單身女子隨筆: 淡淡相依

朋友L兩年前嫁到我家附近，一直沒機會找她，最近剛好有事找她幫忙，順便找她聊聊近況。我同佢係一個興趣班認識，雖然唔係好熟，但我和她都是性格爽朗的女子，所以認識唔深卻能聊很深入的話題。我問她結婚很幸福吧？才兩年身材已經由以前既S碼長到L碼，看得出這是幸福肥。

L第一句就好爆：我係為結婚而結婚的。

你唔愛你老公咩？

L：唔係唔愛既，無佢愛我咁愛囉。

我所知道L的丈夫U係個好安靜、高大、幾MAN既男子，據L形容丈夫係個超級宅男，雖然搵錢唔多，但超級愛佢。話說L係個非常活潑無時停既女仔，而U係個只會匿係屋企打機同落波地踢波既宅男。



到底U有幾愛L呢？話說初初結婚U係新居裝燈掣，又茂低又彎腰搞左好耐，L問佢做咩搞到咁辛苦，U一臉擔心話：我驚你唔夠高噤掣呀… U愛L愛到全方位為佢著想，連L都甘拜下風。

L：我見到佢咁，我好慚愧，我真係做唔到好似佢咁，可以咁愛。我連佢幾時同我求婚、幾時結婚我都唔記得，拍拖果陣做過啲咩我都無咩印象，而佢就可以隨時背返哂出黎。

我：愛你愛到咁，你似收左隻兵，多過似嫁左個老公。但係你對佢咁唔上心，又真係好傷佢心喎。

L：係架，但係我知道我要珍惜佢，佢同我以前既男人完全唔同，我以前好心野鐘意英俊、聰明、激情，同果啲男人一齊搞到自己好唔開心，我知道自己唔係有手段既女子，我根本唔適合愛情心理戰，U係個好單純，純到近乎蠢既宅男，同佢一齊好悶，但好安心，佢知道佢個人好悶而我好怕悶，所以佢成日迫自己諗好多小情趣陪我。例如我很喜歡看電影，U就每星期都帶我去睇戲，我知道佢迫自己出街，我會唔出聲由得佢陪，我知道佢用自己既方法表達愛，愛一個人會迫自己改變。

其實U唔係蠢，佢只係將全副心思放係L身上，而忽略左身邊既小細節啫。L是個有經歷而聰慧既女子，她很想珍惜U，但佢實在諗唔到方法點樣回應U既愛，佢唯有乖乖留係佢身邊，接受佢所有既心意。



L經歷過濃濃既激情，所以佢好明白U係上天既恩賜：雖然U真係好鬼悶，但係我好有安全感，我好想呢一世都俾呢個咁悶既人陪著我，就算我地依家唔有錢，但係我感覺到將來。

L講左成晚係想我知道，黑暗到盡頭會有光明，U係L苦戀之後出現既，佢想我唔好對感情絕望。

我真心感恩我身邊所有既朋友同族人(留意返係全部)佢地都有幸福既婚姻，我既圈子無離婚呢樣野，所有人頭上都有幸福美滿既光環，大家越想將幸福分俾我，我越想收埋自己。光芒越是照亮我，我身後的黑影就拉得越長。

不求濃烈相守，只求淡淡相依。

敬黑夜，飲杯。