《台灣個表妹嚟咗我屋企住》【完】: (七十五)值得

跟住我就同小南去行街，沿途見到好多嘢食，有幾多我就要買幾多，但係食嘅就係小南佢。

買咗個刨冰之後，小南捧住嚟大啖大啖咁放入口，望住嗰啲冰鋪滿成個杯面，甚有涼氣，同曬到出汗嘅我形成對比。

「我都想食呀⋯⋯」我好無奈咁將心底話講出嚟。

「冇得食喎！作為你偷食我粒魚蛋嘅懲罰！」小南話。

「畀我食啖啦⋯⋯」我頹下頹下咁靠近去表妹度，對住佢兜刨冰虎視眈眈。「我熱死㗎喇，畀我食下啦⋯⋯」





「唔得呀！冇得傾！」小南好堅持咁拒絕我。

「唔好啦，畀一半我食啦。」我就採取死纏爛打嘅攻勢。

「唔得喎。」

「兩啖囉。」

「唔得呀。」





「一啖啦。」

「都話唔得囉⋯⋯你識唔識聽中文㗎？」

「半啖啦好冇呀？」

「表哥你好煩呀！」

最後唔知同小南喺條街上糾纏咗幾耐，佢先心軟話畀半啖我食，當然我就梗係食多咗幾啖啦。





我哋一直咁打情罵俏，嘈嘈下就走到海邊一間嘅單車鋪。

然後小南就無啦啦向我提議⋯⋯

「表哥呀，不如我哋去踩單車好冇呀？」

而喺我答佢之前，就已經畀拉咗過去租單車。

原先我仲諗住同佢一人一架單車，點知小南竟然打算⋯⋯

「老闆，唔該我要嗰架三輪車！」

佢竟然打算踩三輪車？

唔使問阿貴，佢一定係諗住要我踩，然後車住佢周圍去。





呢個表妹真係好醒目⋯⋯

而事實上的確係咁，轉眼間我就踩緊架三輪車，而坐位上有一個又大食又肥嘟嘟又當我阿四嘅表妹，其實點解我要畀佢咁樣勞役呀？我都唔知點解，就好似呢個世界上好多嘢咁，都唔知點解要去做，但係偏偏要去做。

慢慢諗下諗下，我先覺得做呢樣嘢嘅目的係為咗令小南開心，見到佢笑，好似做咩都係值得。