我們怎麼了？: 20

晚上，我跑到了聯合廣場樓下等秋凝下班，我挑了一個暗角靜靜的等，說穿了也是怕碰見相熟的人。 

但我一直等，內心卻有一股莫名的興奮，雖然前一天在G4跟蔡卓妍過了一個通宵，但依然沒有太多睡意。幾年來蘊釀在內心已久的渴望，這一刻終於可以走到面前。 

時間一到，我已經收到秋凝的電話。 

秋凝：「諾，我仲有幾個字先走得，你到咗未？」 

我：「我到咗，喺樓下，不過妳慢慢，我等得。」 





「好啦，一陣見。」 

半個小時之後，我看見秋凝來到，但她並不是在商場上面的電梯過來，而是在商場外頭出現。 

我：「咦，點解妳呢邊過嚟嘅？妳唔係上面返工咩？」 

秋凝：「係呀，後門掉垃圾嘛，點呀？宜家去邊度食嘢？」 

我：「妳想？妳話事，聽妳話。」 





秋凝：「做乜對我咁好？」 

我：「唔得咩？」 

秋凝：「一陣俾詠莉扭你耳仔。」 

這段時間的男女關係像一場博弈，有心人會時時刻刻留意對方的一舉一動一言一語，因為就算是一句簡單的說話也可能是一個暗示。 

我這個有心人，聽到秋凝故意把詠莉這個名字套在我們的中間，我不禁立即估算，她這個舉頭是有心還是無意？ 





她是要故意給我一度牆來暗示我們還只是朋友，抑或只是無心之言？今晚的約會是我主動的第一步，我不可以有失的。

我：「呢排同佢冇乜嘢傾，感情唔係太好。」 

秋凝：「上次成班出去聽佢唔係咁講架…」 

我：「我都唔知佢諗乜…妳呢排成日同佢出去咩？」 

秋凝：「幾次啦，都係天恩佢地拉我出去，佢地見我同阿斌分開咗咪陪下我，不過我宜家冇事啦。」 

我：「冇事即係咩？阿斌有搵妳？」 

秋凝：「有通過電話，冇見過。」 

我：「咁又話冇嘢？」 





秋凝：「咁冇見佢都唔一定要有嘢呀…我都可以有自己生活吖嘛。」 

我：「冇見妳幾日，成個人唔同哂嘅？」 

秋凝：「邊有，其實我性格一直都係咁，冇嘅時候咪覺得好緊要，轉頭就唔記得咗，哈哈。」 

差不多了，我測試秋凝跟阿斌的親密度報告已經幾乎完成。而且可以肯定，他們的分手並不是兒戲。如果情況仍然樂觀的話，我會選擇在今晚，向秋凝說出我這幾年間一直想跟她說的話。 

雖然在在她的語氣中，我知道最近在她身邊有一個人，就是那天在街上把她牽走的人。 

我：「我都要去美國，妳知道嘛？」 

秋凝：「……嗯……聽佢地傾計時聽到詠莉講，我都唔記得打俾你問你添。」 





我：「我屋企好多事，都唔知點講起。」 

秋凝：「咁你同詠莉又點？好似我同阿斌咁呀？」 

我：「做乜成日提住詠莉，我都冇講阿斌…」 

秋凝：「咁唔知講乜嘢嘛…」

跟秋凝邊說邊聊，很快已經由太子走到旺角，就在我們轉進那個靠近G4的街頭，那一個我一天之前還看見秋凝被其他人牽走的後街，我堅定的站在秋凝面前，停住了腳步。 

「做乜行行下唔行？」秋凝錯愕的說 

我沒有理會她，只是以眼神發出我的訊息，去告訴她，我以下要說的話，是關乎到我跟她過往的一段回憶：「我想問妳啲嘢…」 

秋凝：「問嘢都唔使企定定喺街呀下。」 





秋凝的表情，告訴我，她已經意識到我要發問的問題是何等認真。我把她稍微拉到一旁，停住兩秒，然後非常、非常認真的說出我的問題： 

「秋凝，妳可唔可以話我知，當日我地點解要分手？」