《台灣個表妹嚟咗我屋企住》【完】: (三十五)踏出一步

坐緊巴士返屋企嘅途中，我依然係諗住嗰件事情。

就連我自己心入面都好掙扎，掙扎緊逃避定係面對，我真係諗極都諗唔到點算好。

如果係小南嘅話⋯⋯

「表妹⋯我想問你有冇試過同朋友絕交？」我好好奇咁問。

「吓⋯點解咁問嘅？」





「因為表哥我有啲心結解唔開，想請教你嘅意見。」

「如果係真正嘅朋友，又點會有隔夜仇呢？」聽小南嘅語氣，我相信佢一定係會原諒佢嘅朋友。「我都試過同朋友鬧交，但最後都和好如初啦。」

「咁件事係點㗎？」我都幾想知道做咩小南會同人鬧交。

「我讀國中嗰陣，講咗個秘密畀朋友知，點知佢轉個頭就話畀其他人知喇，因為咁我就同佢鬧交，仲冷戰咗成個月呀！最後佢搵返我道歉，咁咪冇事囉。」

「⋯⋯」





聽完之後，我又再低頭沉思起嚟，原來表妹只係為咗啲雞毛蒜皮嘅嘢同人哋鬧交，但正常小器嘅女仔都可以原諒人，點解作為男仔反而唔可以豁達啲呢？

「其實只要是但一方肯踏出和好嗰一步咁就已經足夠喇。」小南居然講咗句大道理出嚟。

咁講法⋯⋯其實軒少頭先都有講過阿榮想搵我道歉，唔知算唔算太遲，不過打從心底裏連我自己都唔清楚我應唔應該原諒佢，但係聽完小南依句說話，我覺得如果阿榮真係踏出咗嗰一步，咁我都好應該同樣踏出一步。

原諒一個曾經好friend嘅朋友，係咪真係咁難呢？

「多謝你，小南，我估我知道咗點做。」





「嘻嘻！你知道就得啦。」小南笑住咁講，就好似畀緊動力我去做一件事咁。

希望我咁做係啱啦⋯⋯

跟住我拎出手機，再打開whatsapp，搵返嗰個本來以為遺忘已久嘅人，喺手機度撳嚟撳去，打咗一句說話畀佢⋯⋯

「我係星，想同你傾傾。」