《台灣個表妹嚟咗我屋企住》【完】: (七十二)大魚蛋

而呢條IQ嘅解答時間就係喺今日離開長洲之前，只不過同表妹打打下街，當佢見到數之不盡嘅美食後，就立即冇咗回事，只著眼於眼前嘅美景。

「表哥我要食呢樣！」

「表哥我要食嗰樣！」

「喂喂喂！嗰個好似幾好味咁喎！」

發現新大陸嘅表妹，又再一次鬼殺咁嘈不停呼喚我嘅⋯⋯銀包。





我呆住咁畀表妹拉嚟拉去，就咁篤咗一串大魚蛋。

只見佢迅速咁拎起就咬咗粒嚟食，好滿足咁款，嘴角仲有啲汁留喺度。

「哈哈⋯乜表妹你食親嘢都咁冇儀態㗎。」我話。

「咩呀？好味嘛！有咩所謂喎⋯⋯」說罷，小南就準備去咬埋第二粒魚蛋。

「等陣先呀！」我馬上喝停佢。「喂⋯魚蛋就得兩粒，表妹你唔係想一個人食哂呀？獨食難肥喎。」





「吓⋯唔得咩？哼⋯鬼叫你恰得我多咩呀？咁好食嘅嘢梗係唔畀你食啦，哼！」

又嚟呢招？明明就係我畀錢⋯⋯

好！你有張良計，我有過牆梯。

見住小南想無視我，再一次打算咬落去粒魚蛋嘅時候，我都再一次喝止佢：「等等先！」

小南停低咗動作，然後問我：「做咩事呀又？」





「表妹你個嘴好似污糟咗喎⋯啲汁喺哂度，想留低做宵夜呀？」我話。

「吓⋯係咩？」小南問。

「係呀，我畀張紙巾你抹下先啦。」我喺褲袋拎咗紙巾出嚟遞畀小南。「嗱⋯⋯」

「唔該表哥⋯」

小南開始用紙巾清潔緊自己個嘴⋯⋯

咁即係話⋯⋯

機會嚟喇！飛雲！

我以迅雷不及掩耳之勢，烏低身好成功咁咬去小南手上嗰粒寶貴嘅魚蛋，然後喺口中慢慢咀嚼。





當小南反應得切嘅時候，佢手上就只係剩返低一支竹籤。

小南望一望支竹籤，捽一捽隻眼睛，然後大聲咁話⋯⋯

「你食咗我粒魚蛋！！！」