《台灣個表妹嚟咗我屋企住》【完】: (三十三)搞笑嘢

「咦！係喎，講咗咁耐都未介紹你表妹嘅？」軒少問。

「吓⋯」小南聽到之後就一面錯愕，跟住先慢慢介紹自己：「大家好呀，可以叫我做小南。」

「喂，小南，你表哥係咪成日恰你呢？」阿yo突然問。

「唔係呀，表哥對我好好㗎。」小南回答。

「嗱！聽到啦？我係好人嚟㗎，唔好再抵毀我喇。」 我好似伸冤咁話。





「你喺度呀嘛！佢就梗係咁講㗎啦。」阿yo唔係咁信。

唉，呢個肥婆真係⋯⋯

「咁好囉，我去嗰邊攞嘢食呢燒，畀機會你自己問下佢啦。」說罷，我就起身行咗去攞嘢食。

我拎起支叉，然後將啲牛丸插入去，跟住就有人行過嚟拍一拍我膊頭⋯⋯

「喂，星爺。」原來係軒少，見到佢一本正經，好似有啲認真嘅嘢想同我講。





「做咩呀？」我問。

「冇⋯⋯只係有啲嘢想話畀你知啫。」軒少諗咗一諗，然後話：「阿榮想搵你傾下⋯⋯」

估唔到軒少係想講嗰單嘢，一講起呢個人唔知點解我就會無名火起。

「哦。」我敷衍下佢。

「我認真㗎。」軒少真係收起咗佢嬉皮笑臉。





「今日咁多人，我哋唔好講佢啦，好冇？」

「但係⋯」

「夠啦。」我示意佢收聲。「畀我忘記咗呢個人啦，今日我只係想開開心心咁燒下嘢食。」

「星爺⋯」

我拎住叉好哂嘅牛丸，返去小南嗰邊坐低，只見小南同阿yo似乎傾得好開心⋯⋯

佢哋咁快就混熟咗？

「哈哈⋯」小南笑到傻咗咁。

我緩緩咁坐低然後問佢：「做咩笑到咁呀？」





「因為⋯⋯哈哈⋯⋯頭先阿yo講咗好多你中學時候啲搞笑嘢畀我知呀。」

搞笑嘢？我有啲乜嘢搞笑嘢呀？我望過去阿yo嗰邊，見到佢嘅樣子十分奸狡。

「喂，你同我表妹講咗啲咩？」我問。

「唔話得畀你知㗎，係咪呀小南？」阿yo話。

「哈哈⋯⋯係呀，唔講得㗎。」睇嚟佢哋兩個好快就已經熟落咗，仲要收埋啲秘密唔話畀我知。

到底我有啲咩搞笑嘢好講呀？連我自己都唔知喎。