《台灣個表妹嚟咗我屋企住》【完】: (四十)解唔開嘅心結

「阿星，我諗唔到食咩好呀！」

「諗唔到就食返西米露啦，你嘅至愛。」

「係至愛啫，但食得多都會厭㗎嘛。」

「咁你成日見住我又唔見你話厭？」

「咁點同啫，你都冇得食。」





「但係你成日都咬我㗎喎⋯」

「咬你係因為你成日恰我咋！」

「邊有成日⋯經唔中啫。」我笑住咁講。「嗱！最多我幫你依家揸主意囉，叫多碗紫米露啦，好好味㗎，我至愛嚟。」

「咁⋯好囉，陪你食下紫米露。」

我仲好記得，以前阿琪成日都會同我食糖水，佢最鍾意食嘅就係西米露，而我鍾意食嘅就係紫米露。





唔知點解我哋都會特別珍惜食糖水嘅呢一段時光，可能知道食完之後就要互相送別，可能要隔一段時間先再見到面，所以就特別珍惜，特別依依不捨。

但最後我連送佢嘅機會都冇⋯⋯

分手收場⋯但我連死因都唔知係咩。

聽人講佢好似話因為要移民，所以連學都退埋。

只係話分手，然後乜都冇講就咁離開咗我。





其實我一直都好想知道點解佢當年要同我分手，呢個亦都係我一直解唔開嘅心結。

眼前同樣係一碗西米露，但當年陪伴我一齊食嘅人已經唔喺度。

「唉！」我忍唔住長嘆一聲。