯」小南睇落好無助。
「哈⋯⋯海水梗係鹹㗎喇。」我就擺出一副王者嘅姿態。
小南立時對住我露出一副不甘心嘅樣子，似乎係不甘心我成日都可以玩到佢，呢個模樣雖然有幾分可愛，但更值得留意嘅係⋯⋯佢嘅上半身因爲我嘅反擊，成件衫濕晒⋯⋯
一件濕透嘅白色公仔T恤，仲若隱若現見到佢粉紅色嘅胸圍，只不過隻公仔圖案太大，將大部份嘅位置都遮住咗，所以實際上冇咩睇頭。
「我唔會放過你㗎！」小南想先聲奪人。
「哦！」但我再次揮手一潑，瞬間滅晒佢嘅威風。
「喂呀！可惡呀！呀！」
跟住我哋就開展一場潑水大戰。
小南喺失控嘅情況下，就咁向我胡亂潑水，但佢越亂，攻擊亦都越亂，基本上係完全撥我唔到。
只有我每一次都兜口兜面潑中佢塊面，搞到小南好似傻咗咁任我玩。
「喂呀！」
終於小南忍唔住，真係傻咗咁向住我衝埋嚟，似乎想用近身戰分勝負。
我就一邊潑多佢幾下，一邊走返上沙灘。
殊不知呢個表妹居然出茅招⋯⋯
佢隨手拎起一堆沙，一嘢潑過嚟⋯⋯
「嘩！」我大吃一驚。
今次，係搞到我成身都痴住啲沙。
冇得沖涼換衫都唔知點算好⋯⋯
既然小南都唔留情面，咁我都豁出去了。
我先彎腰用手拎起一大堆沙，然後奸笑住咁向小南步步逼近。
「嘻⋯⋯嘻嘻嘻⋯⋯嘩屌！」點知喺有限距離之下，小南又快快手潑多我一下，呢次係我塊面食晒沙。
「哈哈！」小南好滿意自己成功攻擊到我，相當欣喜咁哈哈大笑。「哈⋯⋯表哥你成面都係沙啦！成個沙僧咁呀！」
「沙僧塊面冇沙㗎！」趁佢仲笑緊嗰陣，我迅速跑到佢背後，然後揸住成手沙隊落佢個頭度。「嗱！你依家就似蜘蛛俠入面個沙人啦！成身都係沙⋯⋯哈哈⋯⋯」
「衰人表哥！！！」小南不顧一切向我揮拳。
「喂！係你出茅招先咋⋯⋯」我就一邊講，一邊畀表妹追住。
「畀我潑返幾下先啦！你潑咗我幾多下⋯⋯唔公平呀！」
「邊有得咁㗎？係你自己渣咋。」
「咪走住呀！」
「追到我咪畀你潑囉！白痴表妹！」
「你睇住嚟啦！」
到最後同小南喺沙灘上嬉鬧咗好耐好耐，佢中咗我幾招，我又食咗佢幾拳，而我同佢亦因此成身都係又濕哂，又痴哂沙。
玩到差唔多覺得有啲攰嘅時候，我哋就返去頭先張沙灘蓆度坐低休息下⋯⋯一邊望住日落美景，一邊抖返順條氣。
望見表妹個身又濕，喺海邊嘅風又大，我就將放喺背囊嘅灰色褸拎出嚟蓋喺佢身上，費事佢一陣冷親。
「嗱！咪話我成個恰你啦！」我話。
「嘻⋯⋯唔該表哥。」小南甜絲絲咁笑住，慢慢將個頭挨落我膊頭。「但你畀我蓋住⋯⋯咁你咪會凍親囉？」
「表哥好大隻㗎！唔會嘅⋯⋯」雖然呢刻我都覺得啲風吹到我好凍。
「一係我畀一半你蓋啦。」小南拎起件褸話。
「吓⋯⋯咪傻啦，邊有一半㗎⋯⋯」我未講完，小南就已經攞件褸蓋住我半邊身，而佢半邊身就空咗出嚟。
「我驚你凍呀⋯⋯」小南溫柔咁話。
「哦⋯⋯」
其實表妹份人有時都幾細心，變成賢妻良母嗰陣又幾討人喜歡⋯⋯變成白痴小南嗰陣又好玩得⋯⋯
小南就咁挨喺我膊頭，同我一齊望住日落照映發光醉人嘅海面⋯⋯
耳邊偶然地奏起了一首歌⋯⋯
https://www.youtube.com/watch?v=nWb_X3ZJQjw&app=desktop&app=desktop
走在風中 今天陽光 突然好溫柔
天的溫柔 地的溫柔 像你抱著我
然後發現 你的改變 孤單的今後
如果冷 該怎麼度過
自從表妹嚟咗，真係令我尋回嗰啲真正嘅「快樂」。
天邊風光 身邊的我 都不在你眼中
你的眼中 藏著什麼 我從來都不懂
沒有關係 你的世界 就讓你擁有
不打擾 是我的溫柔
只係我哋明明咁親近，偏偏有種無形嘅隔膜⋯⋯
不知道 不明瞭 不想要 為什麼 我的心
明明是想靠近 卻孤單的黎明
雖然我作為表哥，係應該好好照顧表妹，喺佢身邊守護住佢⋯⋯
不知道 不明瞭 不想要 為什麼 我的心
那愛情的綺麗 總是在孤單裡
但我對佢嘅感覺，好似已經超出咗嗰條界線。
再把我的最好的愛給你
我諗我真係鍾意咗佢⋯⋯
伴隨住日光嘅落下，而我嘅眼皮亦覺沉重咁緩緩下垂⋯⋯