《台灣個表妹嚟咗我屋企住》【完】: (七十)嬉戲

冇幾耐就從黑暗中行返出去光明嘅地方⋯⋯

離開黑暗嘅環境後，因燈光嘅照射令我清楚看見小南滿面通紅，目光呆滯，似乎係畀我頭先突如其來嘅舉動嚇親。

「呼⋯⋯」小南慢慢調整呼吸，然後好快咁鬆開我隻手，再鼓起泡腮望住我。「哼⋯⋯衰人表哥！」

小南一嚟就幾個粉拳襲擊我，卻畀我輕鬆擋下。

「喂喂⋯你做咩呀⋯」我笑住講。



小南見狀，就好唔忿氣咁話：「衰人表哥！成日都恰我！帶人嚟呢咁恐怖嘅地方！我嬲你呀！」

「吓⋯⋯你真係嬲？」

「哼！」

「咁頭先我拖住你行嗰陣你又行？」:D

小南一聽，面就更紅，一雙憂鬱嘅大眼睛正在逃避我嘅目光。



「你⋯你⋯咁⋯」小南好似有嘢想講，但又唔知點出聲。「總言之你好衰啦！」

「吓⋯⋯我有咩咁衰喎？」我問。

「都話我怕黑，仲要⋯逼我行，而且⋯又拖住我⋯隻手⋯」小南嘅聲線越嚟越弱。

「咁你唔願郁呀嘛⋯」聽小南講返起，我先發現自己右手嘅手掌有好多手汗，但啲手汗明顯唔係屬於我。

「唔理你呀！總之以後唔仲再恰我呀！如果唔係我就話畀姨丈聽，投訴你呢個唔稱職嘅表哥。」



表妹連我阿爸都搬埋出嚟⋯⋯只好屈服。

「好囉⋯以後唔玩你啦。」我話。

「咁就差唔多⋯原諒你啦。」

其實表妹都算係一個口硬心軟嘅人，每次我調戲完佢，哄下哄下，佢都會好快冇咗回事。

究竟話佢傻定天真好呢？抑或兩樣都係。

「咁依家去邊呀？」小南問。

「你想呢？」我問。

「去食嘢！」小南又笑返咁講。



「好呀⋯⋯」說罷，小南就衝過嚟攬住我隻手臂。

「行啦行啦！」佢拉一拉我，好自然地就畀佢拖住嚟行。

「表妹你做咩咁鍾意我隻手臂嘅？成日都好似隻樹熊咁攬住。」我話。

「咁你有病，我驚你怕人多又會暈低呀。」

「乜原來你咁細心㗎？」

「哼⋯你依家先知我好喇咩？」

「哈哈⋯」



「笑咩呀⋯咁聽日去邊呀？」

「你想呢？」

「只要唔恐怖就得㗎啦。」

「唔恐怖？」腦海忽然閃過一個想法⋯⋯一個唔恐怖得嚟，又多美食嘅地方。「聽日先話你知啦。」

「喂呀！依家講唔得咩？」睇嚟小南唔係咁滿意我賣關子。

「哈⋯你聽日就知㗎啦。」

「哼⋯」

就係咁一對表兄妹嘅背影，喺嬉鬧間漸漸遠去。



而迎接佢哋係溫馨嘅故事，還是艱難嘅考驗？

呢個係一件連月老都無法決定嘅事情。