五千天的小確幸: 豬隊友們
豬隊友們
我仲好清楚記得第一日見豬既情景，果日系2011年9月12日，911第二日。一早車左去系沙田某屋苑等我朋友，佢唔知咩原因要放棄豬，我又膽粗粗甘應承佢，而開始左我一家同豬奇妙既緣份。第一眼見佢，系一隻啡啡瘦瘦既小狗，跟住系我朋友既腳邊，乸口乸面，緊緊張張甘。我落車同佢打招呼佢仲低住頭呢系朋友既腳後，過左無一陣佢就已經坐系紙箱裡面搭緊我車返企（當然唔系相中果個丫，邊會甘開心）。小狗系通人性既動物，佢其實已經知咩事，不情願亦無辦法甘開始左跟住我生活既日子，好慶幸佢系快樂既。
豬之前我未養過小狗，之後一發不可收拾，陸陸續續有其他隊友加入左佢既隊伍。唔知系咪出左名老襯定好伙食，朋友介紹朋友甘都招收左好幾個隊員，大部份都系唐狗，有的仲系自來狗，全部都好乖，對人又有禮貌，旨意佢地看門口就凶多吉少（不過見到佢地個樣你地會匪夷所思）。平時都系住系我新界個倉度，放假先會去我企住返幾日甘，最鍾意跳哂上我車度游車河，搞搞震阻住我揸車。
狗狗對人系絕對忠誠同信任，照顧佢地系一生一世既承諾，但系世界上依然好多人半途而廢，遺棄動物日日發生。曾經有一段時間接收多左狗狗，我能力所限，一時疏忽我到現在依然深感悔究。有一個豬隊友阿肥，生得眉清目秀，兼是金髮鬼妹，一到埗已招來周遭公狗垂涎。我本人已經醒目問定阿肥已否絕育，但系不負責既人問都無謂，門禁深嚴亦擋唔住一眾扯行哂既狗公。一個月後紙包唔住火，佢個肚大到摸到Ｄ餡，好彩徬徨之際得到好心人幫忙終身收養阿肥及小肥們，我亦都衷心祝福阿肥有頭好住家。
又有一隻系路邊執返來既，有一晚收工開車走既見個同事系路口玩狗，我又再一次醒目地叫定唔好執返來，不過結果又。。。最衰果樣系呢隻狗狗兩個月已經大隻到無人鐘意無人理，未打針未攞牌時染上致命既腸炎。好彩佢命好俾我發現，帶左去醫院留醫成十日先好返，不過條數就。。。
我定期都有接觸幾個組織，有元朗既保護遺棄動物協會，有幫助唐狗流浪狗絕育既動物朋友（仲要系兩位靚女），有辦慈善訓犬班既唐狗會，佢地無私既奉獻我深深感動，我有時會用豬既名義去捐助佢地，可以幫助其他人亦幫豬積福。
豬你要保佑你既隊友啊