《台灣個表妹嚟咗我屋企住》【完】: (五十八)滿頭大汗

「表哥你冇事呀嘛？使唔使幫你call白車呀？嘻嘻⋯⋯」

死啦，畀小南串返轉頭添，呢獲真係好柒。

我不停咁飲杯凍檸茶，先至調和得返。

「冇事！」

喺女仔面對又豈能失威！點都要死頂㗎喇。



之後我幾經辛苦先食完碗米線，而小南就唔止食晒啲麵，仲連湯都飲埋。

眼前呢個表妹原來深藏不露⋯⋯係一個高手嚟。

見到佢滿面通紅，我諗呢一刻嘅我應該都係差唔多，而且同樣地我同佢都食到滿頭大汗。

於是我就拎咗張紙巾畀佢。

「表妹，抹下汗先啦。」



「唔該表哥。」

嘩！食嘢都出汗，一陣返屋企真係要沖個靚涼先。

賣完單後，兩個人食都唔過一百蚊，所以話譚仔真係窮人恩物，特別係我呢啲窮撚。

而我呢條窮撚，就同小南喺夜幕下漫步回家。