五千天的小確幸: 大使來了

大使來了

有一次看飛機上的電影，講一對笨手笨腳的中年夫婦學打乒乓球，還跌跌撞撞上陣出賽，輸得心灰意冷時因緣際會，拼盡老命打到決賽時，開場前肅然掏出一個相架，相中是一個拿著球拍的小學男生，我不期然又流下眼淚來。

早幾個月我看網上招新一屆唐狗大使，類似外展狗醫生幫忙情緒舒緩輔助服務，不過大膽地起用其貌不揚的唐狗。會長的想法是用underdog去安慰underdog，甚至用有D唐唐悲慘身世去鼓勵細路，希望在明天嘛。我靜靜雞無話人知帶了咪去面試，果然丟盡面子，成程伏系我大脾震，其他狗大大方方行來行去，任考官點撩，引，摸，摷，嚇，嘈，咪都無反應，淨系識擺尾同尷尷尬尬地笑。

過左一個月，我收到通知咪合格了，仲竟然好高分添！原來反應遲鈍系有用的，叻咪！終於敢公布天下啦。這天一早開始返學受訓，也跟其他大使們交流交流，真的有幾個是被遺棄/流浪/暫托中，仲間中出來炒散做義工，非常令人敬佩。





服務其實都幾多元化，老人院，醫院，學校，兒童院探訪就必修丫，特別的例如隱蔽人士治療，自閉兒童治療，語言治療，最正就系閱讀困難症治療，乜都唔洗做，一狗跟一人，靜靜地坐系度扮聽讀書，岩曬懶咪，唔駛郁都有野食獎勵。上完堂後派制服(我等馬仔穿的)和襟章，過二個星期就出勤了，好緊張呢！

今天其實都幾奇怪，一大班狗一齊一朝沒有吵鬧，咪也無太緊張低嗚，仿佛一班認真上課的小學生，好狗是會互相學習的。回家後我幫咪的服飾改了一下，用豬的手巾變成圍巾，大使襟章繡在前面，奇怪咪本來很討厭縛身縛勢的，現在一帶上大使巾，表情嚴肅，精神抖擻起來，馬上一個做大事的模樣，可能又系同學仔教的吧。



我一直希望讓豬做狗醫生護士落空，現在看到咪大使似模似樣總算老懷安慰。豬，以後出勤我地也帶你照片，一起看咪做得怎樣，也認識一下新一班豬隊友，好不？