【大學故】《上到大學，原來真係會咩都唔同曬》: 二十
(二十)
*呀賢視覺
「咦個個咪阿k？」係我隔離既小熙原來都發現到yuki，同埋佢隔離個個男仔，鄺曉輝。
「下乜佢地咁fd架？」小熙繼續講
「...我真係唔知喎」我真係唔知
我同小熙望住yuki同鄺曉輝既身影消失係人群之中。
「唉，我之前居然信錯呢個人」
「過左去既就唔好諗啦」我一手攬住佢「依家真相大白咪得囉傻婆」
「但我好驚雪琪同我會有條刺啊」小熙一講起呢樣野又開始情緒氾濫「唉如果好似之前咁扮無野我又覺得好對雪琪唔住。話曬佢咁幫我又一直當我係好朋友，依家我就誤會佢仲要做啲咁hurt佢既野...」
「雪琪份人不嬲一就一二就二架啦，無事架喎」我一邊攬住小熙膊頭行一邊話「總之呢，我地四個既感情無咁易玩完既」我好認真咁講
「以後唔可以再講分手啊，知唔知」我停左落黎，一臉認真咁同小熙講
「知道啦，對唔住」
李穎熙，妳知唔知妳同我講分手個刻我個腦完全空白一片唔識反應。
我真係... 唔想失去妳。
自從呢次單野之後，我同小熙既感情都變得比之前更加好。以前小熙偶然都會發下小姐脾氣，但佢最近都無乜發發脾氣，好左好多。
我都避免再咁接近其他異性，免得重蹈覆轍啦。
雪琪間唔中都會搵下我一齊食lunch既，不過都少左，有時候我地都會叫番ocamp個班人一齊食，但就無叫yuki。
講開yuki，係知道左佢同鄺曉輝咁fd之後，我都無同佢交流過。有好幾次行過圖書館都會見到佢兩條友痴埋一齊，可能兩個都有啲野掛。
咁仲好，咪煩住曬。
「喂今晚得唔得閒啊，出黎飲野啊」岩岩落堂就收到嘉浩既電話
「今晚都得既，反正我已經無堂」我望一望手錶，今日最尾一堂係放六半。
「咁九點老地方見啦」
收番埋部電話，我又要趕去上下一堂。
「喂呀賢，睇左gpa未啊？」坐我隔離個個男同學隨意咁問
「係喎，依家睇下先」
望下schedule，原來year1眨下眼都已經差唔多黎到尾聲。以前中學個陣每日放學唔係同小熙去拍拖，就係同嘉浩去練波。
上堂又係hea下hea下，直到F5 F6個兩年就全班一齊發奮溫書，上堂操paper，落堂就自修室見。
講真，個陣時既日子真係好簡單好熱血。
依家上到黎，日日趕project唔再講，reg科又要搶，搶唔到既分分鐘天地堂都有份。放左學又攰，有時番下就搞到依家啲八半堂起身好辛苦，我真係寧願好似中學咁日日番八點。
呢個新既環境，真係令我不期然懷念起中學既時光。
「頂，3.48」我隔離個個男同學又再次出聲「差啲就3.5」唔知佢係咪有意話我知「咦你呢」佢見我開左成績個page，即刻狗衝黎問我。
「3.64」我攤開部電話俾佢睇
「哦，咁勁既」佢見到我成績之後，就瞬間黑左面然後繼續搞自己野
我都見怪不怪，畢竟呢年入面見識到既奇人奇事我真係無野好講。
大學，就係一個咁虛偽既地方。
「幾分呀幾分呀？」我隔離位呀珊問
「97啊」數學係我強項
「嘩咁勁！真係屈機架喎你」佢話「咁你呢咁你呢」佢轉過去問後面呀ling。
「我得82咋」呀ling答佢
「妳80都唔差啊」我望一望佢個分
「唉呢個分真係dse連4都唔知有無」佢擔心咁講，跟住又另番去同呀ling講「你話我地洗唔洗補下啲雞精班呀拿」
「放心啦，你數學都唔係差，狂操paper實得既」我話「我phy都係掹車邊69分咋，仲大獲過妳。拿呢啲係我補數啲paper啊，妳做完先還俾我啦」
「唉唉唉，好啊唔該曬啊」呀珊隨即係櫃檯拎左疊遵Xphy天皇既notes出黎遞左俾我「一齊加油啦！」
「喂死仔，幾多分啊？」
「炒左啊」我一野將份中文閱讀塞落嘉浩度。
「頂你中文主科黎，你俾啲心機啦」嘉浩一野拍落黎。
「屌你，你中文咁屈機緊係咁講啦，我真係唔知點解對住中文就好似文盲咁」
「估到你咁講架啦」嘉浩將手上面個袋野塞俾我「拿我啲中文notes啊，年年第一都係靠佢地架，你肯睇dse實無死！」
中學時期，大家一齊奮鬥一齊拼搏，每日操卷操到凌晨，溫書溫通頂，計數計到腦閉塞，睇文言文睇到發夢都見到孔子。大家既目標都係一致，都係入到大學，而我地視呢班人為戰友。
大學時期甚至出到黎社會做野，每個人都會一直為自己打拼，努力競爭。大家既目標依然一致，就係希望日後可以得到安穩，甚至係發達既生活，不過呢個時候，我地會視呢班人為敵人。
社會，就係咁虛偽咁現實。
不知不覺間，我地四個入左U都已經就一年。
估唔到Year1已經可以發生咁多事，我好興幸我地四個既感情都仲係咁好。
比起中學好既就係考完final先5月中，有成三個幾月暑假，我當然要好好地咁玩反成個假期。於是我自製左日dayoff 去撲機票，諗住比個驚喜小熙同雪琪。
無錯，藍嘉浩個死仔將買機票既重任交比我，自己走去訓覺。
女仔都不離送下禮物，比啲驚喜佢地，所以我非常滿意小熙見到張我同嘉浩通左幾晚頂既行程既個個反應。我相信雪琪聽到之後都會好激動咁狂咀嘉浩。
今日我地四個就約左要行街，正確黎講應該係陪小熙同雪琪行街。你知啲女仔，去個旅行咪姐係比籍口自己買個新行李箱。
「啊... 我想去廁所，雪琪你陪我去！」本身興致勃勃既小熙好驚訝咁叫左聲，然後好快咁調整自己情緒咁講。
「哦... 好啊」雪琪放低左手上既行李帶，然後轉頭行去小熙到。
「快啲喇！」小熙一手拉住雪琪，急急腳咁跑向女廁。
「喂⋯！你有冇咁急啊，行慢啲... 」走遠左既佢地都仲聽到雪琪把聲。
以我對小熙既了解，佢應該係有啲事發生。我望一望嘉浩，「發生乜事？」
「咩發生乜事？佢兩個成日一齊去廁所有幾奇？」嘉浩繼續將視線停留係手上既高達模型咁講。
我冇理條死仔，將目光轉向小熙頭先既位置，好仔細咁留意四周既人。
一張熟悉既臉孔映入眼簾，眼前個個中分髮型、低胸短裙裝既女仔彷彿都留意到我既視線一樣，於是佢慢慢咁行過黎，佢每行一步我不自覺咁望佢上下擺動既胸部。
屌，條女身材又幾正。
好快佢已經行到過黎，我即刻回神面無表情咁望住佢。
「嘉浩，咁岩既！」 對方嬌嗲既聲音令我不自然咁起左下雞皮。
「Ceci？」嘉浩明顯神色慌張咁即刻望向女廁方向，然後好尷尬咁笑左下「係... 係囉，咁岩陪女朋友黎行街啊。」
「哦，我見就暑假咪諗住買過套泳衣囉」Ceci風情萬種咁撩撥左下佢既長髮。「你係...？」
見佢望住我，我又望一望嘉浩同佢示意。「呢個係小熙男朋友，呀賢。」
「你好」我對住佢點左下頭咁講。
「你好啊」我冇諗到佢竟然會直接拉起我隻手同我握手，下一秒我已經即刻縮開。
「咁我唔阻你喇，學校見喇嘉浩！拜拜呀賢！」Ceci並無因為我既唔領情而有咩反應，好自然咁同我地講再見。
我係Ceci走左之後，即刻問嘉浩「做乜頭先咁驚？」
嘉浩又望多次女廁方向，「唉... 」
「關雪琪事？你暪住雪琪同左條女一齊？」我好快就意會到係關雪琪事。
「有啲誤會咁囉... 」嘉浩開始講曬成件事我聽，由ocamp發姣到係hall勾引嘉浩再比小熙撞破。
「屌，你條死仔真係... 」我一邊擔心雪琪知道左之後既巨大反應，一邊又諗緊暪住雪琪既我地到底係咪做得岩。
「乜小熙冇同你講咩？」嘉浩對於我既反應有啲驚訝。
「冇啊，個陣同佢都冇點見。之後就... 你知喇」
「呀賢呀賢！你快啲過黎睇下！」小熙既聲音轉入耳朵，打斷左我同嘉浩既對話。
我地同時望向聲音既方向，只見小熙同雪琪好興奮咁對住我地揮手示意我地快d行過去。
「總之，唔比雪琪知係最好既方法。」我低聲咁同嘉浩講完後，就走向小熙個邊。
希望我地會繼續咁開心平安咁落去喇。雪琪，你會理解我地架，係咪？