《台灣個表妹嚟咗我屋企住》【完】: (五十)幾有氣氛

我揀咗一套鬼片⋯⋯因爲嚟嘅時候太過匆忙，我又唔想等，得呢套電影可以立即有得睇而唔使等咁耐。

不過都好嘅，唔通同表妹睇愛情片咩？

身處於漆黑嘅環境當中，會不自覺地望向唯一有光嘅方向，即係大螢幕上嘅畫面。咁樣睇鬼片真係特別有氣氛，亦都特別驚⋯⋯

套戲一開始，就已經營造咗一種陰森恐怖嘅氣氛，小南心知不妙，緊張咁輕輕咬住下唇。

原來小南驚鬼，我冇問清楚佢就帶佢嚟睇鬼片，好似有啲衰⋯⋯





「喂⋯表哥，呢套咩電影嚟㗎？」小南細細聲咁喺我耳邊問我。

「呢套？鬼片囉⋯」我亦都細細聲咁答返佢。

「吓⋯」小南呆咗一呆。

呢個時候，畫面播住一個女人行咗入間房，佢慢慢打開門嗰陣，看見有一個血淋淋嘅人頭吊在天花板，突然有隻手拍一拍個女人嘅膊頭，而視角隨住鏡頭一轉，就突然出現咗一個手持電鋸嘅恐怖小丑正在奸笑⋯⋯

「嘻嘻嘻嘻⋯⋯嘻嘻嘻嘻！！！」隻小丑奸笑得令人心寒。





「嘩！！！」小南就即時被嚇到花容失色，然後緊緊咁攬住坐喺佢隔離嘅我，請埋我隻手臂食波餅。

「嗯⋯⋯」老實講，雖然我都好驚，但係喺個女仔面前又豈能失威，只能硬住頭皮扮唔驚。

然後一陣電鋸聲不斷傳嚟，畫面上確實相當震撼，但小南就緊閉着雙眼，一面驚慌咁攬實我，聲音越大，佢就攬得越緊。

「表哥呀⋯⋯我好驚呀⋯⋯」小南話。

「唔使驚唔使驚，表哥喺度。」我安慰咁講。





身邊其他嘅觀眾都有相似嘅反應，不時有一啲驚嚇位，就嚇到全場都驚一驚。

過咗冇幾耐，小南依舊攬住我，有時睇一睇，有時又縮一縮，黐住嗰隻我冇咩肌肉，但對佢嚟講好有安全感嘅手臂。

見到佢咁樣嘅反應⋯⋯嘻嘻⋯⋯

係時候可以獨食兜爆谷了！