浮事的，第二個的士佬既故事。: 轉動

是夜，梓風的WTSAPP傳來了訊息

靚女空姐TIFFANY：「喂，我同我老公吵大鍋丫，可能同佢離婚，以為都唔好再做個死仆街既生意啦你。」

您：「哦～我知啦，佢搞意大利妹丫嘛」

靚女空姐TIFFANY：「你點知架？條仆街一早有同你提過？呵，原來你都係同謀。」

您：「傻啦，如果我知既我一早就叫你飛左佢啦。今日你淋佢咖啡果時，我坐左係靠牆邊果張枱度。」





靚女空姐TIFFANY：「你覺得我應該點做好，我真係好鬼死嬲呀！」

您：「佢搞到咩程度呀？」

靚女空姐TIFFANY：「佢話無同條女上過床，淨係拖下手，同每次飛意大利都會搵佢囉。」

您：「你點發現架？咁勁既你。」

靚女空姐TIFFANY：「第一，唔好睇小女人既直覺。第二，佢係我老公，我對左佢咁多年，佢有D咩唔同左難道我會發覺唔到咩。所以我話比你地D男人聽呀，唔好諗住呃女人，除非你覺得果個女人唔愛你啦。如果唔係，佢一定會知你做緊咩。」





您：「咁你而家仲愛唔愛佢丫？愛既，你就要忍受好多野。」

.......靚女空姐TIFFANY　最後上線時間 11:38pm

「愛一個人，你估真係咁易咩？黃金梅利，你話係嘛。」風望向已然發育完成，體形巨大了數倍的黃金梅利說。

黃金梅利抬頭瞄了一瞄梓風，然後像沒好氣似的走出睡房，跳上客廳的梳化，繼續睡覺去了。

「車，你估得我一個掛住小恩咩？你唔好話我知你唔掛住佢招龍虎亂舞呀～」風對黃金梅利說。





「呀嗚～」黃金梅利發出了一下怪聲，然後便倒頭睡去了。