單身女子隨筆: 煩人的爛桃花

最近被一個過去式纏著，煩到胃痛。實在唔鐘意呢個人，所以長話短說，這個男人在正經的交友網認識的，他在交友網見到我個名，由係FB搵到我，從而打開話匣子，當時覺得有趣，一來呢個交友網我登記完之後，已經遺忘左，二來呢個男人兜個大彎係FB搵到我，確實少數。因為大家住附近，有一晚約佢出黎見面，當時印象唔錯，表面睇佢外表正常，返文職，稱自住，剛失戀回復單身，好似唔錯，我嘗試同佢發展，認識初期遇著我成日返夜更，所以放工會食糖水，陪我行公園，或著我渣我架羊仔載佢去海邊傾下計。其實見面之後，我覺得我鐘意左佢，想了解佢多啲，想同佢食餐飯，我覺得一餐飯可以觀察到一個人好多野，我同佢講：我想同你食餐飯，佢會答好，然後問題就黎喇，約左幾次每次到約定時間就放飛機，次次都同我講放工返到屋企好攰唔想出黎，我明白工作好攰，但作為一個三十幾歲既成年男人咁無口齒，一次係咁，兩次係咁，第三次我真係好嬲，我既家教唔容許我對朋友或外人發脾氣，但係果下我真係好嬲，我同佢講：你唔鐘意我唔緊要，我明白感情無得迫，我約你係想大家多啲時間了解對方適唔適合，你咁樣我地無謂交往落去。

然後，我全方位BLOCK左佢，電話、FB、whatapps…BLOCK得既全部BLOCK哂，清靜左個零月，因為我壞電話，重新換過張SIM啲紀錄無哂，大概三、四日，佢竟然WHATAPPS我，佢想我俾多次機會大家，我即時反應係唔想，但係我搵閨蜜商量，佢論點係一個外在條件唔太差既人到三十幾歲都無拖拍，未結婚，性格點都有啲缺憾先會咁，如果我包容到呢啲缺憾就有機會走落去，我覺得佢講得幾啱。係網路世界認識的人因為沒有實質背景支持，總會有幾分猜度，而且我好奇想知道佢係真‧性格缺憾定係真‧外遇。我同意解封WHATAPPS，不過其他免問，今次我唔再主動約佢，觀察左大概兩星期之左，呢個人真係好奇怪，估佢呃蝦條咩？佢完全唔約見面，估佢騙財？佢淨係講佢啲家庭背景、工作內容之類，最反感係佢話佢鐘意我，佢話佢掛著我，鐘意一個人點會唔想知佢開唔開心，今日過成點？掛著一個人點會唔用盡方法去見佢？我對佢失去興趣，又唔係騙財又唔係騙色，淨係呃吹水，極度無聊。最後我好清楚同佢表明我唔想同個唔洗見面既人拍拖、我已經假定佢係非單身唔希望再纏落去、同我對佢好失望，佢睇完，佢話佢no comment，我再BLOCK佢。

又隔左個零月，佢隱藏來電打黎幾次，又留言，真係好煩，我今次真係好唔客氣，WHATAPPS質問佢到底想點，佢竟然話佢好想坐我電單車尾同埋好想見我，我果下真係好洩氣，點解會有啲咁煩既人，佢竟然同我講佢知錯，同我講佢會改。我頓時覺得佢好可悲，一個比我年長既男子同我講佢會改，改咩？點解要改？如果我值得佢去改，點解當初要咁樣破壞關係？大家都已經過左三十歲，應該好清楚自己性格缺點，應該好清楚自己係個咩人，同我講會改，真的，佢肯改我都鄧佢辛苦。今次我好決絕同佢講，我唔想再應酬佢，唔想再聯絡。

年歲到了這個時候，我們已不是小伙子，我們的人生已經定了一半，已經唔想花時間磨合、唔想為性格而吵架、唔想為生活皺眉，合則來不合則去。我的確很想有個伴，但我覺得我們都無必要為對方掩蓋真性情，真心喜歡一個人會不知不覺為對方改變，不知不覺包容對方，不知不覺地體諒對方，如果覺得要忍耐才能走落去，其實已經不能走遠。